IM-U310外形同一般touch screen 手機差唔多，較特別係一拉開機頂，就會解除key lock 同見到視像鏡頭。
臨近聖誕，Nokia 超期待作5800，以及LG 同Samsung 嘅800萬像素手機都即將推出，想換機唔憂冇選擇。之不過，呢批新機功能雖然好強，但介面都係「九宮格」形式，方便有餘新意不足。反而韓國嘅Sky （香港Pantech ）就為新機IM-U310出咗個場景介面，與眾不同咁將所有功能以場景形式呈現出來，想聽歌、睇DMB 數碼廣播的話，就會見到勁有屋企feel 背景，入面有好得意嘅收音機同電視公仔你揀，一篤就可以聽歌。要上網同檔案管理咩？就轉去辦公室場景搵電腦同公事包啦，玩落既有新意，又唔悶蛋。
此外，你以為iPhone 用手指一掃轉相好型咩？呢部Sky 都唔弱，皆因佢只要用手指或stylus 響芒上畫個箭嘴，就識幫你轉下一張相，聽緊歌想停？畫個圓形就得。仲唔夠好玩？佢仲可以趁你講緊電話嘅時候，好似MSN 一樣send 表情符號同震動畀同廠手機，非常之人性化！
雖然，今時今日響香港已經見唔到Pantech 嘅新機，但其實Sky 響韓國都做得唔錯，而且仲好有新意。至少面對住Samsung 同LG 嘅超級明星廣告，Sky 就改以慈善活動保持人氣，唔鬥燒錢，收效唔錯。真希望Sky 有一日可以捲土重來，為手機市場再添生氣。
1
2
3
1唔理WM 、S60定iPhone 都係用「九宮格」式介面，真係見到悶！難得IM-U310新創場景式介面，用消閒定公務function ，一睇公仔就知，而且操作反應好快。
2畫個箭嘴向右就睇下一張相，如果箭嘴向左就睇之前嘅相，想出番去就畫個圓圈啦！
3視像通話唔多人玩，但若然傾傾吓視像，可以震人部手機兼send 個表情符號嚇人，吸引力又好似大咗。
Sky 唔鬥燒錢，於是每年都搞慈善活動，將明星用過嘅簽名手機搞慈善拍賣為unicef 聯合國兒童基金籌款，慢慢建立良心企業嘅形象。
Samsung 唔貴唔用，今年就搵過東方神起、BoA 、少女時代同全智賢，又搞代言人crossover ，淨係宣傳費都多過唔少brand 賺嘅錢。
LG 最近則搵來紅得最快嘅Big Bang 代言新機CYON EDGE （港版KF510），擺明同東方神起硬碰！
