老婆，你真係好聽話，抵錫！（設計對白）據有經驗的婦科醫生表示，子淇雖然懷孕3個月，但未有咁快知道胎兒性別。相信老竇李家誠等揭盅嘅日子，仲刺激過炒股票。
金融海嘯搞到個個有錢佬身家大縮水，就連股市大好友李兆基都話自己「水瓜打狗，唔見咗一截」。唔見錢本來應該心情麻麻，但見四叔日前出席活動時反而笑騎騎。
本刊收到獨家消息：原來乖巧的千億新抱徐子淇聽老爺指令三年抱兩。囡囡才一歲四個月，子淇又再懷胎3個月，李家上下一片歡欣，所以四叔亦懶理恆指上落，呢刻梗係金叵羅最重要啦！
李兆基日前出席公開活動時，身家雖然縮咗水，但四叔仍然心情大佳，原來李家又將添一新成員。
徐母默認 對於愛女再有喜，徐媽媽沒有否認，表示遲嘅大家便會知！
為免集萬千寵愛於一身嘅李晞彤會呷細佬妹醋，據知徐子淇已教定彤彤要愛錫BB ，做個好家姐。《壹週刊》圖片
向來大懵的徐子淇，九月仍出席她任大使的「智行基金」活動，相信她當時仍未發現自己懷了身孕。
徐子淇去年七月誕下千億BB 女李晞彤（Leanna ），為李兆基帶來第一個內孫女，在「世紀發實宴」上子淇曾應承老爺「三年抱兩，六年抱四」，經過一年努力，子淇終於不負所望，達標為李家再添一名成員。
上星期三（12日）有人目睹腹大便便的徐子淇，出現在老爺恆基集團旗下的沙田仁安醫院。雖然她只懷孕3個月，但胎兒很長肉，驟眼看來似有了5個月。當日下午不施脂粉的子淇，坐住黑色房車在4個保鑣護駕下，直上醫務中心婦產科檢查。挽喺橙色Hermes 手袋嘅徐子淇雖然非常低調，但醫院早已準備專
給她上落。經過差不多一小時的檢查，子淇才離開醫院。
懷有身孕嘅媽咪，通常只會到診所檢查。但身為李兆基嘅新抱，當然會去番集團旗下仁安醫院檢查兼分娩。
雖然四叔送咗中半山惠園四千五百呎單位俾佢哋，裝修近乎完工，但長輩卻唔希望喺懷孕期間搬屋，所以佢哋仍繼續住在四季酒店。
胃口大變據子淇密友透露：「老人家都怕BB 小器，所以都好保密，唔想太多人知。加上子淇近日唔係好舒服，所以好少出街。」記者透過子淇前經理人鄺小姐，向子淇媽咪求證懷孕消息，徐太透過鄺小姐回覆：「多謝關心，遲嘅大家會知，多謝！」言語間並未有否認子淇再度有喜的天大喜訊。
子淇已有當媽咪的經驗，但今次都好烏龍，未有第一時間發現再懷孕，至上月作婦產科檢查時，才證實喜訊。再度當媽咪，子淇心情未如懷第一胎時緊張，反而老公李家誠及老爺李兆基則像緊張大師，吩咐廚師每日定時準備滋補燉品給子淇養胎。跟懷第一胎時相比，子淇的胃口起了很大變化。「陀晞彤時子淇成日都作嘔作悶，但今次完全冇呢啲大肚徵兆，反而胃口完全變晒，鍾意食魚柳包同酸嘢，見過佢揸住成個新鮮檸檬放入口猛啜。呢啲嘢佢平時完全唔食！」密友再透露。
子淇上次為四叔生咗個觀音托世嘅金叵羅，今次唔知會唔會生個運財童子孫仔俾四叔抱吓呢！
入門兩年幸福滿瀉今年26歲的徐子淇，04年與李家誠拍拖即改寫命運，06年由灰姑娘變「千億新抱」，子淇於短短兩年火速成長，除正式成為亞洲股神的新抱外，她還願意當年輕媽媽，07年誕下小公主李晞彤，她的幸福之路令城中不少女性艷羨。
《Face 》圖片
06年12月徐子淇04年被踢爆與李家誠拍拖，開首時二人例牌否認，隨後二人戀情逐漸明朗，子淇更得老爺李兆基歡心，批准她正式入門。06年12月在悉尼辦了場世紀童話式婚禮，盛傳四叔對新抱非常闊綽，包辦婚禮使費外，還預備4億禮金、兩個市值近1億的富匯豪庭相連單位、一個中半山惠園四千五百呎單位及價值半億珠寶給子淇作結婚禮物。
07年7月徐子淇為李家誠誕下囡囡李晞彤，李家上下開心不已，李家誠即贈價值500萬的法拉利612Sessanta 跑車作生女獎勵，並配以8萬元投得的「I O U 」車牌表達愛意，再送五千萬珠寶首飾，對太太愛護有加。至於老爺李兆基更認為小公主是觀音化身，於10月在中環四季酒店連擺兩日豪華「發實宴」，估計花費達6千萬。
第一胎補品催谷07年徐子淇首度有喜時，胃口無乜點變，除咗初期出現害喜現象，日嘔夜嘔外，經常進食的都是貴價補品。事關李家上下見子淇嘔得厲害而非常緊張，擔心個胎吸收唔多，為催谷胎兒長肉，日日要子淇狂隊燕窩，湯水、補品、鮮奶，全是高蛋白質及高營養，點知催谷之下實際得益者是大肚婆，令子淇在懷孕初期體重已急升廿多磅，懷孕4個月，身形卻像6個月般龐大。
