多得今年《翡翠歌星賀台慶》搞搞萬聖節新意思，唔係我估36歲的古巨基一世都唔會同17歲、08年樂壇新人鄧紫棋撞衫，同樣扮埋哈利波特。不過，對哈利波特，肯定是鄧紫棋感情更深厚：「由細到大都迷哈利波特，最想做哈利波特女朋友，成日幻想自己係妙麗，可以日日喺哈利波特附近呀嘛。」
夢中情人係哈利波特？冇錯！唔到我唔認老。
鄧紫棋，英文名G.E.M.（讀音Jam ），1991年8月16日出生，同麥當娜、王菲、鄭秀文、薛凱琪一樣屬獅子座，星座話有做明星的特質。
不過未出道，靚聲已在學界歌唱比賽身經百戰，更是比賽表演嘉賓紅人。連陳奕迅聽佢唱〈Loving You 〉（為陳奕迅母校聖若瑟書院歌唱比賽做嘉賓，陳為台下評判）都話「不得了」；資深DJUncle Ray 又話唔好被唱片糖衣包裝欺騙，唔聽走寶……你聽咗未？
不為名不為利不為發明星夢也不為嫁入豪門，我老人家思想，覺得叉隻腳入娛樂圈，踩這潭污水為乜？
17歲的小朋友唔係咁諗：「我開頭以為做歌手淨係唱歌，原來除咗唱歌，有得扮靚影相又有得周圍去做訪問，好似今日咁，又有得嚟迪士尼影相，一嘅都唔悶，好好玩喎！」
鄧紫棋話，最早追溯到幼稚園年代的功課「我的志願」，就是寫長大要做與音樂有關的工作。今天卻真的夢想成真，最緊要嘅point 係，唔悶——已經是她的Neverland 。
簡單真好！9字頭出生，真好。
我個顎骨先天有問題，上下牙合唔埋講嘢會漏風，要大個嘅先可以做手術矯正，佢哋唔知咁多，會話我特登
晒咁扮外國人講嘢。
G.E.M.鄧紫棋在上海出世，婆婆是唱歌老師，公公吹色士風，媽媽在上海音樂學院畢業，名副其實的音樂世家長大，理所當然地6歲學琴，13歲已經考獲八級鋼琴，然後自己學寫歌、作詞，幾乎參加所有大小校際音樂比賽嗱晒冠軍，16歲在另一校際音樂活動中遇見現在的經理人張丹（即Soler 前經理人），正式入行。中學讀油麻地真光，會考21分，現在正職是演藝學院聲樂系一年級學生，副業是2008年度樂壇新人。有5首歌的處女EP 《G.E.M.》推出一個月，5,000存貨經已售罄，正在加印中。唔好睇小呢5,000小量，好賣過好多篤數天王天后。
屋企人嘅音樂事業同我入咗流行樂壇係兩回事。開頭佢哋都驚，驚公司會唔會迫我行性感囉、驚影響我讀書囉，叫我千祈唔好學壞囉。
不過媽咪都知我唔會學壞。我做過最壞嘅事，應該係放學走去行街，成7點至返到屋企，跟住呃媽咪喺學校綵排囉……唔怕，你寫出嚟啦，都係中一發生，我諗媽咪唔嬲
。呢行好複雜……我諗我遲鈍，真係唔覺。嘅friend 好驚我俾人呃，話呢行好複雜喎……我又唔驚，我咁大個女都冇俾人呃過，都冇咩好俾人呃啦！
公司都驚我細個亂講嘢講錯嘢，所以有搵老師教我講嘢。我份人可能講5分鐘，有3分鐘都係廢話，老師會叫我每次做完一個表演，返屋企即刻寫番有乜感想，下次做訪問咪唔會唔記得有咩想講，會有多嘅內容。
我最崇高嘅理想就係我個名，G.E.M.，即係Get Everyone Moving 。希望我嘅歌有人會10年後都仲記得囉！
36歲古巨基與17歲G.E.M.齊齊喺《翡翠歌星賀台慶》扮哈利波特，不過前者不停出鏡、後者參與舊歌medley 過鏡三分鐘咁大把，話晒係新人，條路有排行呀！
15歲在校際音樂活動做嘉賓唱〈Loving You 〉，海豚音讓評判陳奕迅亦驚訝：「呢個女仔第時不得了！」
因為舊男友，學識扮金魚，除咗成為個人icon ，更深層的意義還有1：與陌生人打破隔膜；2：以肥金魚娛人亦掩飾自己的baby fat 。
魚樂無窮鄧紫棋說，17年人最悲慘的事，原來只係3歲嗰年由上海移民嚟香港，唔可以再成日見到湊大佢嘅公公婆婆。我話咁邊算慘，入娛樂圈第時大把嘢唔到你控制，更加慘絕人寰喇。
睇八卦雜誌，我見好多負面新聞，嘅人回應都係：「唔係真嘅，唔care ！」我so far 未遇到負面新聞，不過見人哋都係咁講，又唔擔心喎。
網上又唔同，好多人講嘢都唔負責任，仲負面啦。比如話我成日扮金魚，佢哋又話我扮cute ，其實呢行做嘢成日都遇喺嘅陌生人，扮金魚最緊要都係引人笑、打破隔膜啫，最緊要扮咗金魚，人哋就唔介意我塊面肥呀嘛；同埋呢，我個顎骨先天有問題，上下牙合唔埋講嘢會漏風，要大個嘅先可以做手術矯正，佢哋唔知咁多，會話我特登
晒咁扮外國人講嘢。俾人誤解，初初都唔開心，不過一陣就冇事啦，喊都冇喊過。
我對壓力呢樣嘢，感覺好遲鈍，連會考都係臨考前一日至識驚，做呢行，而家都唔覺有咩壓力。不過最驚要做戲，我嘅戲真係好屎！試過幫TVB 拍建造業訓練局短片，同個男演員繑住手行，都鬼咁唔自在。拍MV 又係，導演叫我做個迷惘樣出嚟，我以為我好迷惘啦，點知做完俾導演勁鬧，話我做個嬲樣畀佢做乜喎！我份人好短視，未來真係冇咩擔心，唔驚賣唔到碟、唔驚俾人呃、唔驚紅唔到，最驚就係要搵我做戲！
我獅子座最唔抵得人哋命令我
出碟前經理人公司安排喺朗豪坊、apm 等商場不定時表演，不少粉絲都係商場駐唱年代累積，陳年短片而家喺YouTube 收視亦高企。
喺住油麻地真光女校旗袍的G.E.M.，中學年代因為唱得彈得，係學校風頭躉。
08年度樂壇女新人叫人印象深刻的冇乜幾個，阿G.E.M.以外，另一位大熱就係樣靚過聲嘅JJ （賈曉晨）。
人細鬼大喺YouTube ，我見好多人點G.E.M.嘅〈等一個他〉同〈Where Did You Go 〉嚟聽。呢頭讚G.E.M.唱得好、嗰頭又彈佢人仔細細唱情歌作狀。咩時代呀？家吓嘅小朋友17歲人都未拍過拖，點出嚟見人？唔只拍過拖，原來〈Where Did You Go 〉仲係阿G.E.M.寫畀前男友添！
中學我喺油麻地真光讀。都話我遲鈍㗎啦，中一嗰陣，聽講高form 有lesbian ，到我讀高form ，又聽講低班有lesbian 喎，但係我就從來都冇見過。好多同學都係短頭髮男仔頭，我都唔識界定邊個係TB 。
我中三就拍拖啦。嗰個男仔喺校際歌唱活動識，大我兩年，唔算靚仔，似林俊傑（台灣歌星）。我扮金魚都係學佢，我見佢周圍扮金魚撩人，但來來去去都係一個金魚樣，我鑽研咗，設計咗唔同表情嘅金魚，仲有喜怒哀樂添，幫佢發揚光大。
我係獅子座女仔。佢係唔信星座運程但絕對相信星座性格嘅男仔，佢追我前研究過我嘅個性，上網研究埋點樣同獅子座嘅人溝通，跟住先send 個SMS 畀我：「Be my one and only girl ！」我獅子座最唔抵得人哋命令我，咪答：「你命令我呀？獅子座嘅人最唔鍾意俾人命令！」佢就話：「咁就等我做被命令嗰個啦！」我哋就係咁開始。
拍咗拖兩年分手，我寫首歌〈Where Did You Go 〉就係講我哋呢件事。開始拍拖，講十個鐘電話都唔會厭……慢慢，會變得連5分鐘都嫌多，好似受罪咁，名義上有個男朋友，其實同自己一個人又有咩分別？
我梗係恨拍拖啦，我都會睇愛情小說，睇偶像劇。追《惡作劇之吻》嗰陣迷鄭元暢、到睇《花樣少男少女》就覺得吳尊最正。我希望我男朋友好似《惡作劇之吻》入面嘅江直樹（鄭元暢飾），平時唔聲唔聲好cool ，但當有人喺佢面前詆譭湘琴（林依晨飾）嘅時候，佢就會好有型咁話：「湘琴再不好也比你好一千倍！」
17歲，應該是這樣的。
濕吻有首歌叫〈睡公主〉，不過她這個睡公主唔願醒，寧願訓夠一百年，可以發個好夢見到夢中情人。
G.E.M.：「呢世人拍拖，我都唔會揀圈中人，見到男朋友同第二個親熱，我真係超級介意！」
我：「咁如果你要同人拍親熱戲呢？」
G.E.M.：「我唔得㗎，我連拍嘢同第二個人掂一掂手都介意㗎……好彩我嘅MV 未有男主角啫！」
我：「咁你拍MV 嘅底線係咩？」
G.E.M.：「唔……最好唔好濕吻囉……」
此話一出，全場爆笑，經理人帶頭笑：「你諗多咗啦，冇人諗住叫你濕吻喎！」
我：「咁如果搵你拍《惡作劇之吻》呢？男主角係鄭元暢呢？」
G.E.M.：「吓……我都想試吓拍偶像劇……俾鄭元暢咀？唔知呀……經理人畀就拍囉……」
唔怪得之G.E.M.成日話驚拍戲，原來真正驚俾人咀，不過少女懷春，對手戲同鄭元暢又另計。
