馮仁昭四圍超講完數關係依然緊張 大劉未熄火呂麗君笑唔出
富豪劉鑾雄（大劉）前日同呂麗君喺佢嘅灣仔華置總部密會13分鐘，似係講數，噚日兩人又各自活動，大劉喺12點40分坐住佢架車牌「48」嘅座駕先返華置，差唔多到過陣，佢個司機仲衝紅燈踩油直去添。前日大劉架車就牛肉乾任抄，噚日就衝紅燈，當啲交通規例冇到咁，佢返到華置5分鐘唔夠，又再出車去灣仔萬麗海景酒店。大劉落車時仲躁躁哋同現場記者講：「你哋影還影、唔好撞到我！」食晏食到兩點半，大劉上車返華置處理業務，到5點35分，佢又出車返白建時道大宅。到6點11分大劉坐車出發到皇朝會，抵達皇朝會時，佢又同保安講：「攔住佢哋。」大劉阿媽就喺中午12點50分同個女劉玉珍去福臨門食晏，行到入福臨門大堂，劉老太巧遇一個潮州鄉里，兩人仲用潮州話傾偈，個鄉里問劉老太：「嚟食飯呀？」劉老太就應番佢一句。
呂麗君（中）噚日單拖去中環，戴墨鏡嘅佢木無表情？
紮馬尾嘅呂麗君噚日下午去中環安慶大廈，唔知係咪處理財務？
被嗌劉太冇反應
大劉胞妹劉玉珍（右）陪住阿媽去福臨門食晏。
另一邊廂嘅呂麗君噚日紮咗條馬尾，兩點鐘單拖坐車牌「67」嘅座駕，尾隨仲有部坐咗保安嘅七人車，兩點半抵達中環安慶大廈，直入停車場，安慶大廈嘅租戶律師樓又有、證券行又有、髮廊、蒲場都有，唔知呂麗君上去係處理投資財務定剪個靚髮？到咗4點左右，呂麗君離開，現場記者猛叫佢劉太，戴住黑超嘅佢木無表情，同早幾日個得戚笑容唔同晒，大批保安就用人海戰術護住佢上車。
大劉見記者影相就話：「影還影，咪撞到我！」
