拍拖行騷漏口風鍾嘉欣同林峯齊齊買樓
林峯和鍾嘉欣這對緋聞男女，在無線安排下奉旨以情侶檔上陣，他們甚有默契，表示有意在樓市低潮入貨，記者笑他們可以拍拖睇樓，鍾嘉欣竟快人快語說：「冇咁快。」嚇得林峯窒步。
林峯和鍾嘉欣昨日以情侶檔上陣，在九龍塘為一個時裝品牌擔任模特兒行騷，兩人在台上的演繹頗有心思，林峯親自為鍾嘉欣披上外套，狀甚溫馨。談到今次情侶檔的安排，林峯說：「其實今次都唔係第一次，不過多數喺外地行騷，香港反而多數各有各做。」
趁跌市買樓投資
林峯近日努力為視帝獎項拉票，連小朋友也不放過。
不少藝人表示受金融海嘯的影響，在黃金檔期的收入銳減，問到嘉欣和林峯有否受影響時，他們說：「而家嘅工作係好早之前已經落實，所以有冇受到影響，要到明年先知道。」不過，林峯有感近期樓價下跌，所以他有意置業，他說：「雖然有朋友同我講啲貴價樓跌幅會好大，但係我反而覺得貴價樓有升值能力，呢段時間我都會留意港島區嘅樓盤，睇吓有冇心水選擇。」早已做業主的嘉欣也有意趁樓價低換樓，有記者笑說兩人可以齊齊睇樓，嘉欣衝口而出地說：「冇咁快。」不過她隨即知道「講錯嘢」，面紅紅死撐說：「你哋聽錯咋，我係話點會呀。」在旁的林峯被嚇得退後了一步。至於會否拍拖睇樓，他們說：「我哋拍戲先會拍拖睇樓。」同是無線藝人的鄭嘉穎昨日則與樂基兒在銅鑼灣出席運動品牌活動。
樂基兒享受新車
樂基兒和鄭嘉穎已心有所屬，拍檔行騷當然不會過電。
早前樂基兒收到男友黎明送的瑪莎拉蒂跑車作為生日禮物，她說：「我好開心，好鍾意呢份禮物，其實佢又會揸我又會揸，大家share 。」問到黎明下月生日，樂基兒考慮送甚麼生日禮物，她說：「Cupcake 同balloon ，同佢搞個Cupcake party 。」樂基兒透露早前有欣賞Leon 演唱會，她續說：「我熄晒燈先出嚟坐，佢各方面都好好。」採訪：藍嵐、李珮洳攝影：林德雄、陳俊強
林峯昨日替鍾嘉欣披上風褸，狀甚溫馨。
