剛於上週六（8日）過26歲生日的阮經天，同日推出1萬5千本個人寫真集《ALOHA 阮經天正在夏威夷》，內有佢大大張半裸訓床冧樣相，都只係賣68蚊港幣。記者聽聞本港有唔少小天嘅粉絲專程飛到台灣入貨！
台灣靚仔小生阮經天今年認真行大運。自去年拍畢《我在懇丁天氣晴》後，小天（阮經天暱稱）即人氣急升，加上《命中注定我愛你》收視破晒紀錄，令小天人氣一時無兩，《命》劇而家仲播到去美國，唔怪得小天都
聲走咗轉美國啦！
月前忙到冇氣抖嘅小天，中、港、台四圍宣傳《命》劇，適逢夏威夷觀光局邀請小天去夏威夷走轉當宣傳當地的旅遊業，勁愛衝浪嘅小天又點會放過呢個大好機會？咁蹺小天此行入住嘅酒店，就連美國新任總統奧巴馬也入住過，真係分分鐘執埋總統嘅腳毛返台灣做手信都得呀！
自9月來港宣傳《命》劇後，阮經天便匆匆趕返台北，執包袱去夏威夷，影處男寫真《ALOHA 阮經天正在夏威夷》。
極速收身
今年8月小天參加「墾丁盃國際衝浪公開賽」時都仲有少少肚腩，估唔到易肥易瘦嘅小天幾個月之後就極速收身拍寫真，唔怪得佢對寫真銷量非常樂觀啦。
擘口沖身
玩完水梗要沖身，小天走埋去個生晒
嘅花灑度照頭淋，你睇佢呢張沖涼都口擘擘嘅相幾咁誘惑？粉絲未睇到寫真都一定流晒口水。
搣甩肥腩肉
剛於上週六（8日）出版的《ALOHA 阮經天正在夏威夷》，小天的寫真亦是與夏威夷觀光局合作的旅遊書，為影靚相，小天積極減肥，搣甩之前的肥腩，「我在當地品嘗過好多美食，但全部都是淡嘗啊！」
趕住衝浪
小天第一次去夏威夷，梗係第一時間去玩自己最鍾意嘅衝浪（滑浪）啦！有當地衝浪學院教練Howard （左）傍住，唔熟夏威夷水流嘅小天都放心玩。
呢本普通版封面已經有半裸阮經天睇，據聞台灣仲有款特別版，係影住小天浸響水入面嘅靚樣，唔怪得粉絲要專程飛去台灣入貨啦！
鬼仔好傾
阮經天英文不錯，所以跟教練Howard 相處短短幾日已鬼咁好傾。
整色整水
平時都好鍾意整古做怪嘅小天，嚟到夏威夷梗要跳番part 舞，不過佢只係著住件「夏老威」fing 吓手，應該學人跳吓草裙舞先得㗎！
住總統酒店
正忙於開拍新劇《敗犬女王》，雖然女主角人選還未定，不過上週曾傳出阿嬌會參演當配角！小天直認睇過阿嬌的淫照，不過他補充說：「她都是受害者，而且誰沒有過去？」小天更表示不抗拒跟她合作。
小天拍寫真期間，適逢美國總統大選進入最後階段，小天更專程跑去奧巴馬入住過的Kahala Resort 住了數晚，叨吓總統光，「我知道奧巴馬是在夏威夷長大的，我聽說他住過這飯店，所以今次我能夠入住也很高興啊，可惜未能跟他本人見面。」不如下本寫真去美國華盛頓取景，小天話唔定可以一睹奧巴馬風采嘅。
賣肉求榮
推出寫真唔係女星專利，台灣早就興男星寫真，仲本本熱賣，騷吓肌肉靚樣就有錢賺，真係使乜拍戲咁辛苦呀？
周杰倫《半島鐵盒》賣憂鬱
02年，初出道賣憂鬱型男路線嘅周董推出寫真集，有周董親自執筆嘅文采，又有周董憂鬱靚樣，當年一出就賣4萬本，成績不錯。
鄭元暢《元味暢快Party Set 》sell 娘樣
03年鄭元暢（小綜）推出第一本寫真集《元味暢快Party Set 》，當年賣脂粉娘樣，對未當紅嘅小綜，都賣到二萬本，台灣男星要搵錢真係唔難。
F4@Tokyo 破紀錄
F4出道時瘋魔幾多少女師奶，05年推出寫真就更加唔使講，四人合力吸客，當年便大賣50萬本，破晒男星出寫真集嘅紀錄，可惜此情此景不復再啦！
飛輪海《海色樂園》大塞車
去年7月，飛輪海響事業最巔峰嘅時期乘勢推出寫真集，當時飛輪海響西門町搞簽名會，一度搞到西門町大塞車，寫真更賣出超過10萬本，認真厲害。
