色慾女Charoltte 到40歲，終於肯嫁Mr.Big 。
擔當愛情信箱主持人，有時候像社工，遇到的問題大同小異，當事人又往往偏執頑固，不肯面對現實。以下的感情煩惱，比鼻敏感還普遍，如果不關你事，那實在要恭喜你。
王貽興
貽情盡興
1.身邊經常被大堆烏蠅
纏繞，似樣嘅又個個有女友，點好？
愛情不應該選擇一時的Best of the Worst ，即使是當時圍繞你身邊那堆人中最好的一個，在四十零分不合格堆里最似樣那個，可能也不過是五十幾分罷了，跟你真正理想的分數還有一段距離。假如你因為害怕寂寞所以選了，之後Dream Man 才出現，他看到你身邊已有另一半，可能就打退堂鼓，或者轉移目標，到時你就喊都無謂，不是天玩你，只是你自己嗱嚟。
兩害取其輕這種想法不適用於愛情。不是烏蠅
四腳蛇堆中蚊咬最唔痛，就寧願揀俾蚊咬。女人最忌降格相就，往後總會後悔。
2.明知男朋友出邊瞞住我沙沙滾，但因為我年紀已經唔細，好驚分咗手搵唔番第二個。
女仔成日就係因為怕搵唔到個更好嘅，所以先至將貨就價，求求其，就繼續一齊落去。但我可以好肯定話你知，往後，只會每況愈下。
唔試過又點知有定冇呢？好多女仔卅幾歲離過婚回復單身一樣可以愛得精彩，如果你已經將自己困響自己畫俾自己嘅粉筆圈入邊，冇人救到你，你嘅人生，早響你拎起粉筆嗰刻，已經完結。冇人宣判你死亡，係你自己判你自己死刑。
3.我男朋友係裙腳仔，成日黐住阿媽，咩都要問過阿媽……我好驚第時結咗婚要同佢阿媽住，或者佢阿媽失驚無神拍門上嚟。
裙腳仔對我嚟講，係同賭仔、爛仔並列三大谷底，你揀咗個裙腳仔，即使高大靚仔有錢有景，你仍然都可以咩都冇，無論你為佢做過啲咩，一齊幾耐，佢都可以因為阿媽一句嘢，而一腳踢開你，責任都唔負，冇仇報，就算你好彩嫁到俾佢，你都唔使旨意有個老公，因為，無論咩紛爭都好，你老公都一定唔會撐你，由得你俾睇你唔順眼嘅奶奶抽秤死。《Sex and the City 》入面Charoltte 同個裙腳醫生老公結咗婚有咩遭遇，你唔係唔清楚呀？
4.我同男朋友拍拖幾年，開頭佢都幾靚仔，幾多女仔吼，但佢依家接近三十，已經開始地中海同有肚腩，又成日飲酒打機打麻雀，點算？
有啲女仔覺得男朋友變成咁先有安全感，唔怕佢偷食，但其實，男人偷食同外表完全冇關，醜樣一樣會勁溝女。
響保養自己呢方面，男人的確係冇女人咁有心機，幾多個中年男人先出一個三哥苗僑偉？如果真係頂唔順，下次做運動拉埋佢去囉。你冇可能阻止佢打機飲酒打麻雀，「佬化」同「師奶化」都係香港男女步入中年嘅退化危機，係另類都巿流行瘟疫，好難免疫，如果你係師奶，你嘅另一半好難唔麻甩喎。
咩事幹男人會突然自發貪靚做gym ，又學人護膚呢？一定係因為佢睇中咗某個女仔，或者同某個女仔有啲嘢。作為女人，不可不察。
貽情盡興
