曼聯有C 朗拿度，英格蘭國家隊有禾確特，以為33歲有多嘅碧咸會安心留響美國發展，照顧吓新加盟美職聯嘅前Calvin Klein 內褲球星龍格堡啦！佢大哥果然厲害，趁一月美職聯收咧，竟然借用去AC 米蘭，拍住馬甸尼、舒夫真高、朗拿甸奴成班過氣球王組成耆英組合。揼低老婆仔女，一支公飛去米蘭，無非為咗keep 住狀態，搏卡比路繼續選用。
兩年前，將國家隊隊長臂章交俾泰利，以為碧咸無可能再踢世界盃？咁有鬥心，同個仔一齊踢多幾屆都仲得呀！
紅燈區鄰居
雖然有碧咸，洛杉磯銀河依然唔爭氣，聯賽榜排包尾，無份踢季後賽，一班球員提早收工。本來，咸哥可以留響美國陪吓老婆仔女，但係眼見卡比路執教英格蘭國家隊後，踢幾場外圍賽仲有選自己入隊，鬥心又返來了。假都唔放，去AC 米蘭客串三個月，仲已經租埋米蘭層樓，準備就緒。
趁一月未到，得閒，就陪吓老婆拍廣告做好好先生囉，何況Victoria 唔會跟老公過意大利住，即將要分隔三個月，都幾悶㗎！悶？聽講碧咸新屋就響米蘭紅燈區隔籬，AC 米蘭隊中又有識途老馬朗拿甸奴。大家忘記了碧咸效力皇馬期間，如何被朗拿度等巴西兵帶壞了嗎？
19號仔
上屆世界盃，英格蘭俾葡萄牙搞掂，然後麥卡倫接手，好似有仇咁唔選佢入隊。人人替碧咸拎唔到第一百頂喼帽而難過，無人諗過佢打算去到2010年成35歲仲要踢南非世界盃。
連前英格蘭名宿施路頓都開聲批評碧咸阻頭阻勢。咁又啱喎，左翼就話無人用啫，右中場，英格蘭有禾確特、有艾邦拉荷、艾舒利楊格、艾朗連儂，再唔係，謝拉特都可以踢，唔計商業價值，碧咸真係無乜可能再入選。
不過，唔好忘記，碧咸仲有招射罰球，英國傳媒已經開始估計卡比路仍然重用碧咸，就係以備不時之需，放佢響球賽尾段急起直追時射吓罰球。況且，碧咸都唔係阻頭阻勢，佢有提攜後輩喎，個後輩咪佢個仔囉，成日影到佢大仔Brooklyn 響比華利山練波，雖然未識七旋斬，仲跑跑吓要抖，非常失禮，但係表情神態的確有啲似老豆。只係唔明白，點解佢件波衫又唔係7，又唔係23，又唔係老豆響AC 件75，著19？
外太空
如果您喜歡這篇文章，請按「讚」或分享給您的朋友，以示鼓勵。
