英國著名球星碧咸（David Beckham）上周三到咗北京，今次佢去內地唔係為踢波，佢係為中超聯賽做推廣大使，短短5日時間，佢先後到過北京、青島同武漢等地。喺前日最後一日嘅行程，佢又返到北京，原本計劃9點喺北京大學演講，點知碧咸居然遲咗個半鐘頭。
大前晚當碧咸由武漢返到北京後，有朋友招呼佢去國貿附近某高檔酒吧消遣，仲見佢着返休閒服出現。酒吧門口有粉絲認得佢興奮尖叫，即刻要求合照，碧咸好爽快答應。
李冰冰前日陪碧咸去英國駐華大使館，當碧咸深情望住佢嗰陣，諗唔到見慣風浪嘅冰冰都有啲慄，證明萬人迷碧咸真係魅力沒法擋。
李冰冰怕醜
逗留咗個幾鐘頭之後，碧咸又同朋友轉場去咗三里屯附近一間KTV唱歌，唱足兩個幾鐘，唔知有冇唱佢老婆Victoria嘅Spice Girls歌曲呢？直到凌晨佢先肯返酒店休息，可能搞到唔知醒，第日趕唔切一早去演講。
演講完，佢喺中英文化交流大使李冰冰陪同下到訪英國駐華大使館，估唔到李冰冰見到呢位國際知名球星嗰陣都會有啲怕醜，證明碧咸真係魅力沒法擋。跟住碧咸又參觀咗宋慶齡故居，然後佢又同小朋友喺故居前嘅草坪踢波，跟住同小朋友一齊放和平鴿。忙完一輪，食咗少少嘢，佢就坐車去機場，準備搭飛機返歐洲啦！
此外，Victoria最近透過發言人公佈佢唔再唱歌嘅消息，佢嘅發言人話因為𠵱家Victoria嘅時裝事業好成功，家庭生活又好滿足，所以決定唔再唱歌，不過Victoria仍然話好鍾意喺Spice Girls嘅日子，仲祝福其他隊友㖭。
碧咸前晚由武漢返到北京，即刻約友人去酒吧蒲。
一場嚟到北京，碧咸忍唔住要去KTV見識吓。碧咸老婆Victoria最近公佈唔再唱歌嘅消息，仲祝福Spice Girls隊友。
from:
http://hk.apple.nextmedia.com/entertainment/art/20130326/18207214
