最近社交界熱鬧到爆，甘比、呂麗君爭大劉寵幸；小小超為Isabella 向楊受成開火，上流社會戲劇性拍得住電視台金裝長劇。
無線谷行千萬炮製的台慶劇《珠光寶氣》，擺明講上流社會爭餐懵，富豪名太熟口熟面有話題；由蔡少芬飾演，一心嫁入豪門但有米老公又忽然「穿櫃桶」嘅康雅思，令人容易聯想「落難名媛」傅明憲，就連陳豪飾演的貪玩富豪第二代賀哲男都有一啲小小超李澤楷嘅影子。可惜係監製戚其義寫上流社會生活有時眼高手低，上等人周啟邦就冷嘲偏離事實、製作兒戲。
葉劍波（左）的海域集團於06年爆煲，葉隨即人間蒸發，加上傅明憲嫁葉劍波後，早年喜歡蒲ball 場高調晒名牌靚衫，同蔡少芬個角色又幾巧合雷同。
蔡少芬似傅明憲
康家三妹康雅思（蔡少芬飾）貪慕虛榮，以為嫁著富豪楊志球（蔣志光飾），嫁咗先知老公周身巨債兼走埋佬。咁蹺名媛傅明憲老公葉劍波前年涉及10億元串謀詐騙案後一度失蹤，上年更因涉嫌串謀詐騙被捕。明明跟康雅思同病相憐，藝人出身的傅明憲就話自己冇睇過《珠》劇，「我冇睇過套劇，所以乜都唔知唔想答。」
92年，小小超因接受CNN 的日籍女記者真正加留奈（右）訪問而撻著，無獨有偶，《珠》劇（右圖）陳豪於上海一間餐廳內遇上正採訪嘅女主播陳沛嘉而一見鍾情拍拖，有錢仔愛上女主播，上流社會例子唔算多喎。
陳豪似小小超
含住金鎖匙出世的賀哲男（陳豪飾）自信過人，常有美女投懷送抱。有次坐私人飛機去上海食晚飯冧女，同場遇到靚女主播即晚跟對方撻著，橋段有小小似多年前小小超李澤楷力追日籍女主播真正加留奈，不過陳豪就唔認角色係「參考」小小超，「真係冇特別參考邊個，我都識啲上流社會朋友㗎。」
劇中于洋經常左擁右抱，為人又孤寒，真係似足出名精打細算嘅花花公子趙世曾。
趙式芝
劇中宋世基有多位青春女友，佢仲特登拎條鑽石鏈畀唐青揚（姜大偉飾）再鑲巨鑽畀新女友戴，作風似足趙世曾喎！
于洋老翻趙世曾
玩世不恭的宋世基（于洋飾）身邊女友青春無敵，講明首飾只會借畀女友而不會送畀女友，鑽石鏈仲會循環再用，同出名愛溝女、又常借首飾畀女友戴嘅卓能主席趙世曾作風差唔多，就連佢個寶貝女趙式芝都話似，「哈哈，都係反映社會現實啫，（係影射佢）都冇所謂啦。」
Mani 以強悍形象保護英皇旗下明星，咁啱《珠》劇中女經理人邵美琪又係訓身保護旗下女藝人蘇敏（岑寶兒飾），又會咁似嘅？
邵美琪參考Mani
康家大女康雅言（邵美琪飾）事業心極強，為經理人公司高層，專門調停一切娛樂新聞，及用盡一切方法為旗下藝人傾成合約，邵美琪直認有參考英皇經理人霍汶希（Mani ）：「監製阿戚（戚其義）叫我參考吓而家嘅經理人，於是我就諗起Mani ，佢講嘢同談吐都好果斷，外形夠晒職業女性。」
楊受成（右圖左）跟彤叔（右圖右）等富豪關係要好，《珠》劇中林保怡又喜愛傍實富豪岳華，不過楊生就冇保怡咁財大氣粗，而林保怡亦後生過楊生好多。
林保怡：唔係抄楊受成
而一朝得志嘅高長勝（林保怡飾）為娛樂公司老闆，靠揸鑊鏟起家，有做廚出身後靠炒樓發
的東方明珠主席黃坤影子，不過由於高長勝經常埋超級富豪堆，令部分人聯想起跟鄭裕彤等富豪關係要好的英皇老闆楊受成。但林保怡就強調角色和楊受成無關，「我係想演大細路，比較躝癱、衰衰格格嘅性格，而且行為比較粗鄙嘅富豪，絕對唔係抄楊生。」
周啟邦
渣帆船
嘲儲鞋
平車牌
邦邦插《珠光》兒戲
一百萬投車牌、三百幾萬投鑽石，呢啲對富豪來講根本只係使「大餅」。呢啲似豪非豪嘅《珠》劇場口，連曾經登上《世界名人錄》嘅社交名人周啟邦，都話劇中兩大富豪陳豪同林保怡嘅賽艇好兒戲，「我家族都有幾隻遊艇，唔係咁嘅普通帆船……我後生都係同朋友出海，請主廚煮晚飯，未玩過呢類艇。至於儲鞋嗰幕，我哋儲嘅只有皮草，仲用雪櫃雪住囉！」被名人取笑，陳豪就力撐拍戲還拍戲，唔可以同周啟邦相比，「佢見識大啲嘛，點同我哋呢啲見識淺。多謝佢意見，有下一輯我哋會更上一層樓㗎喇。」
至於劇中陳豪叫手下同蔣志光爭投嘅「MA CHER1E 」自訂車牌，同于洋競投的380萬鑽石，趙式芝亦話呢啲數目響上流社會嚟講只係濕濕碎，「吓？呢啲經常發生，只係等閒事嚟啫。」
梗係啦，今年年初「18」號車牌就創出史上最貴的1,650萬，既然拍劇就交足貨，咁先夠珠光寶氣嘛，否則真係變成珠光「霉」氣。
