金融海嘯席捲全球，導致不少富豪名人身家大縮水，香港股市也不能倖免，已由高峯期的30,000多點跌破12,000點，昨日收市報11,015點，一日便跌了1,602點，令不少市民損手離場。不過香港演藝界仍有一批敢死隊勇於在這個時候入市，憑邦民廣告而人氣急升、現年19歲的嚫模Kama （羅凱珊）、Angelababy 、袁詠儀、周美鳳及呂良偉等，均認為現在宜趁低吸納，準備買入優質股票。但鄺美雲則勸股民不要衝動，指現在還不是入市好時機。 採訪：林妃、葉雪
《進攻派》
邦民女：跌定即吸納「我喺股票市場都贏過錢，不過金融海嘯前，我已經將手頭上嘅股票放走，清光晒啦！而家個市跌到咁殘，我都心郁郁想入市，但唔知係咪岩嘅時機，所以都係睇定啲，好似匯豐（005）我就好心儀，等跌定之後，我會
晒副身家買呢隻大笨象股票。」
Angelababy ：蝕緊唔擔心
「上個禮拜五我用22蚊價錢買咗中人壽，諗唔到一開市就跌，收市報16.7蚊，真係諗唔到，雖然而家係蝕緊錢，但呢隻係好股，所以我都唔會太擔心，暫時就唔會再入市，因為都唔知幾時先見底。」
呂良偉：分五段入市
「今次金融海嘯，我好彩冇受到波及，因為幾個月前已經有高人指點，叫我放晒啲股票同埋樓，今日雖然跌到去11,000點水平，但我認為會跌到9,000點，不過而家已經有啲股票跌到超值啦！我會分五個階段入市，而家先買少少，到跌至10,000點再開始入，只揀藍籌股同實力股票嚟買就好穩陣。」
施念慈：即蝕幾十萬
「上個禮拜五我見個市已經跌穿14,000點，所以我
聲入咗建設銀行（939）、中國銀行（3988）同中信泰富（267）三隻優質股，點知今日
醒會咁大鑊，個市係咁冧，我都唔理咁多，全部劈晒出去啦！離場唔見咗幾十萬，肉痛死我，幾日唔見咗幾十萬，我會再等中移動（941）落去，45蚊就入貨。」
周美鳳：今日買貨呀
「今日買貨呀，星期三期指結算，預咗向下㗎喇，如果（投資）資本係十成嘅，今日第一輪可以買三成先，我今日都入咗中人壽（2628），我覺得而家可以分段入貨，第二輪就會入匯豐（005），我等匯豐再跌低啲先掃。舊年accumulator （累積認購期權合約）一年期嘅，最後過批11月到期，接貨個啲都接得咁上下，遲啲應該唔會跌得太厲害，巴菲特都話可以買啦。不過，而家個市好亂，都要睇實美股走勢，如果今晚跌落7800，咁就有排跌，到時再諗喇。」
袁詠儀：可以接平貨
「個股市都應該跌得差唔多，我覺得可以接平貨啦！好似中移動（941）同中國人壽（2628）我都好鍾意。呢兩隻係優質股，中人壽最高峯去過成53蚊，而家跌到16.7蚊，你話係咪好抵買？不過買股票最好都係用多餘錢，千祈唔好借錢買股票，只要有彈藥，就算而家揸住啲優質股輸緊錢都唔怕，總會升番上嚟嘅！」
《穩守派》
榮雪梅：改買內地樓
「我之前講過，今年都唔買股票喇，之前買落嘅大藍籌，就由得佢擺，冇乜所謂啦，大家定啲嚟，唔好自己嚇自己。而家都係睇中國㗎喇，我岩岩去完四川睇樓，內地個市唔好，好多發展商頂唔順，我喺成都買咗唔少爛尾樓同地盤，用現金買，可以低過半價，好抵。我諗住放長線，擺佢五、六年。」
鄭伊健：個市好波動
「股市大跌前我已經冇貨喺手，所以冇乜大損傷，呢個時候我都認為未係入市最佳時機，因為個市仲係好波動，雖然匯豐都跌破100蚊，但我唔會入住，雖然我都好鍾意呢隻股，但我會睇定啲先入市。如果而家做緊大閘蟹嘅朋友，唔使太灰心，希望在人間，如果守得住，個市遲早會升番上去。」
鄺美雲：現金最升值
「亞洲金融風暴都跌到7,000點，而家全球金融海嘯，我諗有排跌，唔好咁衝動，而家現金最升值，唔買就冇損失，因為仲有好多危機。我冇損手，而家咁樣唔會入市住，低處未算低，呢個時勢冇條件升番，所以一動不如一靜，我就等到8,000點先再入貨。」
薛家燕：蝕一半身家
「我有買股票、基金、掛鉤股、債券同內地股，但係全部都跌，我唔見咗一半身家，不過比起商家朋友唔見成億上落，我只係小事，不過我都好心痛，因為係血汗錢，真係好心寒。我唔會趁低吸納，睇定啲時機先，好在我有預咗筆錢買樓冇蝕到，我信香港根基好，銀行架構好，不過明年再咁就返去內地發展好。」
邦民女
