上周六（10月18日），蔡少芬接受本刊訪問時，堅稱唔續約是經理人Helen 的意思，她只是尊重對方的決定。今年6月初，蔡少芬突然在她主演的電影《同門》煞科慰勞宴上，宣布不再跟合作12年的經理人Helen （陳美玲）續約。當時她聲稱因不想加重患上女性重病的經理人負擔，所以嘗試學習照顧自己。
但本刊卻收到消息，指Helen 今年4月向旗下藝人宣布因身體不適，希望減輕工作量後，蔡少芬和好姊妹陳法蓉為怕對日後工作有影響，即時密謀飛起Helen 不再續約。
上周六（10月18日）晚，蔡少芬出席新劇《珠光寶氣》宣傳活動時還辯稱，當日是經理人Helen 主動提出不再續約。但本周三（10月22日），Helen 親口對本刊記者表示，她並非身患女人重病，更否認曾主動提出不再跟蔡少芬續約。
今年6月，蔡少芬出席電影《同門》煞科宴時，講到自己好偉大，唔想令Helen 咁辛苦，先至唔續約。《蘋果日報》圖片
經理人Helen Helen 接受本刊訪問時，仍處處維護蔡少芬，形容兩人的關係只是身份上的不同，「以前係工作嘅家人，依家係信仰上嘅家人。」
蔡少芬（Ada ）自12年前離開無線後，便簽約Helen （陳美玲）旗下的「L&P 」（誠信）作為經理人。其間無論面對與大劉（劉鑾雄）的緋聞或親母欠賭債難題，Helen 都一直支持她。近年蔡少芬事業一帆風順，98年更憑《妙手仁心》奪得「無線我最喜愛女主角」，經理人Helen 亦功不可沒。
想不到蔡少芬竟不念跟Helen 多年恩情，今年4月Helen 向旗下藝人宣布因身體不適，蔡少芬即表明6月約滿後不再續約。6月初出席電影《同門》的煞科慰勞宴時，她以不想加重患上女性重病的Helen 壓力為理由，宣布回復自由身。
上周六（10月18日）晚，蔡少芬出席新劇《珠光寶氣》宣傳活動，本刊記者再次問她上述傳聞，她辯稱當日是Helen 主動提出不再續約，「當日係佢嘅決定，我唔會主動離開公司，但係冇辦法啦，佢身體有事，我都係時候長大。」
一個月前，沒有經理人的蔡少芬，惟有邀請前助手陳若蘭幫手接洽工作，蔡說：「呢幾個月真係出晒事，因為我唔係好識同人哋傾價錢，搞到10月大陸有個電視劇、兩個廣告加埋4、5個活動接唔到，咁岩若蘭（前助手）未搵到嘢做，咪試吓同佢合作囉！（有冇諗過搵番Helen 幫手？）唔可以咁嘅，有事又要搵番佢！（會唔會考慮簽無線？）我慣咗咁大自由度，唔知適唔適應啫！」
蔡少芬和陳法蓉跟Helen （後排左一）多年來在公在私都關係密切，05年三人為教會姊妹黎美嫻（前排左一）的婚禮做姊妹，同場還有羅慧娟。
好姊妹一齊走 感情要好的蔡少芬與陳法蓉齊齊飛起Helen ，不過陳法蓉泊到油王朱明呢個大碼頭，應該唔似蔡少芬咁急急要搵過第二個經理人。
經理人：我冇患重病本周三（10月22日），本刊致電Helen ，她即否認身患重病，「其實我唔係咩重病，只係嘅都市病，醫生話可能工作壓力大，搞到成日失眠、胃痛、腰骨痛，仲成日感冒發燒，再咁樣做嘢法，真係怕會搞出大病，所以醫生建議我減少工作。」
Helen 經過詳細考慮，今年4月逐一跟旗下藝人講希望減少工作，「我對個個藝人都係咁講，因為怕影響到佢哋嘅發展，不過肯定唔係叫佢哋唔好續約。」至於蔡少芬同陳法蓉唔續約，她說：「佢哋咁岩6月約滿，話想試吓自己照顧自己。（會唔會覺得佢哋好無情或者反骨？）呢啲我唔講啦！大家有緣認識，冇話邊個欠邊個嘅。」
執黎姿二攤Helen 還承認曾主動邀請樂易玲幫忙照顧對方，「我希望佢哋好。（Ada 知唔知呢件事？）又唔係咩託孤，唔需要講俾佢聽。」本周二（10月21日），樂易玲接受本刊電話訪問時，亦承認Helen 曾接觸過她：「我都同Ada傾過，暫時未有結果。（依家黎姿退出，會唔會喺緊嘅簽番Ada ？）唔係冇咗邊個搵番邊個嚟填，依家Gigi （黎姿）接唔到嘅工作，我都介紹俾Ada 。」
樂易玲認密斟中樂易玲表示現階段正跟蔡少芬傾簽約，「我同Ada 關係向來好好，就算合作唔到，關係都唔會改變。」
剛剛榮升做老竇的吳鎮宇雖然為仔停工一年，但他亦沒有打算離開L&P ，「我同Helen 識咗十幾年，佢做唔做對我冇影響，我都減產咯！」
跟Helen 合作了14年的朱茵，表示跟對方合作愉快，「我哋合約仲有一段時間，總之我哋會慢慢傾，我好尊重Helen ，續約問題到時再決定。」
對於Helen 因病減輕工作，錢嘉樂表示會與經理人共同進退，沒有想過離開。
患難見真情Helen （陳美玲）L&P 經理人公司的藝人原本包括陳法蓉、蔡少芬、朱茵及錢嘉樂。而吳鎮宇、鄧萃雯、原子鏸、梁小冰及陳嘉輝等人則跟Helen 簽了代理人合約。而到目前為止，只有蔡少芬聯同好姊妹陳法蓉於6月約滿後齊齊飛起Helen 另覓新經理人，其他人則維持原狀。採訪、撰文：娛樂組
攝影：葉兆康、邢華、李啟慰、招景德
