街頭連體 短短5分鐘嘅等車時間，應采兒同小春都似足連體嬰，就算小春雙手插袋，應采兒一樣擒到實。
繼「溝女王」洪天明同「蒲精港姐」周家蔚玩求婚之後，圈中又有一對「估你唔到」嘅戀人公開結婚宣言。早兩星期應采兒接受有線《主播會客室》專訪，除大讚現任男友陳小春係一個好老公外，更發表「兩年內嫁硬小春」嘅宣言。
上月底小春與應釆兒拍住拖去北京出席老闆向華強投資的酒店開幕活動。9月26日，這對連體戀人在北京市遊街示眾，等車時應采兒都唔放過機會，十分癡纏擒實小春。
好明顯25歲嘅應采兒已經食硬41歲嘅小春。10月10日，小春親口承認有結婚打算，除咗愛情嘅魔力令浪子小春喪失本性外，原來老闆娘向太都曾經對小春施壓。究竟小春會唔會成個老襯，從此被困呢？
捉頸錫
9月26日下午2時左右，陳小春與應采兒步出北京「莎瑪公寓」，應采兒突然一手捉住小春隻右手，另一隻手強拉小春條頸，繼而肉緊地錫咗小春一啖。
胸貼背
啜完男友塊面，應采兒從後拖實小春雙手，成個人依偎住男友個背脊，個樣仲好陶醉。
向來見到記者都非常火爆嘅陳小春，10月10日接受本刊記者訪問時表現得很溫和，表示有意成家立室。
在「鹿港小鎮」吃完午飯，兩人在街上旁若無人拖手散步，應采兒又纏實小春，慌死男友會逃走一樣。
之後兩人去了三里屯附近專賣翻版碟的店舖，小春在內睇碟期間，應采兒及兩名男助手則在店外閒聊。
這日的節目非常緊密，一行人去完按摩再到「沸騰魚鄉」吃晚飯，晚上10時離開，小春還揸相機幫女友拍照留念。
一向玩世不恭，憤世嫉俗的陳小春，自公開與應采兒拍拖後，即爛仔變乖仔，除咗肯為女友戒煙之外，就連以前愛蒲夜店嘅嗜好都搣甩埋，甘願為女友改變。
向生請去旅行
9月25日晚，「中國星」老闆向華強與太太陳嵐投資9億的酒店式公寓「莎瑪公寓」於北京開幕，向太親自出面邀請鞏俐、李連杰、曾志偉等多位好友出席之外，「中國星」旗下藝人小春、與甚得向太寵愛嘅應采兒亦拍拖出席。今次向生花過百萬包機票食宿，小春同應釆兒當然唔會即日來回，實行響「莎瑪公寓」纏綿多幾日。酒店開幕翌日，小春與應釆兒在北京市遊山玩水，一日食足三餐仲去埋按摩，晚上10時許才返回酒店休息。
當日應釆兒與小春形影不離，即使有兩名男助手跟身，兩人照樣親熱。下午2時在酒店門外等的士外出時，應釆兒一直從後熊抱小春，個樣非常冧，小春亦一臉受落，應釆兒仲用兩手擒實男友。
向太視應采兒係契女，最初知道佢同小春拍拖都有啲擔心。
向太曾訓話
其實應釆兒除咗擒功了得令小春馴服外，原來向太都有幫口。據知情者透露，「向太知道應采兒拍拖一向非常投入，驚應采兒太過認真會被傷害，所以向小春訓話，叫佢唔係認真就唔好同應采兒一齊。依家見小春成個人唔同晒又溫柔咗，向太都好放心。」
本周一（10月20日），向太透過電話回應：「佢（應釆兒）冇同我講喎！(聽聞小春好爛玩同花弗，怕唔怕應采兒會俾佢玩呀？)唔會！我覺得佢哋好認真，小春乖仔又孝順，好顧家，應該唔會對采兒唔認真，不過一日未結婚都仲未知。(咁妳有冇同小春訓話叫佢對采兒好啲？)到佢哋真係結婚，我會再同佢講。」
平時見到記者好似食咗火藥嘅小春，10月10日見到記者時竟然一反常態，對於與應采兒兩年後結婚一事，他春風滿面笑說：「你一嚟就問啲咁哽嘅問題！其實我都有諗過結婚嘅。（咁你求咗婚未？）我哋依家好好，不過未係時候。（向太有冇叫你對應采兒好啲呀？）呢啲嘢唔答啦！」睇見小春甜到漏嘅樣，呢次都應該係認真喇掛！
10月9日齋爆一支公
應采兒身在國內拍劇，冇拖拍嘅小春獨留香港生活苦悶。10月9日下午3時，小春到大埔一間麵店食完麵，再走去附近超市買牙膏、沖涼液等日常用品。
10月10日飲涼茶下火
呢日小春再去前一日幫襯完嘅麵店食麵，之後揸車去沙田仁安醫院探病，再到尖沙嘴飲涼茶，唔通佢覺得自己好熱氣？
