10月23日，周四。恒生指數跌506.11，收13760.49，成交564.59億元。10月期指跌336點，收13770點。期指倒掛現象消失。
中國神華（1088）跌7.6%，收13.2元；招商局國際（144）跌9.4％，收16元；中海油（883）跌8％，收5.36元；中信泰富（267）最低見4.35元，升1.8%，收5元，微升9仙。大淡不出三天，中信泰富經過三天拋售後，喺4.35元搵到支持；中國鋁業（2600）跌8.8％，收2.9元；合和實業（054）每股派息3.3元，因公司現金充裕，升4.7%，收22元；東北電氣（042）發盈警，預計首三季蝕300萬元人民幣，跌1.3%，收0.355元；利豐（494）跌12％，收13.44元。
紅底股愈來愈少
恒指三年內首次跌破14000點。滙控（005）亦出現2003年8月以嚟首次跌破100元，收市時收復部分失地，重返100元之上，成為股市內少數紅底股，今天股價喺100元之上嘅股份已極少。恒指去年10月高位31958.41，P/E二十二倍，今天收市13760.49點，P/E只有九點三倍。市場信心太低，冇人知道危機喺幾時結束。熊市第三期恒指P/E一般都喺八倍之下，最低係1974年12月更低至六點三倍。淡市莫估底，低點出現後一個月先知道。
根據世界經濟論壇（World Economic Forum）嘅一年一度銀行安全報告，瑞士由世界第一位跌至第十六位；英國由第四位跌至第四十四位；美國由頭幾名跌至第二十四位；香港仍然保持第十一位。即今年香港銀行較瑞士、英國及美國銀行更安全。
瑞士第二大銀行瑞信宣布，第三季喺證券投資上蝕咗17億瑞郎、淨虧損12.6億瑞郎。股價一度下跌7％，收43.44瑞郎。今年股價共下跌36％（同期歐洲銀行股指數跌54％），即表現較同業出色。
油價跌5.84％，收66.75美元，呢個係去年6月13日以嚟最低。明天油組開會，市場當油組冇料到。
香港通脹率9月份上升3％（8月上升4.6％），主因係政府補貼電費及減免廉租屋租金；食物及能源價格亦回落；如唔計上述因素，9月通脹率6.1％（8月6.3％）。
8月香港人民幣存款亦減少7.7％，至711億元，係2004年2月以嚟最大跌幅。估計未來十二個月人民幣喺6.69至6.87元兌1美元上落，變化唔大。消息話中國將進一步減0.29厘，令貸款利率降至6.66厘，因9月CPI只上升4.6％，係今年最細升幅。
滬深三百指數升0.08％，收1834.78。萬科升4.4％、保利升6.4％及東方航空升6.1％。今年滬深三百指數已跌66％，係亞洲區表現最差指數。
內地買樓首期由30％降至20％去支持樓市，但相信作用唔大。
日股跌5.2％，見8227.75，係2003年5月以嚟最低。澳洲、南韓及紐西蘭股市亦下跌。
英國9月份零售業係兩年內最差，按月下跌0.4％。與去年同期比較升1.8％。預料英國將減息，由4.5厘降至4厘，估計明年更降至3厘，令英鎊近日跌幅加快。
CRB指數（代表十九種原材料）跌4.51％，收266.14，係2004年9月8日以嚟最低。必和必拓股價跌8％，收24.91澳元；力拓跌15％，收66.97澳元。歐盟監管機構唔同意必和必拓以760億美元收購力拓集團，以免產生壟斷。
中國認為，明年鐵礦石出現供過於求，所有內地鋼鐵廠喺10月份冇獲利。熱軋鋼已由6月5日5957元人民幣回落39％；中國鋼鐵廠已開始減產，內地鐵礦石價格已跌至十九個月內新低。
CBA歐洲公司估計，喺原材料價格下跌壓力下，澳元仍可回落17％，見50.45美仙（家吓係66.85美仙）。現價澳元不宜睇好；今年澳元已由高位回落24％，南非蘭特、挪威克朗、南韓圜及巴西雷阿爾等跌幅較澳元大，今年澳元表現唔算太差。估計11月4日澳元再減息半厘，至5.5厘。
南韓股市回落7.5％，收1049.7，即本周已回落22％，今天一度停市三十分鐘（因下跌10％）。政府向證券公司、資產管理公司及其他機構提供資金，為鼓勵投資注入1300億美元，可惜股市仍回落。南韓圜跌3.4％，見1408.8兌1美元，過去三個月已回落28％。估計第三季GDP只上升0.6％（較一年前升3.7％）。南韓情況繼續令人擔心。
富國銀行可能中毒
雪茄伏加入奧巴馬陣營，計劃大選後重建美國金融系統（1979年年底佢上任後，成功控制美國通脹率）。不過，今年佢已八十一歲；加上家吓嘅情況較1980年時艱難好多，未知可唔可以重建世人對美國經濟體系嘅信心？
阿根廷股市出現近兩天最大跌幅【上圖】，共下跌18％。指數回落10.1％（昨天回落11％）。擔心另一次阿根廷危機出現。2033年到期8.28厘票面債券利率已跌至29.33厘。阿根廷政府宣布，把阿根廷嘅私人養老基金實行國有化，統一實施由國家經營管理嘅養老基金制度。養老基金體系喺1994年成立，目的係穩固資本市場。旗下持有布宜諾斯艾利斯證交所上市公司5%嘅股票，以及持有27%嘅可以公開交易股票。
美國大選後十一天將召開G20峰會，研究點樣處理金融危機。
股聖畢非德認為，Be greedy when others are fearful！我老曹卻認為，小心駛得萬年船。
美聯銀行公布，共蝕咗240億美元，都幾令人震驚，代表美國銀行方面距離復元期仍遠。如美聯一季可蝕240億美元，其他美資銀行情況會點？更何況美國樓價仍未穩定落嚟，即次按虧損仲喺度擴大而唔係收窄。2006年10月美聯以240億美元收購Golden West，後者從事大量Adjustable Rate Mortgages（簡稱ARMS）。即買樓者首先每月付款只係象徵式（連支付利息都唔夠），然後每月供款按年上升，呢個收購今年需作187億美元撥備，令公司每股虧損11.18美元（去年同期每股獲利85美仙）。依家又由富國銀行以150億美元收購美聯，未來需為美聯撥備幾多？因為未來十二個月ARMS供款愈嚟愈多，呆壞賬亦愈嚟愈多。
對美國立法者、監管者、銀行及貸款者嚟講，11月份將係另一災難月，因240億美元ARMS到期，利率將以市價計算，估計將引發大量物業斷供潮，令銀行呆壞賬又進一步上升，信貸危機不但未退潮，反而喺度惡化。LIBOR經過八天回落後，今天又再上升，代表各國挽救措施又漸失效！LIBOR由十五種唔同時間嘅貸款組成（由隔夜錢到一年）及提供十種貨幣，全球以LIBOR為核心，制訂利率，例如LIBOR加4厘（即9厘）係家吓實際借款利率。真正情況係銀行水緊或佢地唔想將錢借畀對手（另一銀行）以免變成呆壞賬。11月份ARMS重組將係市場另一次考驗。
最先係Golden West有毒（因從事大量ARMS貸款業務），美聯食咗Golden West後中毒。依家富國銀行又食咗美聯，唔會跟住又中埋毒啩？今天連美國商業樓價亦回落，令唔再產生收益嘅貸款較第二季上升23％（較去年第三季上升五倍）。雖然富國銀行有足夠股東資金應付虧損，未來卻難免出現大幅虧損。因美國第三季倒閉數字較去年同期上升71％；未能履行合約房屋供款者共七十六萬五千五百五十八名，係2005年1月以嚟最大，呢個情況估計會維持超過一年。Mortgage Bankers Association分析員Jay Brinkmann表示，8月份美國二手樓銷售較2005年9月高峰期減少32％，成交繼續萎縮代表樓價仍未見底。
一節淡三墟；大繁榮後通常係大衰退期，此乃鐵律。戰後嬰兒潮（Baby Boom）引發全球經濟大繁榮。今年起，戰後嬰兒潮踏入退休期（我老曹都六十歲啦，計劃退休啦！），經濟進入Bust期而引發全球衰退。因為戰後出生嘅一代開始賣樓及減少消費。呢個唔係7000億美元挽救計劃可改變嘅方向，甚至最近國會批准另一3000億美元刺激方案亦冇用，因為嬰兒潮正步入退休年齡，一批接一批退下工作崗位，情況好似1990年嘅日本。同1990年至今日本再冇出現大繁榮期嘅道理一樣（日本冇新移民，人口老化速度較別國快）。
未來唔好借孖展炒股
去年係全球金融市場由信貸泡沫爆破走向去槓桿化一年；代表一個時代嘅終結及一個時代嘅開始。今年政府已成為最後資金供應者，但相對於Mother Nature力量，政府嘅力量又變得好細（邊個可以同大自然對抗？）。金融市場熊市進入Garden Variety式回落；例如美國物業從2006年年中開始回落、股市由去年10月開始、黃金由今年3月開始及石油由今年7月開始回落，理由就係去槓桿化。
股聖自己亦講過：「利用槓桿投資嘅壞處係，你可以因此而破產。」（我老曹除物業外，從不借錢投資）。當然，好好地運用槓桿又可產生刀仔鋸大樹嘅結果。問題係利用槓桿投資只需一次失足已可以致命。我老曹除咗1973／74年和記一役由50萬元變成10萬元外，其實1971年亦有過另一次慘敗經驗，就係用20萬元買市值約40萬元和記股份（約38元一股），當年7月中國宣布加入聯合國。呢個明明係好消息，點知恒指卻由406點跌至9月份278點，和記股價由38元跌至22元。我老曹因此蝕咗16萬元；加上經紀佣金等支出，我老曹喺三個月內由20萬元身家變成只得2萬元；從此唔再炒孖展。投資者心態係Once Bitten,Twice Shy。1974年我老曹喺和記身上再蝕錢後，影響整個七十年代嘅投資心理。要到1984年先再次恢復投資信心。大部分投資者失敗嘅理由，唔係錯喺Timing或方向，而係過分負荷；大部分投資者唔係死於過分保守，而係死於過分進取；大部分散戶都犯咗太遲才參加Party嘅毛病，同時又過分負荷。例如去年10月先大手吸納．同時做埋孖展散戶，結果係累己累人（近期先被斬倉）。大手買賣股票，可能帶嚟短期利潤，但長遠嚟講一定蝕大本離場；將全球進入去槓桿化嘅大趨勢下，未來投資市場已同過去唔同，更加唔好做孖展。
信貸泡沫好似灰姑娘遇上神仙，將老鼠變成駿馬及南瓜變成馬車，去參加王子舞會咁。當時鐘敲響十二下之時，所有嘢打回原形，你必須喺十二點前離開，如果唔係就變回灰姑娘。去年10月30日時鐘敲響十二下，但舞會實在太吸引，大部分投資者都唔願離開，今年已變回灰姑娘。
另一比喻係莊周夢蝶。到底夢中蝴蝶先係真嘅莊周，定係現實中嘅莊周先係蝴蝶？喺信貸泡沫中，自己到底係蝴蝶定係莊周？
三頭馬車拖累經濟
過去五十年美國家庭負債平均數係個人稅後收入78％；去年達到134％；今年才跌至130％。減債行動已開始，We have a long way to go。1960至90年美國人平均儲蓄率係稅後9％，去年係零，呢樣亦係有排搞。2004年美國金融市場槓桿比率係30比1（即10萬元本金，炒300萬元貨）。到底要到邊個水平先合理（香港去年係18比1）？今天美國GDP 72％嚟自消費性行業，一旦美國人增加儲蓄及去槓桿化；GDP點出現高增長？如重返五十及六十年代，消費只佔GDP 60％，調整期有幾長？
股聖認為，衍生產品係金融武器，擁有巨大摧毀力！依家大家先感受到佢嘅威力，原爆之後幾時先可以重建廣島及長崎？
美元滙價已完成八年熊市，今年7月起反彈。
油價接近150美元後，出現50％調整而跌穿72.5美元創新低。
金價升穿1000美元後，亦出現大調整。
道指7800點支持點能否守住？如7800點失守，將進入另一階段回落期；反之，進入上落市。
油價同金價表現係咪代表通縮期臨？美國聯儲局與各國央行濫發鈔票又會唔會引發通脹？九十年代將日本發生嘅情況會唔會喺美國重演？
過去帶動經濟增長嘅三頭馬車，今天變成帶動衰退三頭馬車。佢地係：一、房地產。估計明年美國樓價仍會回落10%至15％，相信到2012年先見底；二、信貸收緊。連GE亦要向股聖借錢，一般中小企業又點借到錢；三、消費收縮。由去年佔GDP 72％，回嚟到佔GDP 65％，睇落有排搞；加上未來企業純利減少（年初估計明年標普五百指數每股獲利96美元，家吓已修正為70美元）。純利下跌令股價及P/E下跌。即除純利下跌27％影響股價外；加上P/E由十五倍下跌至十倍，呢個係近日道指可見7800點嘅理由。道指7800點係獲利能力合理水平；如純利下降，唔排除明年道指進一步回落。
股市見底後，Buy and Hold對一般投資者嚟講係最佳策略；反之，喺股市見頂後，Buy and Hold係最差投資法。換言之，利用Buy and Hold投資策略，必須同時了解咩叫做Bottom Up及Top Down。今天股市係咪見底？木宰羊。喺未見一浪高於一浪前，冇人知道，請等候一浪高於一浪訊號出現先入市。
大家都無膽入市
各位仲記得《大白鯊》電影嗎？當人人以為泳灘安全時，大白鯊又突然出現，嚇到你半死。呢次跌市何嘗唔係咁？唔少人以為恒指18000點可支持時，忽然跌落14000點。當你以為14000點有支持時又突然失守。最後令沙灘變得冷清清，因為冇人敢落水。今天恒指失守14000點，甚至有資金喺手者，亦冇咗入市勇氣。
全球化帶嚟全球三十多年經濟繁榮期，同時令國與國之間金融體系拆走防火牆；不過，一旦美國起火便殃及全球。有人認為，中國所受影響最細，真係咩？近期金融危機已漸漸向中國擴散，中國一樣無法避免。
中國經濟已進入痛苦轉型期。過去三十年勞工密集工業由OECD國家轉向發展中經濟，尤其係中國，已大致完成；即中國再唔可以依賴吸引外資投資內地製造業而保持GDP每年9％以上嘅增長。呢個情況1980年喺香港曾經出現，1990年亦喺台灣出現；香港廠商將七萬幾間工廠由香港搬入中國而進一步壯大，香港本身則全力發展服務業。台灣因政府限制廠商投資中國，造成台灣廠商只可偷偷咁做，令台灣冇成為中國製造業服務後勤基地。結果香港1984至97年出現十三年繁榮期，台灣由1992年至今經濟無法再振作起嚟。未來中國經濟轉型，到底係香港式定係台灣式？再加上內地一子政策下，中國已面對勞工不足問題，工資自2001年起直線上升，升幅達到一倍，亦削弱咗內地工廠嘅國際競爭力（農村四十歲以下及十八歲以上勞工，70％已進入城市工作）。至於高新科技喺去年只佔總出口28.5％，仲有一段路要走。低科技行業面對壓力極大，因越南勞工成本只係中國41％，去年越南獲世貿地位，今年正搶走中國製造業訂單。去年外資投入越南高達400億美元，截至今年9月止，已投入572億美元，較去年同期上升181.3％，估計全年可達600億美元。越南正喺度搶走中國低科技行業訂單，而中國高科技行業仍喺度發育。中國呢段青黃不接期，維持幾耐？只知下一個繁榮期唔似喺明年出現。
如果您喜歡這篇文章，請按「讚」或分享給您的朋友，以示鼓勵。
