余文樂近年埋到上市公司主席沈嘉偉嗰堆，佢有樣學樣，加入埋佢哋嘅玩車兵團，豪擲百五萬買咗架寶馬5系新款跑車，又學人玩名錶，放喺blog 度晒命，令佢成功由元朗仔升格上等人。
早兩日，媽咪姐喺金鐘太古廣場見到雙眼浮腫、無厘精神嘅樂仔，單拖去starbucks 買咖啡提神，買完走咗去上落客區等車。當時佢等咗陣就不耐煩，不停打電話，呆等咗三分鐘後，佢塊臉愈來愈黑，躁爆再打電話，好大聲咁鬧：「喺邊呀？......到未呀？....」之後拜拜都無就cut 線。佢嘅聲浪一嘅都唔小，坐喺平台嘅人都即刻擰轉頭望吓發生咩事？身光頸靚嘅樂仔，真係本性難移！
普通行街，樂仔呢身打扮都近3萬大元。
等車期間，日蒲夜蒲嘅樂仔一臉疲態，爭取時間做頸部運動鬆骨。
今個月4日，余文樂陪沈嘉偉一家喺上環富豪飯堂「尚興」食飯，親密到直情好似沈家一分子咁。
