我講嘅嘢係事實。真實對白
頂級鋼門：被爆大鑊，鄭嘉穎喺上週四（16日）終於認清自己與敵同行，不過佢硬淨呀，一句「唔應該傷害女人！」就嗱番晒分，佢同Niki 真係高手過招呀！
自從「佘穎戀」被揭後，有傳輸家周麗淇（Niki ）一直唔多甘心，有人下下放暗箭似乎要將鄭視帝變賤男，誓要棄我者形象慘過
指插水。
不過男女感情無線好少理，最近更食住個勢搵埋新情侶佘詩曼同鄭嘉穎拍來年新劇《劉三好》的巡禮預告，打正招牌用情侶檔吸老細！
Plan A 扮可憐失敗，好勝周麗淇即時轉Plan B 玩爆料，對住記者「唔覺意」踢爆鄭嘉穎早前接受報章訪問話半年冇見Niki 係亂噏！
前女友係要玩殘自己，睇嚟鄭視帝都要諗計拆吓招！
早前Niki 實行A 計劃扮可憐，見親記者都欲哭無淚「苦del del 」，本月初到赤柱拍攝《桌球天王》雖然要與鄧健泓拍談情戲，不過Niki 仍然苦情樣繼續做受害者。Niki 扮失戀棄婦入晒戲，可惜鄭嘉穎俾無線睇得起，更搵埋佢同新女友佘詩曼拍《劉三好》，連銀幕情侶條水都被情敵食埋，有傳Niki 實行落多兩錢力轉用B 計劃大踢爆。
上週三（15日）Niki 到西貢拍《桌球天王》時，就放棄苦情女形象，成個人忽然開朗晒，接受記者訪問時更不經意話：「我同佢呢半年有見，仲有聯絡喎！」擺明話鄭視帝講大話。
視帝醒覺
據知情人士透露原來鄭視帝一直唔信前女友會放料咁陰濕：「嘉穎同Niki 係冇見面，不過自從同阿佘（佘詩曼）單嘢俾人揚咗出嚟，有報道話係Niki 放料，嘉穎都仲有打電話安慰Niki ，叫佢唔好嬲，嘉穎根本冇諗過亦唔信Niki 會放料，佢仲同Niki 講叫佢放心話件事好快過！但嘉穎發覺愈嚟愈唔妥，先明白邊個搞鬼，佢唔心淡就假喇！」
Niki 玩踢爆，嘉穎上週四（16日）拍攝節目巡禮時就諗過度過話：「我講嘅嘢係事實，要講嘅嘢已經講晒，無論如何，作為一個男人都唔應該講嘢去傷害女人！」鄭視帝講台詞快靚準，守得穩仲可以挽回好男人形象攻番兩下門，唔知Niki 仲有冇Plan C 呢？
9月至10月初，實行Plan A 期間角色係被飛棄婦，周麗淇當然經常黑衫上陣仲要chok 番個「苦del del 」樣配合吓！
暗箭博同情 PlanA failed
呢日周麗淇拍《桌球天王》外景，未埋位時就叫助手做妹仔企喺佢身後擔埋遮擋風雨，連個天都配合埋，真係我見猶憐。
浮面爆鑊甘 PlanB Processing
之前有傳Niki 嫌鄧健泓奀推拍《桌》劇，搞到要陳志雲開口嗱人，上週Niki 同鄧健泓拍咀戲，兩個就冇尷尬兼笑口噬噬，Niki 戲好，原來蜜糖鄧健泓都唔弱。
我哋有聯絡喎！真實對白
上週Plan B 始動首日，Niki 同《桌》劇拍檔兼志雲愛將鄧健泓開工扮啜嘴就笑得勁開心，唔同計劃有唔同表情，邊個話Niki 做戲差㗎？
後門入
姣佘速閃
雖然無線都唔介意阿佘同鄭嘉穎情侶檔搵銀，不過既然Niki 隊嗰個係鄭嘉穎，阿佘見慣大場面梗係唔會踩屎，於是上週四拍《劉三好》時影完張相就啦啦聲閃人，無謂畀位人講嘢喇！
前門出
鄭嘉穎喺前門出，阿佘就喺後門入廠，絕對唔會有機會撞面俾你影合照，岩嘅，點知前女友見到張合照火起又會亂噏乜㗎？
