墟墟撼撼、巴巴閉閉嘅話題劇《溏心風暴之家好月圓》播完之後，大家追劇情緒都未平伏得晒，80集長劇《珠光寶氣》好快又接住上場。
《珠》嘅劇情背景比較新穎，以珠寶世界嚟比喻人生；《珠》最令觀眾期待嘅，係演出《珠》嘅一班好戲之人，如蔡少芬、黎姿、邵美琪、林保怡、姜大偉、岳華等，都係好耐冇喺劇集出現過嘅，再加李司棋、陳豪、黃宗澤同鍾嘉欣。強勁卡士、華麗背景、嶄新劇情。相信一向箭無虛發嘅無線，搵得《珠》作為台慶重頭劇，目的都係要創造另一個長劇神話經典。
播映日期﹕10月20日起逢周一至周五晚9:30pm
翡翠台及高清翡翠台
如果話《珠光寶氣》嘅台前幕後都係「巨星」，相信冇人會反對。雖然《珠》嘅監製戚其義之前嘅《金枝慾孽》、《火舞黃沙》已經成為「珠玉」，但好似戚自己所講；雖然喺拍攝期間黎姿因為細佬受傷問題停拍一段時間，但復工之後，完全冇影響佢拍攝情緒，反而同蔡少芬、邵美琪訓晒身去做。而且《珠》同《金》及《火》劇種完全唔同，劇力絕對唔輸蝕。
睇過《珠》嘅預告片，戚監製又似乎冇「賣花讚花香」，因為睇到部分情節又的確幾緊張，班女主角亦有唔少親熱鏡頭，最誘人係仲有三點式女郎穿插其中。的確有睇頭。
《珠》嘅古仔冇著重家族情仇、更唔係打打殺殺，而係針對上流社會，睇盡上流社會圈子嘅人生百態。
《珠》劇情有啲似《宋家皇朝》；主線喺邵美琪、蔡少芬、黎姿三姊妹身上。佢哋阿媽李司棋自細就將三姊妹「琢磨」，不惜一切要佢哋嫁入豪門。三姊妹喺阿媽「訓練」下，果然，氣質高貴優雅，全身流住「藍色的血」。
劇情類似《宋家皇朝》
雖然大女邵美琪性格夠硬，同阿媽價值觀唔同，邵嘅對象林保怡雖未至於係大富豪，亦屬富有人士；二女黎姿比較單純，遇到愛情就一頭舂落去，結果成日撻Q ，最後阿媽李司棋出手，卒之嫁到香港首富岳華嘅仔陳豪；而野心大、個性張揚嘅三女蔡少芬，最識阿媽心意，所以第一段婚姻失敗後，即將目標鎖定喺大富豪岳華身上。
雖然李司棋呢個阿媽終於得償所願，三個女先後嫁入豪門，可惜豪門生活嘅名和利，令到三姊妹漸漸迷失本性……。劇情發展係點？下個星期一、即係20號開始，就要坐定喺電視機前面啦！
不過，話時話，《珠》雖然孭飛嘅係蔡少芬、黎姿同邵美琪、林保怡；之但係入面戲份頗重嘅陳豪、鍾嘉欣、黃宗澤同李司棋啱啱先喺《家好月圓》出現，咁短日子跟住又喺《珠光寶氣》現身，唔知觀眾會唔會有睇到厭嘅感覺呢？
人物關係解構：
話明係大卡士、大堆頭製作，劇入面主要角色牽涉人物太多，唔解釋一下，可能會睇到一舊雲，如果跟住呢個角色關係表睇劇，咁就會清楚明白晒㗎啦！
邵美琪、黎姿、蔡少芬喺《珠光寶氣》入面，自細喺阿媽李司棋薰陶下，變成三隻「藍血天鵝」。
李司棋擺脫荷媽溫婉形象，變身為辣媽，幾經辛苦將三個女捧上枝頭，到最後自己竟然得咗個「老人癡呆症」，倚賴丈夫姜大偉。
飾演三女嘅蔡少芬最終成為香港首富岳華嘅老婆；變為二家姐黎姿嘅「家婆」。
邵美琪、黃德斌、林保怡三個好朋友，到最後，邵捨黃而跟林成為一對。劇情確峰迴路轉，估佢唔到。
