我買平床︰陸詩韻自力更生搬回將軍澳娘家暫住，前週日（5日）更到宜家睇傢俬，其間淨係睇單人床，更對479蚊嘅床架甚有興趣。
油王朱明爭奪戰，最後贏家為41歲陳法蓉，可以技術擊倒年紀細一截嘅27歲陸詩韻，陳法蓉經驗豐富固然係主因，不過最高招係出招前率先預告等你咪話我陰濕！
據知今年5月二人同場出席慧妍活動，陳法蓉忽然走到同油王火熱中嘅陸詩韻身邊彈兩句：「妳要加油，努力喇！」表面點睇都以為係鼓勵。
點知事隔2個月陳法蓉成功撬走油王，家陣陳法蓉仲話4年後同油王結婚，衰完諗番先知原來係warning letter ，學嘢啦陸師妹！
今年5月31號陸詩韻和陳法蓉一齊出席慧妍雅集annual ball ，平時兩個水都唔吹多句，嗰日大佢14年嘅陳法蓉就忽然好主動搵師妹陸詩韻閒話家常，之後又忽搭住陸詩韻膊頭非常誠懇咁話：「妳要努力加油喇！」九唔搭八陸師妹當時仍未喺燈，邊聽得出原來冠軍師姐已經出晒開戰通牒，暗示出手撬油王叫你醒扒。
你買名牌︰上月陳法蓉被傳媒影到同油王朱明喺太古廣場名店拍拖shopping ，陳法蓉全程四萬咁口望實油王，係油王靚仔定係開心有名牌買先！《蘋果日報》圖片
做得油王女友唔只shopping 任買，出入更有朱明名下公司Fourway （HK ）Ltd.登記、值約50萬嘅名貴日產Elgrand 7人車接送，上週一（6日），陳法蓉又坐住該車駛入朱明價值6,100萬的馬己仙峽道港景別墅。
無端拍膊據知預告發出後，陳法蓉隨即展開暗撬行動，知情者透露：「有日朱明無端端問陸詩韻，乜你同曾生（前闊佬男友曾文能）仲有聯絡咩？陸詩韻梗係話冇啦，佢都好奇怪朱明咁問！仲唔係有人打毒針咩！」之後咁岩陳法蓉就經常借嘅意致電同SMS 朱明，反而自以為做硬油王正印嘅陸詩韻就懵盛盛繼續發闊太夢。
陸詩韻強調Apartment O 係與弟弟及弟婦租住，並非得到油王照顧，不過佢唔想阻住細佬兩公婆，所以11月要另覓新竇，辛苦晒！
Apartment O 位於銅鑼灣新寧道，屬區內最高級的酒店式公寓之一。每個單位約1,500呎，月租最平都要8萬，估唔到陸師妹細佬又幾撐得吓喎！
自力更生結果兩個月後陳法蓉成功將油王朱明收入閨中，陸詩韻亦由月租8萬嘅銅鑼灣頂級服務式住宅Apartment O 打回原形搬返將軍澳居屋，雖然陸詩韻司儀騷價由8千蚊升到萬五，不過家陣下下食自己，早前陸詩韻到銅鑼灣宜家掃平貨。記者問到佢陳法蓉暗示會撬油王，陸詩韻就話：「佢係前輩，佢之前係同我傾過兩句，叫我努力同加油，我邊會諗到咁深入，不過我連佢電話都冇，同佢唔算好熟囉！」
陸師妹如今自力更生，下次再有人無端端搭住你吹水，好諗清楚自己係咪有件筍盤喺手喇！
《蘋果日報》圖片
前面扮fd陸詩韻，陳法蓉最近一次碰頭喺今年5月慧妍年度舞會，陳法蓉（右一）發表搶油王預告前更大方地同陸詩韻（右二）合照，同場仲有上咗岸嘅葉翠翠（左一）同跟洪天明蜜運嘅周家蔚（左二），係得陸一個冇喺落。
背後黃雀雖然陳法蓉表示同陸詩韻係朋友，慧妍當日陳法蓉同陸詩韻講完句預告之後就冇再吹水，陸詩韻仲話過佢電話都冇，有幾friend ，心照！
