電機兒下星期放大假外遊，臨行前申請定Mo-Call 諗住可以用平漫遊，誰不知未出發，就收到有讀者投訴！事緣早前〈數碼教室〉介紹咗Mo-Call 嘅手機軟件，話用咗之後最多可以慳95%漫遊費。但呢位讀者話跟足我哋同Mo-Call 網頁指示，去西班牙旅行時用呢個軟件致電回港，滿以為只收每分鐘$2.325，誰不知回來後，竟被網絡商收$800多元漫遊費！為免自己都中埋招，電機兒即時「無情」上身，查清事情始末。
中文版官網教學老點
幾經明查暗訪、中英雙語，電機兒終於查出Mo-Call 嘅真正用法同一般漫遊完全唔同，仲分分鐘搞到你周身唔得閒！原來要用Mo-Call 平打長途係要有當地號碼先得，如果用番香港SIM 咭接聽，就即計你漫遊錢。不過Mo-Call 就冇提過呢件事，打去客戶服務問幾次先肯話你知！仲死撐官網有講，點知翻轉成個中文版官網都冇，轉去英文版先有少少提示，莫講話一般人，就算熟番手機如電機兒都被誤導。
質問Mo-Call 客戶服務部！
飛線叫漫遊?
一般香港人都認為，在外地使用本地SIM 咭打過或接聽電話就叫漫遊，所以讀者L 才跌入Mo-Call 陷阱，而Marina 的回覆如下：
原來用家在外地不使用「call me at 」（回撥）功能，所有來電都算漫遊收費，一接聽就收高昂漫遊費用。
收費含糊其詞
Marina 常強調經Mo-Call 收費簡單，實則總收費繁多，因為除了Mo-Call 的收費外，還有當地電話費及幾秒漫遊費。
Mo-Call常意圖令你覺得漫遊收費平了，實則只要一聽電話就當漫遊，就算唔記得設定「回撥」號碼，因接聽漫遊來電比打出漫遊來電平，都叫幫你慳到，離譜！
本地打長途先抵用
Mo-Call官網的中文準則及英文版意思不一，令人誤會係平到極的漫遊，實則是一項國際飛線服務，由用家致電給海外號碼變成回撥。而英文版的漫遊（Roaming ）意思，只係身在外地也可以致電海外，而非用同一張SIM 咭打出國際漫遊電話，結果造成誤會。電機兒在此代編輯部向讀者致歉，同時拆穿Mo-Call 所謂的漫遊優惠，其實是類似國際飛線而非漫遊。雖然佢比飛線漫遊平少少，但步驟就繁複得多，仲要打出先有得平，接聽就冇得平，所以電機兒就覺得淨用Mo-Call 喺香港打長途去外國簡單同抵用得多。
Mo-Call 「漫遊」原理
1先下載Mo-Call 軟件到手機
2到外國漫遊時，在軟件內「call me at 」一欄（原理是飛線），填上一個當地電話號碼。
3利用Mo-Call 致電回港，接通後約10秒會自動掛線。
*用家需付10秒漫遊電話費
4會有一通來電轉駁至你飛線的電話號碼
*Mo-Call 開始收費，用家另需付當地電話費（如有）。
5假如沒有在「call me at 」填上當地電話號碼，你正漫遊中的手機則會響起，假如收聽的話，Mo-Call 失效，用家需付正常漫遊費。
中文版官網好多重要訊息都冇講，至少冇提醒用家要設定「call me at 」同埋要換當地電話號碼，仲一味話「避免國際漫遊費用」，真係信佢一成、雙目失明。
讀者L 本來好開心咁去西班牙，更以為用Mo-Call 可以打平漫遊。
