金融海嘯橫掃全球，不少香港富豪損手幾十億，據知連有「林百億」之稱嘅岳少林建岳，最近亦被「海嘯」所累，賬面身家勁縮水，認真頭痕。
東亞娛樂老闆岳少近年簽下粒粒巨星鞏固娛樂王國，出名使錢闊綽的他，最近因股災而荷包縮水，開源節流抗逆市事在必行，原意豪揼6千萬斟歌神陳奕迅過檔計劃急停；就連何韻詩宣傳費減得就減，咪話唔慘！
受金融海嘯影響，股市日日跌，連累岳少旗下東亞娛樂一樣遭殃，據知上週五（10日），岳少急召高層開大會。「老闆下令，嚟緊所有大project 都要急停，同埋公司所有使費都要慳得就慳，大家都好愁。」知情人士透露。
Eason 脫腳
岳少開源節流，首當其衝是陳奕迅，為讓獲假釋的老父陳裘大可以聚天倫，兼賺多個錢畀老豆醫肝癌，Eason 原本打算約滿新藝寶後過檔東亞食大茶飯，點知臨門撻Q。「岳少其實好欣賞Eason 㗎，原本想簽佢，不過陳家瑛（Eason 經理人）就開價6千萬簽3年（連經理人合約），而家咁嘅市點做呀，最近定案唔敢去馬囉。」
何詩cut 數
Eason食唔到大茶飯，就連岳少旗下的何韻詩亦冇啖好食，原本打算12月出新碟大肆宣傳的她，有傳最近公司落order 大幅削減宣傳費，要cut 三成預算。
一場金融海嘯搞到岳少陣腳大亂，不過據知反而英皇老闆楊受成就冇入肉，原來楊生7月（金融海嘯前）已將手上「貨仔」斬得就斬，逐步脫手，加上英皇實行精英班，幾個月嚟慳番唔少皮費，算執身彩！
減budget
新歌〈青山黛瑪〉已經派台，但最近因宣傳費被削減，咁啱撞正師傅梅艷芳生忌夠綽頭，上週五（10日）何詩就帶埋班記者去大嶼山拜祭師傅做大龍鳳，唔使錢又可以自我宣傳，認真有計。
睇定啲
陳慧琳於6月舉行嘅演唱會由東亞娛樂主辦，個騷喺金融海嘯前舉行，開6場，爆足6場，加上有「美心月餅」贊助，有賺冇蝕，不過以後開騷就要搵多幾個主辦商協辦，蝕都唔使咁傷！
即刻停
岳少曾經拍心口話：「蝕幾多都要搞得成！」嘅麥當娜世界巡迴演唱會香港站，原本預計下年頭搞，但最近計劃亦取消，原因娜姐要收天價歌酬，加上娜姐會坐私人飛機來港，停機坪費用亦要由岳少支付，計過數，唔搞好過。
次次開騷都引起撲飛潮嘅Eason ，原本係招財貓，難怪經理人陳家瑛狼開價6千萬賣仔，但個市而家咁，可以點啊？
老豆陳裘大假釋、老婆徐濠縈又少蒲咗，Eason 賣了大坑舊居嘉崙臺賺了近1,300萬，改以月租13萬住東半山大鵬閣，有傳聞佢想套現為父醫肝癌。
東亞老闆林建岳原本打算搵Eason 喺年尾開「華星同學會」演唱會，順便簽佢為東亞旗下，但一場金融海嘯，搞到一拍兩散。
