徐子珊昨日與模特兒Lisa S.及Ana R.等為PENNYBLACK 2008秋冬時裝表演行騷，徐子珊以打頭陣及壓軸出場，攞晒頭尾彩，不過當她演繹最後一襲時裝時，竟不慎露出下滑至手臂的Bra 帶。
問到徐子珊與一眾身材高挑的模特兒同台會否有壓力時，她說：「冇辦法，我控制唔到，係阿媽生成，所以我唔多行騷，不過，作為演員，我身高OK 。至於體重，依家已經夠瘦，公司叫我唔好再減。」另外，有雜誌指鄭嘉穎五年內追求六位女星，與嘉穎屬同一經理人的子珊，被問會否成為第七位時，她搞笑地說：「我冇咁嘅福分，（咁睇小自己？）我咁嘅高度，指望唔到乜嘢。」她認為報道十分好笑，並相信對方非花心之人，問到嘉穎的六位緋聞女友當中，誰與他最相襯，她識做地說：「佢同個個都襯，拍嘢冇所謂。」
子珊不慎露出下滑至手臂的Bra 帶。
子珊自言沒有高挑身材，故甚少接時裝騷。
Lisa S.（右）和Ana R.近日頻頻行秋冬時裝騷，豬籠入水。
