女人唔襟擺，所以年過三十就到四十的女星好似陳慧琳咁都趕住結婚造人。
成日俾人話鍾意碌大對眼，斗令眼變5蚊的第一代chok 女張燊悅，同任職教育局政治助理的老公楊哲安上年年尾結婚後，半年已極速有餡，據了解，32歲張燊悅為咗盡快添丁，婚後密密幫襯徐子淇都幫襯過的中醫李文慧執好副偈，唔夠一年俾佢成功「造人」。
記者更發現懷有5個月BB 的張燊悅仲健步如飛，同老公齊齊迫地鐵，跟以前出名造作嘅佢完全唔同晒。
上月25日，記者於金鐘太古廣場發現大肚婆張燊悅急急腳，行去金鐘地鐵站會合老公楊哲安。
齊迫地鐵
目前在金鐘政府總部返工，擔任教育局政治助理的楊哲安當時啱啱放工，二人一見面就攬到實，然後更十指緊扣行入地鐵車廂。當時是放工時間，車廂迫爆，張燊悅忍唔住向老公詐嬌：「哎呀，好迫呀！」楊哲安即鬼馬冧老婆：「你咪知吓放工時間迫地鐵嘅感受囉。」
中醫谷仔
據知張燊悅同老公楊哲安特別鍾意小朋友，所以順晒老公意趕快造人。「佢身體唔係特別好，加上以前響娛樂圈都捱過，梗係要搵啲聖手調理好番個身體啦！佢聽見朋友話徐子淇都幫襯嘅中醫李文慧使得吓。」
雖然大肚5個月，但張燊悅對BB 係仔定女卻保持神秘，「啲人問佢呢胎佗嘅係仔定女，佢就懶神秘唔講，話到時咪知囉，佢預產期係1月。」她的身邊人透露。
張燊悅果然口密，記者上月尾趁張燊悅同老公搭完地鐵河之後於旺角站下車時，記者上前恭喜。之不過當記者問BB 是男是女，兩人都笑笑口唔回應，唔通驚BB 小器？
去年11月，張燊悅和楊哲安於布吉舉行婚禮，旁為前旅遊界立法會議員楊父楊孝華。楊哲安本在物流公司搵5萬一個月，自9月出任教育局政治助理後即搵13萬5，加上拒絕放棄居英權，一度被外界批評佢享有特權。
名醫包生仔
千億新抱徐子淇（右圖）幫襯開嘅中醫師李文慧，響銅鑼灣耀華街開業多年，擁有澳洲皇家墨爾本大學健康科學（中醫）學士及浸大中醫文憑，以婦科最為聞名，記者到訪其診所，發現客似雲來，由早上11時至晚上8時都預約滿客，睇證需三天前預約，每次診金連藥費約$500。其助手亦表示李醫師甚為低調：「係有好多名人闊太幫襯，不過醫師唔鍾意同人講㗎。」
第一代假大眼
早年做星時曾被批評係是非精嘅張燊悅，2000年和舒淇合作《玻璃之城》時，就傳二人不和，舒淇更寸張燊悅經常碌大對眼，「斗令」扮「五蚊」。而和袁詠儀合作《戇星先生》時，又被靚靚篤爆佢作為新人卻經常遲到、又唔熟讀劇本。睇嚟張燊悅退出娛圈，專心相夫教子真係明智選擇！
出年年頭就生得嘅張燊悅懷孕5月都未見水腫，不過婚後張燊悅打扮樸素，仲唔回應記者問題，做低調楊太。梗係啦，佢個局長助理老公月賺13萬5千蚊糧，好多人眼紅佢㗎！
詐晒形
放工時間迫地鐵，呢啲嘢相信張小姐以前一定唔會做，不過嫁雞隨雞，難得上到岸，迫吓地鐵都係少少苦楚啫！
趕住返
兩公婆十指緊扣趕入地鐵車廂，楊哲安搵咁高人工都要老婆迫地鐵，真係難為咗張燊悅喎。
