想快啲完結件事！真實對白
最近有傳鄭嘉穎背住女友周麗淇（Niki ）同阿佘（佘詩曼）暗交半年，爆大鑊後有人即時放料指鄭嘉穎扮死狗箍煲，不過實情原來掉番轉！
據知Niki 同鄭嘉穎早在9個月前已攤牌，拖拉3個月，嘉穎避足鉸剪腳Niki 達半年，直至鄭本月中於洪天明經營的銅鑼灣新私竇內同阿佘當眾打「茄輪」公告暗交關係，箍煲失敗的Niki 做輸家，有人奸紅上身四圍放箭，誓要嗱尾彩兼玩大報復。
舊愛唱衰，連《烈火雄心3》對手王喜都執死雞加入圍攻，臭口亂
鄭俾無線高層樂小姐「搞」，又話鄭巨星難就檔期拖延開工進度，新仇舊恨一鋪清，鄭嘉穎今年應該冇拜神！
堅決斬倉
鄭嘉穎撻著阿佘半年，有愛情滋潤理應風騷，不過面對八婆團圍攻，鄭嘉穎即時躁晒，問親佢是非同感情問題，都係過句：「我冇嘢講！」
《蘋果日報》圖片
電佘纏實
阿佘出名電力足，為人熱情，圈中唔少男星都同佢傳過緋聞，由奀星揚明到有錢商人馬清偉都有份，冧掂視帝都係駕輕就熟。
模擬圖片
12/9約2:00am
地點：銅鑼灣百富中心一樓club high 私竇
姣佘同鄭嘉穎飲大兩杯喺夜場狂咀，最激係當時前男友陳浩民都在場，而事隔不久，周麗淇即刻收到友人call 報料，事隔一週即有雜誌踢爆姣佘同鄭嘉穎關係，究竟邊個放料？羅生門大家自己諗。
跟他只是同事！真實對白
周麗淇出席活動時例牌都係委屈樣，同內地電視台做訪問時，仲用國語話：「我有好多朋友，跟他只是同事吧！」
典型港女超是非
鄭嘉穎狠心斬5年情，除因佘毒攻心之外，周麗淇有晒典型港女性格亦令鄭視帝唔多好受，家陣有件溫柔主動新貨，都係時候轉倉喇！
講嘢惡頂
據知Niki 同好多港女一樣講嘢勁直接硬掘，最佳例子係Niki 身邊助手冇個做得長，之前跟開佢嘅助手Annie 轉去日本公司做，上手fans 妹仔變助手做唔夠1個月就走頭，而新請的助手阿Ju （右），則剛返工唔夠兩星期，早前有報道暗示嘉穎搵無線高層發功，唔畀周麗淇助手入電視城玩報復，查實只因該名新助手未有登記兼冇工作證，原來係有人借題發揮，你估你助手係六嬸可以打橫行咩？
王心慰（右）一向愛用鄭嘉穎搭周麗淇，周麗淇亦識做經常冧得王監製好開心，確保甩拖唔會甩碼頭。
兩人在《最美麗的第七天》中經典咀戲都係由王心慰炮製，兩人寓工作於娛樂，可惜以後應該冇呢支歌仔唱。《蘋果日報》圖片
借口隊人
港女最愛講是非，毒針仲要支支打得應一應，據知無線監製王心慰一向愛起用鄭嘉穎同周麗淇演情侶檔，據知Niki 最近就密密向王監製傾心事，想同監製洗腦，順便借王監製把口教訓吓負心男，呢招高呀！
03年鄭嘉穎與周麗淇（Niki ）因拍《翡翠戀曲》撻著，但據知兩人拍拖唔夠1年，周已原形畢露，知情人士說：「周麗淇好大小姐脾氣㗎，成日呼喝鄭嘉穎，男嘅5年嚟都提出分手好多次，分手冷靜期間就當放大家出去食吓散餐咋，不過事後個女次次都主動call 番鄭嘉穎，個男嘅又姣婆守唔到寡，拖拖拉拉咁咪5年咋！」
至去年10月時，鄭嘉穎因《法證先鋒2》再遇佘詩曼，姣佘主動投懷送抱，又溫柔又識善解人意，鄭嘉穎佘毒纏身中晒伏即時的起心肝同Niki 斷纜。
角色轉換
正印變棄婦，29歲的周麗淇知道男友同大自己4年的阿佘撻著後，即時狂發SMS 試圖箍煲，不過，鄭嘉穎同阿佘正打得火熱，仲開晒口明斷Niki 後路：「我哋有一段好長時間冇聯絡，我只係想快啲完結件事。」復合失敗，花弗男鄭嘉穎與姣佘撻著的報道隨即海嘯式衝著他而來。據知情者表示：「過陣個女嘅喺大陸拍劇都成日SMS 嘉穎博復合！至9月12日過晚，三哥、阿佘同埋嘉穎一齊上去摩頓台間club high 玩，同場仲有大班無線幕後工作人員，佢兩個（阿佘、鄭嘉穎）互隊shooter 玩得不知幾high ！之後過個禮拜就有雜誌爆咗佢哋拍拖單料，又無端端有雜誌話鄭嘉穎想SMS 箍煲失敗，好明顯想打佢入賤男系列。」
周麗淇近日又狂向好友監製王心慰訴苦兼狂插負心男，而近日周麗淇逢騷必「謝」，上週六（20日）出席基本法記招，周麗淇繼續謝皮，弱者角色唔怕演，仲好委屈咁話：「合作過都係朋友嘅！」不過當問到有人放料一事，周麗淇則口窒窒話：「吓……我……冇咁嘅事，我唔會回應！」
敵人2號
鄭嘉穎黑開有條路，前女友放暗箭，《烈火雄心3》同劇對手王喜一樣起勢插，之前公開亂
話鄭嘉穎被高層搞，但據知嘉穎捱插只因不滿王喜狂改劇本，谷爆鄭嘉穎曾發火當場鬧王喜：「好咋喎！你再改我真係記唔到，我唔夠你聰明，改到咁我點拍呀！」加上有傳王喜亦是放料分子，二人關係勢成水火。
上週四（18日），《烈3》於將軍澳拍攝外景時，記者問王喜擅自改劇本一事，王坦承有改過，不過就順便插多視帝兩嘢：「我改劇本係為套劇好，但總有人唔高興咋！其實今次《烈3》係over 晒，你知啦，啲巨星檔期都好難夾，不過，今次最遺憾都係拍唔到原著嘅一半，可能唔係個個都戴住面具都交到戲啦，所以唔會再拍《烈火》，太辛苦啦！」至上週六（20日），《烈3》於西貢茅莆山莊拍攝外景，問及有指他放料畀傳媒，王喜即場扯火話：「有人有妄想症！可能佢壓力太大，佢自己妄想出嚟！我冇人哋有咁多內幕嘛！」鄭嘉穎今次與敵同行，佢應該想快啲拍完呢套是非劇。
《蘋果日報》圖片
交足慘情
自從分手新聞一出，周麗淇次次蒲頭都必定交足表情，最初被雜誌問到分手傳聞時就扁晒嘴兼眼泛淚光，事隔兩日再喺商台做訪問，就戴埋黑超出場，甩拖超過半年都咁傷，Niki 真係容易受傷的女人。
陳總三請
據知Niki 除咗有港女性格，對工作亦要求高，入無線拍劇前先執靚個樣，上位後又識揀人合作，咁上進，抵你掂嘅！
《蘋果日報》圖片
嫌拍檔奀
近日正忙於夥拍陳志雲愛將鄧健泓演出《桌球天王》新劇，本刊收風，原先周麗淇唔多願意接拍，由監製唐基明至戲劇製作總監梁家樹至製作資源部副總監樂易玲講到口水乾都請佢唔郁，最後要陳總親自出聲叫BMA 老闆羅傑承交人。而陳志雲聽見記者講及周麗淇嫌棄鄧健泓奀時，諗一諗笑笑口說：「冇咁嘅事，大家合作得好愉快！」
執靚拍劇
周麗淇同家姐周汶錡兩姊妹愈大愈靚，五官愈大愈精緻，雖然佢只承認美貌因箍牙所致，據知佢03年為無線拍攝《翡翠戀曲》前，已經執靚晒先殺入屋，仲早過佢家姐變靚啲。知情人話：「佢仲醒過佢家姐。」
周麗淇同家姐周汶錡姊妹情深，眼見妹妹俾情敵阿佘寸唔知男友花心，周汶錡即時為妹出頭，開口撐細妹：「佢好單純！」咁阿佘都係綿羊咋！《蘋果日報》圖片
與敵同劇
王喜臭口亂
樂小姐「搞」鄭嘉穎後，王喜與鄭嘉穎上週四拍劇時，對住10個鐘都唔見佢哋吹一句水，休息仲要隔到老年咁遠，有幾friend 一睇就知。
煩因早種
上年無線往台灣影月曆王喜都有份，不過有傳佢因為不滿排位不夠起眼，全程黑口黑面，到今年王喜不再跟無線簽約，月曆當然冇份影，不過亦有傳佢因為咁而遷怒於無線親生仔鄭嘉穎。
除咗嘉穎，原來黃宗澤亦是王喜的藐爆目標之一，有人聽過王喜不屑話：「我做主角時，佢兩個仲做緊茄喱啡！」但人哋兩個而家做主角喎！咁你呢？
王喜要求投訴多
除咗同鄭嘉穎唔妥，岩岩簽咗電影《赤壁》監製張家振做經理人的王喜亦有對今次投資千萬製作的《烈3》有唔少不滿，自稱為部劇好先狂改劇本，插人之餘順便抬高自己，高招喎。
手指染黃
自稱04年已戒煙的王喜向記者狂呻話：「無線同消防局借埋啲舊裝備，啲裝備甩色，搞到我手指都黃晒，出街啲人以為我食番煙。」
巨星難就
王喜埋怨《烈3》嚴重拖長，王喜又話：「啲巨星檔期好難夾，搞到我拍外景要密住拍，日日拍近14、15個鐘好辛苦！」
劇本太屎
王喜狂改劇本，只因覺得劇本唔理想，王喜話：「我係改劇本呀，好似呢場救細路女戲咁，我覺得改成我用自己個氧氣罩去救個小妹妹，我覺得冇問題呀！」
昏迷唔忿
王喜表示自己原本於戲中只會昏迷5集，但無端端被加長至昏迷10集，王喜更暗示有人從中作梗：「我冇人哋咁多內幕消息，我一開始只係話我昏迷5集嘅啫！唔知點解後尾變咗10集！」
陳茵媺 「我同阿喜係同一個經理人，佢係一個好好嘅演員，不過，改劇本就……我唔係好清楚，我唔係同佢有好多對手戲！」
陳宇琛 「其實加咗大頭都冇用，個火場環境好黑，又戴咗面罩，加咗都睇唔到樣！」
黃宗澤 「大家合作得好愉快，冇咩事發生呀！我同阿喜平時較少見，至於劇本一早都知係咁去，係得佢有改劇本情況。」
高鈞賢 「我喺（戲中）做嘉穎下屬，所以同佢會比較多對手戲啲，不過，我唔知王喜幫我哋要求過加大頭喎！」
冇人撐王喜
除咗多要求，王喜仲話自己幫其他《烈火》茄角爭取大頭鏡頭：「我幫佢哋爭取每人有幾秒大頭，大家拍得咁辛苦都想有人認得。」不過當日於《烈3》茅莆山莊拍攝外景時，記者問到王喜「為民請命」一事，似乎冇乜人知兼感激領情！鄭嘉穎，你都算未黑得晒！
