王喜昨日得悉自己被指難搞時，反應甚大。
王喜和鄭嘉穎近日忙於拍攝無線新劇《烈火雄心III 》，但兩人在片場內甚少交流，之前又傳出身為無線製作資源部總監樂易玲愛將的嘉穎勁篤王喜背脊，而王喜最近又忽然與無線解除了經理人的合約，令兩人不和的傳聞甚囂塵上。
樂易玲暗寸王喜
樂易玲昨日凌晨到商台接受吳君如節目《嘩！嘩！嘩！打到嚟！》訪問，她在節目內指王喜是個有要求的人，並直認與他傾談過，並暗寸他說：「佢有晒準備，對自己有要求，做晒功課，寫晒要同我講乜，我真係未見過，佢有要求搵多啲錢，亦都冇話投訴無線。」至於有指王喜與她傾談時搞喊她，樂易玲就否認有喊過。樂易玲在節目亦不避嫌大讚鄭嘉穎，當吳君如問到她覺得那幾位男藝員能令她「嗒糖」時，她就直指鄭嘉穎和陳豪都可以。
王喜昨日如常到藍田石礦場拍攝《烈》劇，當現場有人提到樂易玲接受訪問提到他時，誤將「有要求」說成「難搞」，王喜一聽到「難搞」時反應甚大，他還擊說：「鄭裕玲都講過我係好diffcult 嘅人，佢（樂）都冇搞過我，點知我難搞，我哋好少接觸。多謝樂易玲，電視台百幾個藝人都只係提到我。」
有指鄭嘉穎和王喜因拍《烈火雄心III 》而不和，關係越搞越僵。資料圖片
影射嘉穎冇質素
至於是否覺得自己難搞，王喜就語帶雙關說：「我係易搞定難搞就問番搞過個嘅用後感，即係問消費者先知，我返工都唔係預俾人搞，我只係返工做嘢，搞呢樣嘢都唔關我事，我好少俾人搞。」
不過當提到會否覺得是有人刻意放風做新聞時，王喜就說：「自己拍咁多劇都相安無事，之前《珠光寶氣》都冇事，唔同人唔同質素，先有唔同花邊新聞。」似乎暗示拍《烈》劇時才出現這些情況，矛頭直指鄭嘉穎。記者昨日致電樂易玲，她澄清沒有指王喜「難搞」，也從來不覺得對方是一個麻煩演員。
