[報料] 新版大富翁香港矜貴地價貴過北京倫敦紐約

「全球版大富翁」噚日終於推出啦，香港今次搭到尾班車，成功爭取加入「大富翁」嘅新棋盤，都算係一種榮譽。話說大富翁之前搞咗個全球網上投票活動，以票數決定邊個城市可以加入棋盤，總共有500萬人投票，香港就曾經一度「告急」，但最後都能夠以第7名嘅成績入選。

不過，玩開大富翁嘅人都知道，「地價」愈高就愈矜貴，香港出名地價高，雖然今次喺棋盤上嘅地價，及不上最貴嘅加拿大 蒙特利爾，亦不及開普敦同巴黎 等，不過都能列於第三貴嘅區域，貴過北京 、倫敦 、紐約 同東京 等大城市，都算相當架勢。

1000粉絲齊試玩創健力士紀錄

新大富翁即將全球同步推出，噚晚10點，全球20個城市超過1000個大富翁「粉絲」仲一齊試玩，創造咗健力士世界紀錄 。

新版大富翁入面有22個城市，今次仲加入咗電子銀行、理財卡同拍賣按鈕代替鈔票做買賣嘅交易模式，而交通除咗傳統嘅鐵路之外，仲加入咗「海路」同「航空」，聽落都幾先進，但玩法當然同傳統大富翁大同小異啦。

有大富翁活動，當然唔少得96年世界大富翁大賽冠軍、本地校園文學作家畢華流啦！肥畢噚日都有試玩，仲即場傳授大富翁秘笈。佢話，大富翁係一種好「微妙」嘅遊戲，重視技術策略之餘，當然都要靠運氣。對於之前有電視台請咗位「大富翁專家」教路，肥畢就好有意見﹕「佢居然話玩大富翁要留前鬥後，見到地唔好買住，咁講梗係大錯特錯喇，玩大富翁最緊要先掃晒啲地，因為地會升值，咁先至可以幫你揾到錢嘛！」