之前探班發現徐子珊拍喊戲都唔使靠眼藥水，以為做戲有進步，原來只限喊戲，其他戲一樣咁屎，搞到成日要重拍。
29歲徐子珊今年拍劇未停過，先有《甜言蜜語》做聾妹，後有《家好月圓》做大奸角，最近再擔正新劇《美麗高解像》。
做得多唔等於做得好，據知子珊拍攝《美》劇期間，由於演技未達標，搞到經常重拍，拖慢進度，更驚動劇組高層珍姐（曾勵珍）出馬訓示。
被珍姐鬧完不特止，同一眾演員關係亦不見得好，早前徐子珊拍攝被掌摑戲，就慘被對手陳敏之嚟真摑，摑完更誇到要即時敷冰消腫。
被人鬧、被人摑，又撞車的徐子珊，認真黑仔喎！
架車撞到爛，嚇到子珊面青青，但佢都唔敢唔開工，梗係啦，唔開工套劇進度又慢咗喇！《蘋果日報》圖片
一向揸車都唔愛命嘅徐子珊，上週四（21日）因為「避狗」所以炒車，不過有報道話佢架bB 司機位附近有好多餅碎，唔知係咪另有原因呢？《蘋果日報》圖片
上至週四（21日）清晨，徐子珊駕著其白色bB 座駕，往上水拍《美麗高解像》外景期間，由於要「避狗」所以炒車，雖然架車撞到要入廠大修，不過撞親吓個心口嘅子珊都唔敢請假，去完醫院即開工。咁搏命，其實係因為自己戲屎經常重拍，據知已令廠期over 10組（每組約10個鐘，超出10日期）之多，為免進度再減慢，子珊惟有死頂！
珍姐照肺
雖然徐子珊去年曾奪無線「飛躍進步大獎」，又得杜琪
賞識拍處女電影《跟蹤》，嗱埋金像獎最佳新演員，不過今次在《美》劇中飾演女星有大量戲中戲演出，令她演出吃力，導致要經常重拍，情況更嚴重到要戲劇製作總監曾勵珍出面訓示。據知上週二《美》劇在電視城拍外景，作風對事不對人的珍姐就忽然踩場，更就子珊演得差經常重拍，而鬧足10分鐘。
慘遭掌摑
被珍姐鬧未算慘，最慘係早前在廠內拍攝一場掌摑戲，劇情講述陳敏之要掌摑子珊一巴，原本只係借位拍攝，但效果未如理想，最後導演要求「嚟真」，敏之亦聽從導演要求出力真摑。力度之勁，令子珊要即時要求道具組人員嗱冰急敷。雖然子珊「劇痛」，不過在場人士對子珊敷冰舉動不以為然，「敏之過日打嘅力度恰當，只係尊重導演要求冇過火喎，我哋覺得有人小題大做咋！」幕後人員說。
其實徐子珊、陳敏之原屬好姊妹，05年更一同拜詹瑞文為師學戲，但據知有次陳敏之和徐子珊結伴游水，其間忽然有記者殺到，子珊為此大怒認為有人放料，二人亦因而反目。子珊除與敏之唔岩外，同老戲骨苑瓊丹亦有牙齒印，事緣拍《甜言蜜語》期間，徐子珊私下同助導編排rundown ，刻意令廠期進度遷就自己不用呆等，反而苑仔就要拍一場等一場，此事更驚動高層珍姐出面調停，二人亦因此事而面左左。
掌摑實錄
徐子珊被認真摑前，其實事前陳敏之借位扮打多次，可惜出來效果未如理想，最後陳敏之應導演要求認真掌摑，徐子珊中掌之後即時呼痛，更要用冰敷面，其間更怒睥陳敏之，敏之惟有無奈表示：「嚟真拍係咁㗎啦！」但徐子珊就喊咁口表示「冇講過（嚟真）！」
《美麗高解像》監製徐遇安就表示：「我有睇番playback ，我都覺得過一巴好震撼、好真，不過拍之前導演係知會咗兩位演員，兩位演員同意下先拍，絕對唔會一個知、一個唔知咁去拍嘅！（但使唔使咁大力呀?）咁……要逼真，都冇辦法，同埋子珊可能未識就位，食得應咗啲咋！」
陳敏之：嚟真拍係咁㗎啦！（真實對白）
徐子珊：我冇講過！（真實對白）
對於認真摑徐子珊一事，陳敏之透過經理人表示：「唔想愈描愈黑，總之係跟導演要求做。」
獨家村
當透明
其實發生「認真摑」前，陳敏之同徐子珊已經冇乜兩句，上月到大澳取景時，二人唔使埋位時一句偈都未傾過，敏之就同黃長興吹水，而孤獨精徐子珊就惟有傾電話解悶。
劇中徐子珊分別俾陳敏之、伍姑娘摑，一個就認真摑、一個就手指尖揩少少，監製徐遇安就話呢個就係兩位演員火喉問題，伍姑娘經驗好，唔使真打都做到，敏之爭少少!
單打獨鬥
徐子珊有大導杜琪
賞識找她
正飛拍電影《跟蹤》而贏得「最佳新演員」獎，在無線娘家方面亦拍劇冇停手，又有高層樂易玲力撐，想唔紅都幾難，可惜人緣就冇咁好喇！同一眾《美》劇演員冇乜兩句，而且陳敏之、苑瓊丹、伍詠薇亦各有人撐，子珊要搞對抗真係唔係咁易，聽講《美》劇仲有半個月廠期，子珊真係要同人改善吓關係喇！唔係都幾難捱。
我同所有演員都好friend ！（真實對白）
週日徐子珊、伍詠薇二人換上古裝拍攝《美》劇戲中戲。不過就唔係拍掌摑戲，掌摑過場戲已經拍咗。
我冇佢電話號碼喎！（真實對白）
伍姑娘同苑仔超friend ，05年時就一齊拍攝《窈窕淑女》，見苑仔俾徐子珊恰，伍姑娘梗係企苑仔過邊啦！
上月中《美》劇到大澳取景，就發現導演（左）每拍徐子珊一個shot ，都要用5，6take 先肯收貨。
「佢生飛滋呀？」
對於戲屎經常重拍，又同其他演員不和，子珊週日（24日）就無奈話：「拍戲係咁㗎啦！」
F ：《FACE 》 徐：徐子珊
F ：聽講妳成日重拍搞到套劇進度大減喎！
徐：我係有幾場要重拍！因為監製覺得我可以做好啲！
F ：有場掌摑戲你被陳敏之好認真摑咗巴喎？之後仲要敷冰喎！
徐：er....拍戲係咁㗎啦！拍完敷冰好正常啫！
F ：咁妳有冇嬲敏之咁大力打妳呀?
徐：冇……我同佢係好朋友！
至於伍姑娘亦有一場摑徐子珊的場口，不過伍姑娘話只係借位扮打，手指尖僅僅揩到子珊塊面。對於敏之認真摑，伍姑娘就表示全不知情，但問到伍姑娘有冇致電子珊慰問佢炒車，佢就話：「我冇佢電話喎！我淨係有苑仔、敏之電話！」說到子珊戲屎阻廠期一事，伍姑娘就話：「係over 咗，不過我就一場都冇試過要retake （重拍）喇！」而苑仔對於子珊被認真摑就表示奇怪：「吓！打完面要敷冰都係第一次聽，佢生飛滋呀？（上次拍《甜》劇要你呆等喎！）上次我的確係有少少牢騷，而家冇嘢啦！」槍頭一致對外，呢幾位娘子軍認真合拍！
飛車癮？
一直都係狗仔隊目標嘅子珊，一向開車都以快見稱，同佢交過手嘅狗仔隊說：「有次停路邊，突然有架好快嘅車閃過，原來係徐子珊，佢手車真係好快，狗仔隊都難追呀！」
以前揸Mini 細細架，如今換咗架日本水貨bB ，全車白色，都係靠相士指點利佢發展！
唔踩brake
踩行油嘅子珊，一出東隧繼續唔踩brake ，連入彎都唔收油（小圖有著紅燈），徐小姐，好搏啫！
《家好》登場 徐子珊下週色誘阿卡
26集沙灘撻著
徐子珊飾演的Sa 姨女路嘉美見陳豪飾演的阿卡係PR 公司老闆，又係「家好月圓」餅鋪太子爺，於是主動埋阿卡身，仲著晒bra top 玩美人計，睇吓陳豪個冧樣就知佢中晒計啦！
借卡過橋
嘉美俾名店售貨員白眼，即刻急call 阿卡扮自由行大豪客幫佢玩番班店員報仇。
Les 紋身
嘉美同阿卡遊船河時，自爆曾經俾一個大佢4年嘅女仔教佢食煙飲酒，當時不自覺咁鍾意咗對方，又紋咗個女仔名喺身，仲話而家好後悔，博阿卡同情。
24集怒摑荷媽
殷紅知道Jo 飽、
同6個仔女已經全部轉投荷媽陣營，嬲起上嚟走去搵荷媽撩交嗌，仲吼廁所冇人狠狠摑咗荷媽一巴。
狐狸精！你唔好以為每一次踩上門，你都大獲全勝就懶得戚呀！唔係你有把炮呀、唔係你有道理呀，係我要顧身份咋！不過我可以話畀你聽，由呢一秒鐘開始，我乜都豁出去㗎啦！邊個要搞散我頭家，我就同佢死過！
莎姨知道殷紅曾摑過荷媽一巴，特登找佢晦氣，仲錯手將佢推落電梯。
碌落樓梯後嘅殷紅被送去醫院搶救，仲趁呢個機會用苦肉計迫Jo 飽同佢補擺結婚酒。
踎監
因為傷人而俾警察拘捕嘅莎姨，孤零零喺拘留所過夜，勁陰功。
26集莎姨復仇
27集喊住結婚
殷紅迫Jo 飽同佢補擺喜酒，又迫佢請荷媽同班仔女到場，Jo 飽一路唱〈漫步人生路〉，一路諗番起以前同荷媽一齊嘅日子，忍唔住喊咗出嚟。
感動流淚
台下嘅荷媽聽到班仔女祝佢同Jo 飽永遠同甘共苦，亦忍唔住感動到喊。
激嬲奸紅
奸紅強迫幾個仔女上台合唱，阿卡等人為落殷紅面，特登面向台下嘅荷媽敬酒，仲話：「我哋一齊祝福我哋嘅爸爸媽媽，永遠幸福！」激到奸紅即刻黑面。
