2008北京奧運
有人話呢期周圍都見到劉翔影影綽綽，事關今日即使身在香港，只要踏出銅鑼灣、旺角等地，總有「劉翔」喺左近，而判官近排就留意到劉翔嘅最新廣告，似乎隱約透露出其備戰110米欄嘅心理狀態。起初，判官以為係職業病所致，點知日前更從其教練孫海平口中「印證」到廣告所指非虛！
欄王睇同胞奪金激動
京奧110米欄決賽尚有7日開戰，13億人希望嘅劉翔傷後未有亮相正式比賽，因而狀態成謎，但教練孫海平喺新浪網撰寫嘅文章表示，劉翔目前已不能打破世界紀錄，只係向住目標時間12秒90進發！大件事，古巴勁敵羅布斯保持嘅世界紀錄係12秒87，孫教練此言豈不是認低威乎？非也，近屆奧運田徑項目破世績次數唔多，劉翔目前最緊要係做好自己，先別理別人。
孫教練表示，劉翔大腿傷患已完全恢復，唯一令佢擔心係其腳踭傷勢，有時候甚至會導致佢只能做到三分二嘅水準，並預計奧運110米欄若僅跑出13秒，定無法摘下金牌，因此把目標定為12秒90；孫教練又話，最近呢幾日劉翔心情幾靚，每日都有時間睇電視，睇住同胞點樣喺京奧奪金，睇時亦非常激動同高興。
聽落，孫教練或者係為「劉欄王」減壓，亦可能係擾敵之計，但心水清者會留意到，劉翔推出嘅最新廣告中，炯炯雙眼望向前方，身旁敵人轉眼間消失，跑道只剩下劉翔一人，恍若電影《一個人的奧運》嘅現實版，並表達出運動係超越自己嘅概念，要贏人先要贏自己。
乍看，呢輯廣告查實有啲似港產片《神探》最後一幕，從鏡中反照「自己」，但諗真啲又好似《阿甘正傳》中，一個人跑遍全世界。橫睇豎睇，劉翔冇忽似劉青雲或湯漢斯，劉翔就是劉翔嘛！
