曹仁超-投資者日記(14/08/2008)-中國要學星巴克

8月13日，周三。恒生指數跌347.57，收21293.32；成交693.16億元；8月期指跌282點，收21203點；9月期指跌284點，收21136點。

今天工商銀行（1398）跌5.4％，收5.25元，因瑞信降低評級；建行（939）跌6.1％，收6.2元；港交所（388）跌3.1％，收103.5元；聯通（762）跌4.3％，收14.8元；國美（493）跌5.2％，收3.27元；利福國際（1212）跌8.6％，收10.42元。投資組合進入熊市，蝕錢係無可避免嘅事。我老曹去年10月已經採用三七分，即30％投資至今損失唔少，70％資金擺喺銀行亦只能收2.5厘息（美元存款為主）。喺熊市唔係表現勇氣嘅時候。

為發債簽對賭協定

環球資金正由金磚四國（BRIC）回流番美國，今年標普五百指數只回落12％，同期滬深A股回落54％、印度回落25％、俄羅斯回落21％及巴西回落15％。美國減息七次，至2厘；巴西加息1.75厘，至13厘；印度加息1.25厘，至9厘；俄羅斯加息1厘，至11厘；人民幣多次收緊存款保證金率。

滬深三百開始企穩，昨天升0.02％，收2444.67。

聯儲局調查報告顯示，今年第二季80％美國境內嘅銀行收緊貸款標準（4月份調查時只得60％），相信係5月開始股市又再回落嘅理由。本周一摩根士丹利所發行嘅債券，穆廸將佢降級，由Aa3降至A1令大摩股價下跌6.1％；房利美跌3.7％、房貸美跌4.1％、JP摩根跌9.3％及UBS跌6.2％，令股市又再出現拋售。根據Meredith Whitney喺《新財富》雜誌估計，未來兩個月超過二十五個金融機構仲要集資！

《上海證券報》追查碧桂園（2007）今年2月與美林簽署一紙對賭協定，因而累到碧桂園冇咗4.428億元。嗰時碧桂園以19.5億港元融資作為抵押品，合約2013年才到期；如股價上升美林就賠錢，股價下跌碧桂園就有損失。呢份對賭協定作用係為碧桂園發行可換股債券，可惜2月15日至8月12日公布業績時碧桂園股價跌咗36.67％，形成碧桂園賬面蝕咗4億多元。唔少上市公司為咗發行可換股債券而簽咗上述文件者（例如某紙品廠及某造紙廠），隨住熊市來臨，呢D協議紛紛變成上市公司業績虧損。

《上海證券報》亦報道咗國家稅務總局及海關總署打算重新開徵黃金增值稅，呢個建議畀黃金行業大力反對，仲喺度爭拗緊。1994年稅制改革後，黃金增值稅採取優惠政策好似金礦、冶煉生產及銷售等免稅，對配售黃金採取即收即退（即表面上收但即刻退番）；進口黃金原料就實行零關稅。令十四年嚟黃金增值稅係名存實亡。如果奧運之後重新開徵番黃金增值稅，業界認為對佢地呢行打擊好大。

1989年六四事件後中國GDP增長率一度回落到4％；1997年亞洲金融風暴後中國GDP亦回落到6.5％。去年10月起A股回落，相信今年中國經濟開始進入軟着陸期。當年化解六四事件壓力係利用人民幣貶值；化解1997年亞洲金融風暴係推出出口退稅。相信2010年中國嘅內部消費可取代出口，成為中國經濟向上嘅另一增長動力，問題係今明兩年呢段青黃不接期又點？

唔好重量唔重質

今年上半年上游企業（原材料生產者）利潤上升64％、中游企業（原材料加工者）蝕咗8％及下游企業利潤上升32％；其中飲食業獲利上升41.4％，但公用事業卻負增長68％。下半年又點？估計石油及天然氣獲利仍升47％及煤礦升13.7％；內地房地產面對壓力因上半年銷售額減少7％，下半年進入減價促銷期；CPI今年2月升幅8.7％見頂後回落；食物價格4月見頂回落。由於今年工資升幅較大，中國CPI今年仍保持住高增長（例如5％）。因此，整體貨幣政策仍係從緊，個別行業從寬。今年全年出口增長率估計19％及入口增長率27％；下半年人民幣升幅減慢，估計年底見6.6兌1美元。今年上半年出口升幅最大係機械上升35.9％，其次係電子升16.9％，第三係紡織品升15％，其他產品升幅收窄。估計下半年機械出口升幅收窄，反而電子及紡織品仍可保持上半年嘅升幅。

估計A股熊市三期極有可能喺明年出現，至於係邊一季仍要觀望，因影響因素好多，例如油價由147.25美元回落到100美元，定係反覆向上重見200美元？

星巴克1999年只有二千間咖啡店，到去年已超過一萬間；並以每天開五點五間嘅速度增長。結果令管理層犧牲咗品質而搏命追求量嘅增長，喺好多唔應該開店嘅地方亦開店，唔應簽嘅貴租約亦簽咗，甚至連麥當勞亦唔請嘅小伙子一樣照請，因擴充太快唔夠人用。過去錯誤嘅決定係造成今天（或將來）唔愉快局面嘅原因。終於星巴克痛定思痛重新收緊番標準，將唔合規格嘅咖啡店執笠。管理層重新將注意力放番落品質上而唔係數量上，最終結束咗長達三十七年嘅擴張期，努力將經營重點由提升服務達到從前開業時嘅標準。

中國由1998年至去年連續十年GDP保持10％以上嘅速度增長，大量低收入農民變咗製造業生產員工，終於中國亦面對勞工唔夠、原材料漲價及美國需求增長率放緩嘅問題；一如星巴克，中國唔應該再強調GDP增長率而係服務質素，唔好再建造全球最大嘅商場而人流不足，以及唔好再生產蝕本貨。今天全球十大商場有七個喺中國（其中四個較美國商場仲大）。佢地唔係起喺地價便宜嘅美國，好似Alberta嘅West Edmonton Mall（美國人要揸車去買嘢），而係起喺地價昂貴嘅北京。去年中國GDP中49％與製造及出口業有關（美國係20.5％、英國18.2％及日本26.2％），中國點樣由製造業轉型到內部消費而唔引發經濟放緩？銀行收緊信貸，令地下錢莊收取15到20厘息嘅貸款，今年呢次軟着陸都好驚險萬分。

氣候有春、夏、秋及冬；月有圓缺；人往往希望百尺竿頭更進一步（到百尺竿頭仍唔收斂，往往跌進深淵）。以工廠為例，永遠擴充嘅結果係必然有一天面對客源不足而要低價搶客，跟住係蝕本咁爭客去保持市場佔有率，最後就執埋笠。

中國未來五年點樣適應每年GDP只上升8％？更加唔好諗如果有一年GDP增長率只有6.5％（例如1998年）。中國製造業面對生產力過剩，甚至減價搶客，營業額升幅仍然有限。

農產品今年豐收

OECD國家今年起每天石油需求減少六十萬桶（減幅最大係美國達2％），今年石油新需求來自新興工業國，令今年全球石油需求每天仍升八十萬桶（原先估計係一百萬桶），今年新增產量每天一百萬桶；明年每天一百二十萬桶；去年8月到今年7月油價上升唔係因需求增加而係資金由股市流向金市及油市造成，理論上油價今年7月已見頂嘅機會好大。去年12月美國通過限制私家車石油效率法案（係1975年以嚟另一次），由家吓每加侖行17哩標準到2020年每加侖最少行27.5哩，以及汽油內含乙醇量到2020年上升五倍（歐洲標準由家吓每加侖行35哩上升到45哩）。中國部分城市如上海及北京對四驅車抽重稅率去提升汽車用油效率；印度、印尼、馬來西亞及台灣正逐步減少對汽油嘅補貼10％到30％，估計奧運之後中國亦加入。IEA估計，如果各國減少汽油補貼可令全球每天減用四十萬桶油；如中國取消汽油補貼，中國耗油量可減少10％令全球減少3.5％嘅需求，石油立即進入供過於求期。

農產品方面又點睇？過去兩年惡劣天氣令澳洲、俄羅斯及烏克蘭等小麥減產。美國水浸及乙醇計劃亦刺激食品價格上升，超過兩年農作物全球失收喺過去四十年只發生過三次，有理由相信今年起豐收，令供應緊張嘅農產品紓緩下來（天氣難測，今年係咪大豐收，年底先至肯定）。

金屬極受全球經濟景氣嘅影響，其次係能源價格（例如南非電力不足引致金屬減產），中國過去大搞基建令全球金屬價格上升，假設明年全球GDP增長率唔及今年，有理由相信明年金屬價格冇能力創新高。

債券又點？1981年9月30日美國十年期債券見15厘係從來未見過嘅高息；其後債券價格平均每年上升9％（未計利息收入）亦係二百年內少見。2003年6月十年期美國政府債券見戰後最低利率3.1厘後又點？長達二十二年嘅債券牛市係咪喺2003年6月結束？

美元升反為衰退先兆

美滙指數已升穿下降軌，但未超越前浪嘅78點，所以未能確認美元轉勢，短期喺74點到78點牛皮，如升穿78點，美元可睇好，反之只係牛皮市【圖】。過去三年美元兌日圓回落27％及兌歐羅回落33％，今年7月起係咪美元轉強？美元回升顯示美國步入衰退嘅機會極大，令美國人由全球抽番資金回國減債。呢次油價暴跌唔係因供應上升而係需求下降，亦反映經濟走向衰退。

戰後國際貨幣體系以每盎斯黃金兌35美元為基礎，各國自訂與美元嘅滙價，叫做布列頓森林體系。呢個體系係1971年8月15日由尼克遜總統宣布廢除，各國貨幣滙價可自由浮動亦可繼續同美元掛鈎；1976年再簽訂浮動滙率制合法化，各國貨幣必需逐步走向自由浮動唔可以長期同美元滙價掛鈎，1976年後各國貨幣滙價出現更大嘅波動；1987年10月G7聯手逼日圓升值及2005年要求人民幣升值就係嚟自1976年嘅協議。

自1971年美元同基金脫鈎後，全球通脹率唔受控制，今年美元購買力只得1971年嘅4％（即1971年100萬美元身家，今時今日相等於2500萬美元），可見貨幣貶值嘅速度真係幾驚人。

另外，多謝各位支持，研討會廣告刊出兩天內所有入場券已被訂購一空；遲嚟嘅電話已無法滿足。多謝大家仁慈嘅心，協助苗圃為內地籌建學校而慷慨捐款，我老曹代表受惠者向大家鞠躬。