瞇眼報喜 嗱完張有4分嘅會考成績單後，李蘊即時行出班房打電話向李媽媽「報喜」，言談間李蘊流露出一副得戚嘅表情，緊係啦！4分都可以讀大學，唔偷笑就假。
本周一（8月4日）係中五會考生放榜嘅大日子，身為應屆會考生嘅四葉女李蘊，放榜當日不單穿便服化晒妝回校，更即時與同學商量去唱k 練歌兼慶祝。唔好以為李蘊考得好成績直升中六唔使憂，查實佢得4科合格（即係嗱E ），合共4分，重讀中五都冇資格。
李蘊之所以咁老定，全因佢經理人Peter 幫佢報咗名讀「菲律賓比立勤國立大學」，修讀為期三年嘅學士學位課程，每星期只係返一日學，咁李蘊咪可以疊埋心水做明星咋！
雖然成績麻麻，不過李蘊（右二）喺校內嘅人緣都唔錯，嗱完成績單後佢去教員室搵相熟嘅老師（右一）傾偈，老師仲送咗份禮物俾佢添！
見住張4分嘅成績單俾同學搶走，李蘊即時好緊張想搶番。
雖然李蘊唔係高材生，不過李蘊嘅同班男同學（右）透露，其他同學嘅成績大部分都差過李蘊，所以李蘊嘅成績喺同學堆中已經算唔錯。
校內有唔少李蘊（右）嘅校園活動相片，樣子甜美嘅李蘊自然成為學校鋒頭躉。
今年17歲嘅李蘊就讀位於觀塘慕光英文中學，該校屬區內嘅Band 3學校，放榜當日各學生8點半前已返回班房等待派發成績單，不過一身便服、與同學嘆完早餐嘅李蘊卻施施然於8點40分才返到學校。
入到班房，完全唔緊張嘅李蘊不時與身邊友人談笑風生，一副神態自若嘅表情。直到9時，手持一疊成績單嘅老師進入班房，並逐一叫名將成績單派到各人手上，當李蘊接過成績單後，臉上流露出滿意表情，記者還以為她考到好成績，點知其女同學一手搶去她的成績單大叫：「估唔到你咁勁喎！竟然有4分！」
嗱完成績單，李蘊即拉大隊去唱k 慶祝，雖然佢肯應記者要求嗱住張成績單喺校門拍照，但係就死都唔肯打開佢，而其他同學一見到記者舉機影相，即作鳥獸散（右圖）。
李蘊平時出騷或者去無
開廠，李媽媽都會陪伴在側，不過阿女放榜咁大件事，李媽媽竟然冇出現，證明李媽媽緊張阿女拍戲多過佢嘅成績。
大個女嘅李蘊（左一）拍攝《四葉草之盛裝舞步愛作戰》時需要著三點式，企埋趙碩之（右二）等一眾大姐姐身邊亦都冇怯場，不過身材都仲係細路女。《蘋果日報》圖片
唱K 慶祝
15分鐘後，李蘊手持成績單準備離開時，記者聽到她正在與一眾同學商討到卡拉OK慶祝，會考得4分，唔夠分升中六，重讀又唔夠分（該校最少8分才可以重讀），難為李蘊仲有心情去慶祝。
李蘊離開時發現記者，一啲都唔驚訝，仲向記者透露：「我今次會考成績比想像中好，我仲以為會再差啲添！雖然唔係full cert ，不過有四科包括中英數都合格，我已經好滿意。（咁你有咩打算？）應該唔會升中六同重讀中五，經理人會同我安排㗎喇！」
據李蘊同班同學表示，李蘊成績向來都唔好，不過會考期間佢有搵專人補習。
對於李蘊所講的經理人自有安排，記者本周二晚致電其經理人Peter ，他說：「今日『菲律賓比立勤國立大學』已經收咗李蘊讀工商管理學士。（中五畢業都可以讀大學？）過間大學睇中李蘊有豐富嘅社會經驗，所以先破格收佢，呢間大學世界認可，絕對唔係野雞大學，係肥雞大學至岩。李蘊仲會繼續佢嘅演藝事業。」
未夠12歲就入行嘅李蘊，可以話係將整個童年都獻咗俾娛樂圈，雖然會考成績只得4分，不過以入娛樂圈為畢生志願嘅李蘊有經理人公司關照！依家仲有雜嘜大學收咗佢，3年後就可以話自己係哎
大學生明星，唔怪得咁得戚啦！
0分都收！
各位係咪覺得中五畢業就可以升讀大學係一件好奇怪嘅事呢？記者曾致電「菲律賓比立勤國立大學」香港辦事處查詢有關入學資格，發現會考就算嗱零分，只要申請人中五畢業，俾得起一年$15,000學費，不用通過面試就能成功報讀其學士學位課程，每星期在香港上一晚3小時嘅堂，完成三年課程後就能得到所謂「工商管理學士學位」，但該資格只在菲律賓及大陸認可。
