酒店設計類似畢爾包的古根漢美術館，本是酒莊，用色與酒有關：紫紅代表紅酒、金色是包圍酒樽的網、銀色是酒樽頂的金屬紙，烈日下非常搶眼。
身處西班牙北部La Rioja 省，被葡萄園包圍，大戰wine battle ，同熱情瘋狂嘅西班牙人打成一片之後，可以放慢腳步放鬆心情，來趟葡萄園之旅。
首先住進葡萄園中最型酒店，體驗殿堂級建築師Frank Gehry 鬼斧神工，順道參觀百年酒莊，品嚐用傳統方法釀製的紅白酒。帶喺微醺，是歎葡萄spa 的最佳狀態，醒來皮膚滑溜滲喺清甜清香。儲夠力氣，就到山頭走走，落手落腳摘葉折技，舒展筋骨之際，深入了解美酒背後一點一滴。
在La Rioja ，視覺嗅覺味覺觸覺，你可以全方位享受葡萄的醉人甜美。
Marques de Riscal
地址：Calle Torrea 1,Elciego
電話：+34-945-180880
網址：
http://www.luxurycollection.com/marquesderiscal
房價：雙人房每晚$4,030/ 起
連房燈Cloud Lamp 都係Frank Gehry 操刀，加上Alvar Aalto 設計的傢俬，簡單有型。
米芝蓮廚坐鎮的餐廳之外，Winebar 的露天座位有無敵葡萄園景，就算唔係住客，都值得走一轉。
Crushed Cabernet Scrub $967
提子核、蜜糖加黃糖做磨砂，葡萄子油很滋潤。
新酒店與酒莊用上相同材料興建，感覺和諧。
最搶眼葡萄小鎮
LaRioja 有唔少酒莊住宿，唯獨Marques de Riscal ，舉世矚目。多得Frank Gehry，畢爾包古根漢美術館之外，選了省內Elciego 小鎮的1858年老酒莊大顯功架。
還未到達Elciego ，從遠遠山路，已看到酒紅、金、銀色的波浪形鈦金屬屋頂，於一片泥黃色古舊建築之中，反射喺陽光，耀眼至極點，你沒可能「走漏眼」。況且，自從06年落成以後，遊客十居其九為它而來，多得它，Elciego 不再只是十九世紀的寧靜小鎮。
據說Frank Gehry 本來對起酒店興趣不大，然後，他們開了一支存放於酒莊Cathedral近七十年的1929年（Gehry 出生年份）紅酒，令Frank Gehry 想起自己沒翻新過酒莊，便以酒莊的石材配鈦金屬，加建成這間擁有43間房，新舊融和的奢華酒店。
酒店內的Caudalie 紅酒spa ，是西班牙首間以紅酒為材料的spa ，新鮮葡萄配葡萄子油，酵母配蜜糖等等，望喺葡萄園浸紅酒浴，夠歎夠醉了吧？
邊枝葡萄葉要保留，邊枝要清走，Marina 解釋得好詳細。
用傳統皮水壺，拉茶咁款飲紅酒，秘訣係用力唧個壺，紅酒直射入口，唔使驚濕身。
照顧葡萄樹兼「入樽」
西班牙紅酒在港名氣不及法國紅酒，但La Rioja 的深入酒莊之旅，卻與別不同，一般酒莊遊，只限於走入wine cellar 聽講解，好少可以踩入葡萄園，更遑論參與任何步驟。
酒莊之旅全新活動Riojatrek ，贏在可以由葡萄生長至釀成入樽，都有得近距離接觸！導遊Marina 原來係葡萄園太子女，爸爸喺Fuenmayor 山頭擁有好幾個葡萄園，佢自細跟爸爸落園幫手，家陣半路轉攻旅遊，靠食老本行，帶遊客坐van 仔遊葡萄園。
一行人齊齊直闖山頭唔同園地，聽佢詳細講解葡萄樹的排列方法、天氣、陽光等等因素對葡萄生長的影響，睇住佢手上最嫩最青的葡萄葉、岩岩標出嚟豆丁咁細粒嘅葡萄仔，梗係比困喺酒莊齋聽有趣得多。我哋六月尾到訪，Marina 教我哋清走多餘葉，等葡萄有足夠養分快高長大。其實我最想摘葡萄，Marina 話十月有得玩，到時天氣清涼仲舒服！
好在今次都唔輸蝕，去咗佢個家傳十八世紀酒莊，親自用架二百幾歲古老入樽機，親手將07年新酒入樽，空運返屋企。
Riojatrek 活動全程約四小時，導遊Marina 會先帶大家遊覽小鎮Fuenmayor ，然後上山直踩葡萄園，臨走前，佢嗱出西班牙風乾火腿及紅酒，野餐完先去酒莊玩入樽。
電話：+34-941-587354
網址：
http://www.riojatrek.com
收費：每位$272
喺木桶抽出07年新酒試飲，跟住排隊入樽，唔好睇佢笑笑口好輕鬆，我出盡力企埋起身，都唔成功將木塞塞入去呀！
酒莊建於1877年，已傳至第四代，卻絕不落後老化，新起酒樽形wine shop 。
到今日，仍堅持手製木桶，每個會用上十年。
長150米的地下隧道放滿萬五個木桶，幾震撼。
免費睇手製大木桶
只想睇唔想玩，推介另一小鎮Haro 最有名最老的Lopez de Heredia ，志在推廣絕不收費，我跟喺英語流利的導遊走入150米長的地下酒窖，牆上布滿了盤尼西林，溫度濕度都令人舒服，涼得似開了冷氣。
聽她介紹釀酒過程，尾聲仲會睇到木匠親手製橡木桶，將一塊塊橡木慢慢又磨又扭至合適角度，做成滴水不漏的木桶，難得一見的傳統手工藝，不用付出就可以睇餐飽，最後仲試埋兩款grandes reservas ，非好酒之徒也值得一看。
Lopez de Heredia
地址：Avda de Vizcaya 3,Haro
電話：+34-941-310244
網址：
http://www.lopezdeheredia.com
注：酒莊遊不用收費，但必須預約
Calle Marques de Vallejo 一帶正是酒吧街，窄窄街道企滿人，大人細路都岩蒲。
全條街都用橡木桶做吧枱，紅酒區夠晒名不虛傳。
酒吧街飲勻地道紅酒
走勻Elciego 、Fuenmayor 及Haro 三個小鎮的葡萄園，回到省內最大城市Logrono，感受熱鬧氣氛。Logrono 內有一古城區，意料中的教堂、廣場之外，最受遊客歡迎的，是餐廳cafe 酒吧一間接一間的酒吧街。
每間店都將釀酒用的橡木桶放在門口，客人就站在這些木桶「吧枱」旁邊飲酒，飯前飯後整條街都企滿人，邊食tapas 邊傾偈。而且每間鋪都會供應La Rioja 葡萄酒，你可以找到Elciego 、Fuenmayor 、Haro 等等的酒莊出品，就在這裡來一個葡萄園之旅大總結吧！
揀岩時間出發！
由香港去La Rioja ，要先飛巴塞或馬德里，建議順道去巴塞玩幾日，感受截然不同的西班牙風情。
La Rioja 之旅當然圍喺紅酒轉，全年只有六月尾或十月來最好，十月天氣較清涼，遊得舒服，最重要係接近葡萄收成季節，見到串串大大粒葡萄，肯定happy 又興奮。
貪玩貪熱鬧的，必揀六月尾，夾岩時間去wine battle ，徹底體驗西班牙人好客熱情。唔使擔心近節日難訂酒店，因為參加紅酒戰的大多數為當地人，只有部分歐洲遊客，唔會太多人搶酒店。Logrono 酒店較多，以今年為例，我們臨出發前一星期，仲訂到約$700一晚的三四星酒店房間，地點方便，職員也懂英語。
決定好幾時去，記得租定車，因為來往各小鎮的交通工具不太方便，加上要去不同酒莊，都係自己揸車最好，酒量差的人例外。
特別一提，西班牙夏天午飯時間是1pm-4pm ，晚飯則由9pm 開始，所以，想shopping ，一係朝早一係4pm 後，至於7pm 想食飯？無餐廳開門㗎，去酒吧飲吓酒食吓tapas 頂住先啦！
第1日 Logrono 古城區
第2日 Fuenmayor 葡萄園遊
第3日 Marques de Riscal 酒店Claudalie Spa
大型現代化酒窖
Logrono 古城Concatedral La Redonda 教堂
5日4夜行程
第1日 由巴塞轉機至Logrono ，check in 後可到古城區參觀一下。
第2日 駕車前往Fuenmayor ，參加Riojatrek ，在葡萄園野餐。返回Logrono 吃晚飯，車程約20分鐘。（地圖及建議路線可參考
http://www.viamichelin.com，輸入起點及目的地，即列明詳盡路線及所需時間，連公路費、油費都幫你計埋，非常user-friendly 。）
第3日 前往Elciego ，豪得起的話，入住Marques deRiscal 酒店，否則，來參觀酒店及其酒莊睇勻最新及最古老兩部分，兼試試紅酒spa 。（兩小時酒莊遊，收費每位$124）
第4日 一大清早就出發去Haro ，午後可參觀Haro 小鎮及不同酒莊。
第5日 飛往巴塞，繼續西班牙之旅。
有用資料
前往La Rioja ：最近的機場位於La Rioja 最大城市Logrono ，來往馬德里及巴塞隆那，機程約一小時十分鐘，單程機票價約$632起，視乎出發日子而定，於
http://www.iberia.com可查詢每日票價。香港沒有直航往西班牙，需於倫敦或巴黎等城市轉機。
租車：機場及火車站均有租車店，出發前於香港租車更方便，例如avis 有職員解答問題（電話:28906988），亦可上網預
http://www.avis.com.hk。
時差：比香港慢六小時。
貨幣：歐羅，兌換率約為?=HK$12.4（匯率浮動，文中價錢以此計算）。
簽證：持特區護照或BNO 均不用簽證。
旅遊資料：
http://www.lariojaturismo.com
