Freeze 的陳樂榣（Alley ）最近把她跟新男友潘熾恆的親熱相放上網，即被指釣中金龜婿。事關Kelvin 的媽媽鄧婉穎是Gucci 亞太區CEO ，家住東半山三千五百呎豪宅，表面絕對是鑽石王老五。
但據了解，表面風光的Kelvin 事實並唔係咁穩陣。Kelvin 名下並無任何物業，而他駕駛的Audi A4亦屬母親名下，「住」和「行」都靠犀利媽媽射住，上月他更辭去《號外》市場部的工作，「量地」至今接近一個月，Alley 睇怕有排都未上到岸。
上週三，陳樂榣跟男友出席完《深海尋人》首映，即返回佢位於北角英皇道的香閨。當日潘公子打扮樸實，只穿數百元的Abercrombie T 恤，而陳樂榣亦著數百元的Roxy 短褲，唔覺富貴。
陳樂榣（Alley ）一直為新男友是Gucci 亞太區太子爺表現雀躍，拍拖唔夠兩個月已公開戀情。上週三，二人出席完《深海尋人》首映，便拍住拖返回Alley 位於北角英皇道的香閨。
奀模舊仔
今年3月，本刊影到Luke 攬實陳樂榣雨中漫步，但陳話對方只係佢前度男友，唔認拍拖。
富貴新仔
陳樂榣最近將佢同潘太子的親密照放上facebook ，擺明想人知佢有個富貴男友。
騎牛搵馬
據了解，今年3月仍跟模特兒舊愛Luke 難捨難離的Alley 原來當時已騎牛搵馬，暗溝Kelvin 。「係蕭定一介紹佢哋識，Alley 知Kelvin 家境唔錯，主動親近對方，而Kelvin 亦好鍾意Alley 的外形同積極主動的性格。」Kelvin 經過一輪鮮花加SMS 攻勢後，二人終於在兩個月前撻著。搭上太子爺，Alley 便極速飛甩Luke ，全情投入Kelvin 懷抱。
Kelvin 喜歡追模特兒，02年他就跟Ana R.拍過拖。《蘋果日報》圖片
失業太子
跟媽咪同住黃泥涌峽道3千多呎豪宅的Kelvin ，平日以價值71萬的Audi A4代步，出入高級場所。雖然表面睇是「筍盤」，但事實上Kelvin 名下並無任何物業，現居的豪宅更是由母親租住，Audi 房車亦屬母親名下。太子爺唔憂米，最近Kelvin 更辭去工作了兩年的《號外》雜誌助理市場經理一職超過3星期，他的身邊人透露：「Kelvin 到而家都仲未搵到工。」
屈住奀竇
據講仍然「量地」的Kelvin ，唔怕屈就，閒時會去Alley 三百多呎的香閨陪女友，女方亦時常到他的3千多呎豪宅過夜，二人過住半同居生活。
本週日，Alley 跟Freeze 另一成員甄穎珊到馬鞍山出席活動時強調拍拖前不知男友家底厚，「拍拖前都唔知佢係太子爺，佢有錢又點？我屋企都賣菜啦，做批發㗎。」Alley 更說男友媽媽不介意她整過容，「見面食過飯，佢哋唔介意我。」
記者續問Alley 是否因為溝到Kelvin 而飛甩Luke ，Alley 死口唔認，「我哋分咗手半年。」記者致電Luke ，他亦口徑一致，話跟Alley 分手已半年，明顯夾過口供。
雖然Kelvin 仍然待業，但話晒都算太子爺，勝在有個水頭充足的媽咪射住，黐住佢，點都好過黐住個冇字冇花的奀模呀！Alley 都算醒目女。
曾接受開眼頭手術的陳樂榣唔單只整過容，仲經常要著性感衫出鏡，不過未來奶奶鄧婉穎一啲都唔介意。唔通來自時裝界，思想真係新潮啲？
本週日，陳樂榣出席父親節活動時，提起富貴男友就笑到見牙唔見眼。但講到結婚佢就話未有計劃，「我事業剛剛先起步，遲啲先啦！」
拍拖返女竇途中，二人經過「7仔」買水飲，其間Alley 突然話肚痛，Kelvin （後）即急急找數陪女友返屋企。
好睇唔好食
住 300呎女竇
在陳樂榣香閨逗留咗半個鐘後再度外出，據了解，二人已在上址過緊半同居生活。不過單位只得三百幾呎，住開3千呎嘅潘太子睇嚟真係要「屈蛇」先得。
《壹週刊》圖片
住 3千呎太子竇
Kelvin 原本跟媽咪同住黃泥涌峽道怡園，面積達3,000多呎，月租十多萬。住慣大屋的潘公子竟然可以屈喺陳樂榣的300呎私竇，真係能屈能伸。
行 阿媽靚車
陳樂榣跟潘太子離開寓所後，潘太子就揸媽咪公司名下價值71萬的Audi A4去跑馬地買麥記（箭嘴）同女友當晚餐，認真慳家。
勁媽照住
Kelvin 的媽媽鄧婉穎（Mimi Tang ），是Gucci 現任亞太區CEO ，除Gucci 、YSL 和Bottega Veneta 都由她打骰。Mimi 手上持有一個市值１千３百萬的山光道豪宅單位，水頭充足。Kelvin 有個咁叻嘅媽咪射住，唔做嘢都唔使愁。
《蘋果日報》圖片
明星畀面
每年Gucci 的fashion show ，潘母鄧婉穎（中）都會親自出馬請明星撐場，05年佢就請到李嘉欣和郭富城出席Gucci 的秋冬時裝騷。
生活寫意
Kelvin （左）跟媽媽及弟弟（右）上年到關島度假。一家人喺當地又出海又歎名菜，太子爺的生活相當寫意。
