昨日元宵佳節，Cookies餅碎楊愛瑾（Miki）宣佈將於年中結婚，嫁給拍拖7年的永安太子郭永淳，據知，Miki將做6月新娘，為搞夢幻婚禮向好姊妹人妻吳雨霏取經；而於情人節踏入31歲的Miki獲未婚夫親自下廚炮製愛心牛扒，一副標準好老婆口吻表示結婚花費多要慳錢，不需要再送生日禮物，冧爆說：「我哋講心！」
昔日女子組合Cookies餅碎楊愛瑾雖然事業平平，但感情路上就覓得真命天子。去年Miki生日，男友郭永淳帶她到冰島和芬蘭看北極光，在芬蘭的漫天風雪下跪求婚成功。二人相識初期，因郭永淳有老婆伍智恆，一度令Miki背上第三者之名，兩人拍拖7年走過幾許風雨，終於修成正果，Miki昨日到觀塘出席古董禮封喜帖婚嫁珍藏展，宣告將於今年中出嫁做猴年新娘，據知，婚期訂於6月盛夏。
要慳錢生日冇禮物
Miki拿著鳳冠拍照，喜氣洋洋，她說：「第一次見到呢啲婚嫁嘢，之前都唔識，今日嚟可以瞭解嚇。」問婚禮籌備如何？她開心宣告：「今年年中左右，遲啲同大家講。」有指Miki和郭永淳已派喜帖，她否認：「未派，嗰張唔係帖，係送卡畀朋友。」至於好姊妹鄧麗欣（Stephy）爆她在外地搞婚禮，Miki扮儍說：「係咩？點解我都唔知，其實我想簡單去做呢件事，估唔到好多嘢要處理，因為冇搵wedding planner，好在好多客戶支持我，如果唔係好頭痛。」
問到計劃旅行結婚或在香港擺酒？Miki十分口密：「喺香港好多親朋戚友，簡單極都要招呼嚇，點搞到時同大家講。」她透露已影婚紗相，婚紗亦揀好了，但未有時間去拿取：「好多細節要兼顧，會問Kary（吳雨霏）意見，佢係過來人。」Miki坦言會向人妻Kary取經，問會否搵Cookies拍檔做姊妹？她說：「未決定要唔要姊妹，本身想簡單。」
昨日楊愛瑾出席活動公告年中結婚，婚禮將一切從簡。
【雪地求婚】
去年郭永淳帶Miki到冰島和芬蘭慶生，在雪地下跪求婚。
資料圖片
Miki和郭永淳經歷幾許風雨，感情穩定決定拉埋天窗。資料圖片
至於本月14日已踏入31歲的她，問到未婚夫怎跟她慶祝生日和情人節？Miki甜絲絲說：「生日平靜過，喺屋企食飯，未來老公煮牛扒。」問是否整心形牛扒？她說：「正常形狀，仲有意粉同甜品，佢識煮但少煮，之前上網學曬先。」送甚麼生日禮物？她一副賢妻口吻說：「冇呀，我哋講心，結婚使好多錢，要慳啲，平時畀驚喜我開心啲。」Miki於情人節在社交網上載未婚夫煎扒短片，留言表示「大師級水準」之餘，又曬愛：「人越大就更覺身邊的人很重要，尤其那些愛我關心我的，其實有時真的簡簡單單吃一頓晚餐，聊聊天就已經很開心。」
Stephy爆外地結婚
此外，Kary和Stephy昨到灣仔出席活動，兩人都戥待嫁Miki高興，Kary說：「我會出席，做姊妹就未收到通知。佢有問我搞婚禮細節，我都有畀嚇意見，例如流程同寫帖，佢好叻，自己安排好多嘢。」Stephy和男友方力申拍拖到場，她說：「大家都關心我會唔會做姊妹，我未知佢點搞，叫我點都會幫手。」問到Miki在那裡搞婚禮？Stephy說：「香港、外地都玩嚇，詳細未知。」區文詩則在電話說：「佢一切從簡，婚禮未必有姊妹兄弟，佢需要我哋配合儘量幫手，希望佢哋白頭到老永結同心，佢男友平時都對Miki好好，好識錫未來太太。」
採訪：黃曉妍、羅慧敏
攝影：陳俊強
from:
http://hk.apple.nextmedia ... 160223/19501787
