上兩個星期海關終於出手，使用規避條例拉人封鋪，起出一批已改機嘅Wii 同PSP ，以為遊戲界可以重光。
點知更壞嘅消息立即傳出，一直嚴守保安措施杜絕老翻嘅PS3終於失手於老翻，有網上消息指西班牙邪道PSP 改機王Dark Alex 已經攻陷PS3，令PS3可以好似PSP 咁任玩非法下載ISO game ，要保住遊戲界？唯有靠海關加倍落力啲拉人。
PS3玩老翻原理
1.Download Debug 原件，將部機扮做開發機。
2.BT 或Download PS3遊戲ISO
3.拆出PS3內置硬碟，接駁電腦將遊戲檔抄過去。
4.裝回硬碟，便可進行遊戲。
官方開發firmware 流出成街開發機
另一邊廂，亦有網站話一個叫PS3NES 的國外媒體發現「ps3test backup launcher」軟件，可直接從硬碟上玩PS3ISO 遊戲。消息指呢批由Sony 官方流出的debug機的firmware 已經俾人破解，玩家可以響普通零售版主機上安裝，扮做開發機咁就搞掂，咁就可以load ISO 玩，仲有鬼佬成功添喎。
可信度：0%
首先話官方個firmware 流出已經流流哋，再加埋《電玩巴士》網站出面篤爆，好大機會係流。不過，算佢勉強都叫裝到落部機度，只不過係搞到睇唔到Blu-ray 、XMB 介面死，真係信你一成，雙目失明！
老翻信眾跪求改機
PS3被搞掂的消息，源起自名滿邪道界、發明破解PSP 程式嘅Dark Alex ，佢響自己個網頁上加咗個有關PS3嘅blog link ，此舉令網友眾說紛紜，話邪道王已經搞掂PS3。直至上月21號，Alex 仲開咗個討論區叫「Concerning PS3debug firmwares 」，解答一啲有關響PS3上裝個debug firmwares 的問題，因而盛傳Alex 已經對改PS3玩老翻胸有成竹。
但由始至終邪王都無話過自己搞掂部機，純粹答下啲好鬼tech 又唔關改機事嘅問題，十居其九都係響度跪求邪王快啲搞掂部PS3，勁無謂！
可信度：50%
呢50%其實係所有老翻賤人對Dark Alex 嘅期望度，佢以前搞掂過PSP ，個個諗住佢有希望再下一城搞掂PS3，我哋就梗係希望另外嗰50%獲勝，咪畀老翻得勝！
知識產權處未有回應
為防邪道真係得逞，就以呢個傳聞問下知識產權處，如果只係downgrade 程式至舊版本而令PS3玩到老翻，算唔算觸犯規避器件條例，但可惜到截稿日都未有正式答案，只有負責人回覆查詢時，細心詳問事件經過，而著眼點係downgrade 有無改過firmware ，呢個應該係關鍵，希望Sony 方面可以堵塞呢個漏洞啦！
總結
不過，據我電機兒睇，唔理單嘢最終堅定流，PS3啲game 嘅ISO 大過PSP 咁多，吓吓幾十GB ，好似MGS4都話成50GB ，淨係BT 都有排等啦，你仲要買個harddisk 嚟放game ，250GB 先放得幾隻game ，成本要八、九舊啦，買隻game 都係三、四百，平得幾多？仲有喎，好多人當PS3係Blu-rayplayer ，好似電玩巴士咁講，搞完睇唔到Blu-ray ，反而搞到最值錢嘅功能無埋，真係笨到七彩。計我話不如望啲Blu-ray 普及咗，啲game 快啲減價好過啦。
呢個網話段消息係由一個叫Ps3nes 網度流出嚟。又話有人成功，但又話離成功不遠，連邏輯都錯晒，點解人哋成功，你會唔成功。
呢張就係經改裝後的firmware 畫面，可以直讀ISO 。不過，呢啲畫面我電機兒都識出賣，唔可信！
喺呢個
http://www.ps3hax.net就有嗰個debug 可以download ，仲有埋全套教學step by step 。
