李小姐一擲11萬元購買PS3賽車遊戲套裝，她笑言只是受男友所託，自己不太懂得打機。
【本報訊】消費熱繼續席捲全城，電腦通訊節首天人流達15萬，比去年大增50%。有內地女豪客，為男友一擲11萬元購買PlayStation 3賽車遊戲套裝，包括5部40吋3D電視及賽車椅等，是全場最貴；本地人則專攻1蚊限量品，通宵輪候終以1元搶得值3,888元的iPad 2。今日再有限量筍貨，繼續有兩部1元iPad 2。
在灣仔會展的電腦通訊節昨未開幕已有逾千人輪候，大會本聲言派籌時不會像以往註明購買何種產品，持籌者要跑往心儀攤位，但大會昨臨時又派註明貨品的籌。持頭籌的陳先生為免大會又朝令夕改，10時開幕後仍與大批人衝到「潮筍廊」，終買到1元iPad2，「會賣咗舊果部iPad」。
「唔算係使得最多」
1元iPad 2限量兩件，鍾先生拿着第二籌，待搶購人潮散去才上前，怎料工作人員稱：「賣咗喇。」鍾先生拿着籌力爭，終成功購到。他坦言常到不同展覽排隊買筍貨，「用緊部iPad都係上次用$399買㗎。」
大專生陳先生，連相機也搶購不到，改買「1蚊記憶卡」，失望而回。
另一邊廂，居港內地人李小姐慢條斯理地走到SONY攤位，只花數分鐘便買了售逾11萬元的PS3「GT5極致豪華駕駛艙」，「北京嘅男朋友叫我嚟買」。她說從商的男友常買打機產品，「今次唔算係使得最多」。
「估唔到10幾萬蚊咁快有人買。」總經理項明生說，該套裝包括5部PS3主機、5部40吋3D電視、5套遊戲軟件、1張賽車椅及音響套裝等，讓玩家打機時如真實賽車，「但屋企要好大先啱」。他說內地機迷動輒花5,000至6,000元，本地機迷則約3,000多元。
展商都滿意首日銷情，Microworks發言人Holvan說，原價2,250元減至999元的Rollei Tribute碳纖腳架，一個小時已售出50支。他說數碼單鏡反光機及周邊產品越來越受歡迎，故引入美國SpiderPro腰帶，合金扣負重達2.5kg，可掛相機在腰間，免卻相機帶的不便。
「深水埗．灣仔腦場──夏日電腦節2011」同期打對枱，但發現兩展覽定價相若，灣仔電腦城一間店舖的職員蔡先生說，上午時段人流減少了，但下午已回復正常。
from:
http://hk.apple.nextmedia ... art_id=15541066
