好心係好事，但收到任何捐款SMS 嘅話，小心更重要。（設計圖片）
日日都聽到劉華作詞首〈承諾〉，個個電視節目都叫人捐錢，嚟緊演藝界仲有N 咁多個籌款show 。賑災，係長期作戰嘅事嚟。
不過，好心都未夠，做善事仲要小心。電機兒睇警訊已見有騙徒貼個假戶口喺ATM 呃錢，網上forward 嘅捐款account 亦可能係假，最好check 真啲。最近連3HK 都話有人假冒佢哋名義發捐錢SMS ，遲吓可能仲多呢類靠SMS 呃人嘅case ，香港人咁鍾意用SMS ，以後真係要睇清睇楚，唔好咁易上當呀！
訛稱3HK 會捐錢
呢個假冒3HK 發出嘅SMS ，內容話收訊人只要轉發一次該SMS 畀其他人，3HK 就會捐錢去賑濟四川災情，轉發嘅手機用戶亦有機會獲贈通話分鐘。假SMS 出現後，3HK 已即時喺網站貼上啟示作出澄清，話SMS 內容並不真確，亦絕非由3HK 發出。事後有網友話收過呢個SMS ，對番發訊人號碼的確唔係3HK 慣常發SMS 用嘅號碼。
事發後3HK 即時喺網站加上pop-up 啟示作澄清，等人唔會睇唔到。
有網友都話真係收到呢個假3HK 捐款SMS ，不過就冇轉發到。
有其他台（例如SmarTone-Vodafone ）就真係有透過SMS 嚟籌款。
騙徒冇乜著數
睇落今次個case 同以前喺香港發生過嘅SMS 騙案唔同，因為個SMS 係要收訊人轉發短訊畀其他人，而唔係回覆指定號碼，單憑轉發呢個動作係幾難呃到人錢。而且你轉發咗，3HK 捐唔捐錢，你都唔會有損失，頂多蝕1蚊幾毫SMS 短訊費，所以呢個假SMS 似係純粹玩嘢性質多，事實亦未有人出嚟話因呢件事而有金錢損失。
拆解：
一般由3HK 發出嘅SMS ，號碼都好長，唔同一般手機no.，幾易識別。有乜唔明，最好打去熱線問清楚3HK ，咁就實唔怕上騙徒嘅當啦！
3大SMS 騙錢橋
大陸嘅SMS 騙案一直好猖獗，近兩年啲騙徒仲殺埋落香港，唔只借住你嘅貪性嚟犯案，仲會扯埋你嘅親友落水，等你防不勝防。
大陸曾經有人借Samsung 個名嚟行騙，搞到香港Samsung 都要發聲明澄清。
獎金引落疊
易中招度：60%
香港出現得最多嘅SMS 呃錢橋，手法係冒充大集團發出短訊，話收訊人喺一個抽獎活動中贏咗巨額獎金或獎品，但要求收訊人畀一筆幾千蚊嘅行政費（或叫手續費、公證費之類），費用要存入大陸一個指定戶口。萬一你存咗錢，騙徒就袋袋平安。
拆解：咁樣呃錢橋我知你唔會落疊，但你屋企嘅老人家可能會，記住睇實佢哋呀！
上大陸，成日會收到服務SMS ，千祈咪理。
回覆服務短訊
易中招度：70%
大陸網絡商有個制度，好多時都會同其他機構合作，通過回覆手機短訊嚟確認使用某啲手機服務，然後網絡商就直接過間機構收取費用將啲錢加喺你月費入面。因為有呢個制度，大陸就衍生出好多呃人嘅SMS ，send 嚟叫用乜用物，但根本冇過樣服務畀你嘅，更白癡就係叫你回覆短訊買六合彩必中號碼。
拆解：查實呢個制度都幾危險，所以如果你成日上大陸，有大陸手機帳戶嘅話，見到咩來歷不明嘅SMS 都千祈唔好覆。六合彩必中號碼？會中都唔會同你講啦吓話！
用儲值咭都有機會畀人呃錢，小心！
儲值咭做手腳
易中招度：80%
「神州行」之類嘅中港兩地通用儲值咭，都可能成為SMS 騙案嘅幫兇，方法係騙徒用自己嘅手機假扮你，向你嘅親友發出SMS ，話自己張儲值咭嘅金額用晒，又唔方便增值，於是要求親朋代為買增值咭，然後循回覆SMS ，將增值咭上面嘅密碼send 畀你知。咁樣最後收到密碼嘅會係騙徒，佢就無端端會有$100至$500嘅增值面額，可以再自製老翻增值咭拎去賣，密食當三番，多啲嘅親友上當嘅話，都呃到唔少錢。
拆解：呢個方法需要知道你親友嘅手機號碼，有啲機器可以好快咁抄出你部手機入面嘅所有號碼，所以唔好咁易將手機交喺人手，簡單到畀人叉電都要
到實。
睇清6大台籌款活動
3HK 嘅賑災短訊係假，但其他台確實曾透過SMS 嚟呼籲捐款，電機兒就問齊6大台，問清楚佢哋有冇搞過類似嘅運動。
3HK ：冇透過SMS 籌款，但於WAP 網站Planet 3內開設捐款收集渠道，讓用戶透過手機捐款。
SmarTone-Vodafone ：有發起SMS 認捐運動，回覆短訊打入指定數字，便是認捐特定金額，善款在客戶賬戶中扣除。
CSL （One2free 及1010）：發言人話截至5月尾都冇任何籌款活動，但正考慮舉行。
新世界傳動網：冇手機籌款活動，但於門市設有捐款箱。
PCCW Mobile ：截稿前未有回覆，但電機兒搵唔到官方資料話有籌款活動。
PEOPLES ：有發出募捐短訊，客戶回覆短訊即可認捐$10。
電機兒
見盡奸商、騙徒，恃住有幕後高人力撐，唔怕得罪人，有過句講過句！
