劉德華前晚繼續喺紅館做個唱，請咗Twins同at17兩隊組合做嘉賓，其中Twins仲有特別任務，佢哋出席完新城頒獎禮，就做人肉速遞，將「全球勁爆最受歡迎至尊歌手」獎送畀華仔。
華仔介紹Twins出場時，好感慨咁話：「我睇住佢哋入行，佢哋好多嘢都同我好似，一樣行過高高低低，每次我失意嘅時候，都會收到佢哋SMS安慰。」華仔知道Twins幫佢帶咗個獎嚟，一臉驚喜笑住話：「乜唔出席都有獎攞o架？」
阿Sa同阿嬌不停狂冧華仔，話自己係華仔超級fans，仲係歌迷會嘅永遠榮譽會員，不過華仔就踢爆佢哋近年好少參加歌迷活動。之後Twins唱咗首《女校男生》，但阿嬌有啲走音。
講歌藝Twins當然唔及at17嘅林二汶同盧凱彤，佢哋一出場就同華仔合唱《我恨我痴心》，一齊rock爆紅館，其間現場氣氛high到極。
華仔今次個唱主題係紀念三十年，佢同at17話：「我以為你哋同我一樣，都係17歲入行，咁咪好有意思囉，點知原來唔係！」二汶話：「錯有錯着啦，你有首歌係《十七歲》，我哋又叫at17嘛！」之後華仔道歉，話之前獲邀請兩次，都做唔到at17演唱會嘉賓，仲承諾下次一定會幫手。
from:
http://hk.apple.nextmedia ... art_id=14820663
