上月尾被陳志雲欽點、代表無線攀登珠穆朗瑪峯報導奧運聖火傳遞的王喜，其間因為兩度出現高山反應，送院時又發生車禍，講到幾乎無命返香港，但大難不死，必有後福，王喜獲陳志雲安排在新劇《烈火雄心3》加重戲份作補償。副車變正印，令同劇演出的鄭嘉穎，被貶為三線男配角。
王喜有後台力撐，加戲路路暢通，反而女主角之一的胡杏兒，為怕被來勢洶洶的陳茵媺搶戲，親自要求加戲卻不果，真係同人唔同命。
加戲補數
上星期二（五月十三日），無線新劇《烈火雄心3》舉行開鏡儀式，受傷未癒的王喜，以第一男主角身份在拜神儀式上，負責為舞獅點睛，反而分屬無線親生仔的鄭嘉穎，卻要行埋一邊做陪襯。
「阿喜拍過第一同第二集《烈火》，今集本來都係男主角之一，不過佢響珠峯受傷，陳生（陳志雲）覺得要做番啲嘢補償，咪加重佢戲份，仲下令先開文戲，等阿喜好番啲先拍動作場面。」知情者說。
陳總賜福，王喜坐正，搞到另一高層樂易玲契仔鄭嘉穎，戲份相對被刪減，淪為三線男主角，反而黃宗澤尚且保得住第二男主角地位，就算鄭嘉穎幾唔開心，一樣冇得SAY 。
「公司嘅人都知陳生同樂小姐鬥得好緊要，不過陳生係六嬸心腹，職位又高咁多，根本冇得鬥，陳生要俾多啲戲阿喜，邊個夠膽話唔得。」一名幕後工作人員說。
先下手為強
男主角重新排位，女主角之一的胡杏兒為怕殃及池魚，亦先下手為強，要求公司加重戲份，再加上，近日無線明顯力谷身材有番咁上下的陳茵媺上位，安排對方跟自己的緋聞男友黃宗澤做情侶，胡杏兒當然唔想戲內戲外有任何閃失。向來懂得為自己爭取的胡杏兒，早在○三年跟李彩華合作《下一站彩虹》時，試過改劇本加戲份成功，大大刪減李彩華在劇中發揮的機會。食過翻尋味，胡杏兒遂跟高層討價還價。
「佢早排已經走上去同高層講要加戲，猛話自己嘅戲份太少，交代唔到劇情，其實佢係女主角，同阿喜一條線，不過陳茵媺嘅角色好有發揮，佢驚自己啲戲唔夠人搶，保唔住一姐個位。」知情者說。
只可惜《烈火雄心3》男人戲份比率較重，又以消防員英勇救人的故事作為藍本，高層認為無必要作出大改動，女角戲份決定維持不變，胡杏兒無論幾得寵，只能吃閉門羹。
王喜在《烈火2》的角色早已被炸死，不過經陳志雲欽點在第三集翻生，開鏡當日，更被安排點睛，連做開第一男主角的鄭嘉穎都要靠邊站。
王喜在珠峯兩度出現高山症及在送院途中發生車禍，可謂禍不單行，好在陳總補番數，加戲錫番。
去年10月，記者影到樂易玲同契仔鄭嘉穎「撐枱腳」，兩人一見記者即一臉尷尬。
你企歪啦！（設計對白）
