娛頭:買AP錶訂波子 佘詩曼貼仔 吳卓羲食軟飯
廿九歲的吳卓羲自從○七年被踢爆撇甩官恩娜，搭上比他大四年的佘詩曼後，逐漸變得修心養性，再無新女埋身。原來要花心男唔玩唔溝女，離不開一個錢字。
據知，曾有「使人錢」往績，又鍾意豪fing 扮富貴的吳卓羲，睇準女友疏爽闊佬性格，拍拖年多以來，不斷有所要求，近日更冧得對方送贈二百多萬保時捷跑車，以及二十萬AP （愛彼）錶。
有阿佘照顧，吳卓羲揸波子、戴貴錶、住大屋，無缺。
黐有錢人
○○年出道的吳卓羲，一直愛黐「有錢人」，先有一手帶他入行，以及借了五十萬給他的古天樂，不過向來愛充大頭鬼的他，換車買名牌有錢唔還，兼且又在外面唱衰好友，導致反面收場。
一雞死，一雞鳴，沒有古天樂仗義疏財，吳卓羲又泊得另一個好碼頭，跟有個富爸爸稱作廈門李嘉誠的林峯玩埋，兩兄弟不時孖住去蒲，吳卓羲慳番唔少。
「林峯鍾意做大佬，食飯去玩都一定係佢埋單，有時又會送名牌禮物俾朋友，吳卓羲都收唔少，咁多住數試問佢點會唔黐埋去，好多人仲笑佢係林峯跟班添。」幕後工作人員說。
冧女有一手
不過自從○六年尾年跟無線一姐，穩守最賺錢藝人第二位的佘詩曼合作電視劇《歲月風雲》撻住後，吳卓羲開始減少𠝹女，加上負面新聞太多，被無線放逐到內地拍劇以示懲戒，為免雪上加霜，吳卓羲刻意收斂，規行矩步。
「大家都估唔到阿佘今次玩認真，鍾意一個細過佢，賺錢又少佢咁多嘅男人，不過吳卓羲冧女有一手，隨傳隨到，唔出去玩扮晒一條心，仲成日講爛gag ，冧阿佘開心。」知情者說。
有來有往，得把口的吳卓羲冧得出手闊綽的阿佘以厚禮回贈。數月前，阿佘知道男友睇中價值接近二十萬，AP的Royal Oak Offshore Chronograph 手錶後，就二話不說送給對方。
「吳卓羲從來都唔避忌，成日有意冇意就晒女友送咗隻二十萬嘅錶俾佢，仲日日戴住開工，早排連拍《學警狙擊》都戴住出鏡，大家都知拍劇周圍撞，不過佢就完全唔緊張，戴得好粗。」幕後工作人員說。
愛晒命
廿萬名錶當然不能滿足要威要型的吳卓羲，個多月前，他又落足嘴頭，要求女友購買最新型號，價值二百多萬的保時捷911GT3RS 跑車，雖然要等成半年新車才到，但吳卓羲已急不及待跟朋友晒命。
「佢好興奮，成日同人講嚟緊會有架二百幾萬嘅跑車揸，好多人都知以佢嘅收入，根本就買唔起咁貴嘅車，不過大家都估到邊個買俾佢，但佢就好似唔覺得咁使阿佘嘅錢有問題，其實好多人背後笑佢食軟飯。」知情者說。
恃住有阿佘照顧，鍾意晒命扮勁的吳卓羲，平日開工照樣一身名牌，拍劇期間，又會有意無意間跟劇組人員透露一個人住一千五百呎大單位：「以前六百幾呎唔夠住，搬咗去千五呎，一個人住咁大地方，又有啲唔習慣。」
搬大屋
吳卓羲之能夠細屋搬大屋，都是多得女友經濟支持。拍拖以來，二人不時逗留在吳卓羲位於清水灣半島的住所，過二人世界，為有更大空間，阿佘遂提出幫男友換屋，以二萬元月租租住同一屋苑較大單位。
去年年初，阿佘就被目擊在吳卓羲家中玩通宵，翌日清早坐在男友的Audi 溝女戰車後座，由清水灣出發到中環碼頭開工。
上星期五（五月十六日）晚上九點左右，吳卓羲身穿Alexander McQueen 衛衣，戴住接近二十萬的AP 手錶返將軍澳電視城開工，不過一見記者舉機拍照，就表現得十分驚青：「做乜要影相呀？」
戴手錶的左手更愈縮愈埋，記者問他手錶是否阿佘所送，他更以趕住開工為由，急步離開。
差天共地
佘詩曼貴為無線一姐，去年收入超過600萬，成為經理人部門旗下最搵錢藝人第二位；而吳卓羲自泰林電器「賣飛佛」後，廣告收入近乎零，年賺幾十萬，同一姐阿佘差天共地。
佘詩曼07收入
廣告：香港體檢 50萬
雅芳婷女兒紅婚慶系列（中、港） 100萬
白絲嬌麗護膚系列 100萬
伊之情骨膠原面膜 100萬
電影：《美女廚神》 25萬
活動：內地（金至尊、卡地亞等）15個×8萬= 120萬
香港（Naturally Plus 、Minceur 等）20個×4萬= 80萬
登台：5場×10萬= 50萬
總收入：625萬
吳卓羲07收入
電視劇：《少年四大名捕》×40集（$5,000一集）= 20萬
《歲月風雲》×60集= 30萬
內地《巧克力情人》×20集= 10萬
活動：香港（Columbia 、Armani 等）
約15個×2萬= 30萬
總收入：90萬
一味靠黐
古天樂
舞蹈藝員出身的吳卓羲，99年因黐住古天樂而得到對方幫助，由月薪只得數千元的dancer ，升為無線包薪藝員，其時，古仔還不時向無線高層、監製推介對方拍劇。
譚詠麟
成功黐埋樂壇教父譚詠麟身邊，首次上《勁歌金曲》便得阿倫即場教路，他更十分識做，稱對方為兒時偶像及最欣賞之藝人，為打入樂壇落足「鞋油」勁擦。
梁靖琪
06年拍攝《學警出更》時，黐實無線高層梁家樹女兒梁靖琪（Toby ），更傳出緋聞炒作一番。
林峯
二人於03年拍攝《大唐雙龍傳》時，因同屬「溝女」族而成為好兄弟，隨後吳卓羲就有有錢「大佬」林峯照住，陪玩陪蒲。
陳百祥
被指事業跌入谷底，為要有更多演出機會，黐實老闆陳百祥搏反彈，更陪對方歎茶，全程必恭必敬。
訂波子
上週五，吳卓羲戴住接近二十萬嘅AP 錶返廠拍劇，身上仲著住閒閒哋幾千蚊嘅McQueen 衞衣，果然係唔名牌唔著。
吳卓羲雖然只有中三程度，但因口甜舌滑冧得阿佘好開心，所以阿佘近日豪擲二百幾萬買了一部波子送給愛郎。只要把口得，真係要乜有乜。
買AP 錶
