真面目:拖累同門 英皇出令禁Isabella過主人在紐約學好外語的梁洛施（Isabella ），最近出招指與英皇已簽的5份合約存在不公平的限制條文，不會履行，立即觸動英皇神經，上週四（3日）出招還擊，入稟法院控告Isabella 毀約，對簿公堂指日可待。
Isabella 反骨連環升級，據知除有小小超李澤楷撐腰外，還有個「再世阿媽」楊紫瓊背後做指揮，19歲Isabella 坐定笠六，在紐約ready 貴婦生涯培訓。自己闊婆懶理，最慘累及同門，有傳英皇為儲彈藥打官司，決定開源節流實行精英制，師弟妹多得Isabella 唔少！
一場贖身官司辣埋同門飯碗，Isabella 真係累街坊。
5月返港
上週英皇入稟法院控告Isabella 毀約前，其實梁千金已先發制人，透過律師指合約無效，拒絕履行。雖然官司纏身但Isabella 一直懶理，繼續響美國學英文歎世界。
去年拍《盜墓迷城3》後，楊紫瓊當Isabella 好似親生女咁錫到佢燶，上月尾兩人更響紐約孖住一齊豪飲豪食。19歲身穿30萬皮草及Chanel 高踭鞋嘅Isabella ，十足闊太咁款。
新舊陣形
有指曾勸李澤楷擱置Isabella 贖身計劃嘅李進，近日忽然向小小超辭職，但小小超並冇放棄Isabella ，有傳楊紫瓊及張家振近日合組的新經理人公司，幕後水喉乃小小超。
兩年前Isabella 曾因與陳輝陽拍拖而被掟入雪櫃，但解凍後，老闆楊受成及經理人Mani 依然好錫佢，上年出席公開活動，仲左右護法咁傍住佢，今日就反晒面。
兩年前Isabella 被雪，有傳梁母曾拖住囡囡向Mani 跪地求饒；如今忽然富貴，真係母憑女貴咯！
梁洛施與楊紫瓊大搖大擺在紐約的「紅娘宴」後，還遙控律師出聲明，拒絕執行與英皇的5份合約，英皇還炮入稟告她毀約，官司大戰一觸即發。
與英皇擘面，尚餘13年賣身約的Isabella 話之你，「佢（Isabella ）如果仲未有行動現身溝通，聽聞英皇會響呢個月尾前出禁制令，禁止Bella （Isabella 暱稱）同第三者接洽任何新工作。」知情者說。
紅娘軍師
Isabella 有毛有翼，楊紫瓊在這場官司角力賽上扮演重要角色。有指楊正與曾替周潤發及吳宇森鋪路到荷里活發展的資深幕後製作人張家振，和台灣媒體人唐在揚，正籌備成立一間製作公司，有傳幕後大老闆是李澤楷，有小小超做後盾，楊紫瓊雄心萬丈捧Isabella 做荷里活巨星，「Michelle （楊）同Bella 合作《盜墓迷城3》後，一直待佢好似親生女咁錫。有人仲教佢改電話，要過新生活，而Bella 又真係信佢多過信親生阿媽添！」知情者說。
跪地哭求
據知，楊紫瓊曾代Isabella 與《盜墓迷城3》的荷里活公司交代Isabella 的宣傳事宜，直接做對口人，當然觸動英皇神經。「仲有合約就點都要交代，Mani （霍汶希）由Bella 12歲開始湊佢，真係睇住佢大，而家咁都好傷心。」知情者說。
據知，06年英皇因Isabella 失場鬧助手、兼戀上音樂人陳輝陽，而雪藏她時，Isabella 曾與其母跪地哭求經理人Mani 不要放棄她，還應承會聽話，最後才加簽5年合約，當時Isabella17歲，已屬成年人。
Mani 本週一對記者說：「之後單官司搞成點都好，我哋都係想同Isabella 繼續合作，佢話晒都係細路女啫！」
轉行精英制
要與Isabella 的律師團打官司，英皇預咗要長期作戰，請得大狀清洪打官司，條數都好襟計，所以要開源節流，更採用精英制將旗下歌手分級，賺錢能力高就重點培訓，相反谷極唔起就要用聰明方法慳錢啦！
高材生
淫照事件將阿嬌一鋪打沉，英皇惟有力谷阿Sa 一個人搵兩份錢；容祖兒貴為一姐當然穩如泰山；而謝霆鋒近年成功打入內地搵人仔，自然受到重點培訓啦！
停學
阿嬌形象插水被迫停工，所以暫時唔會擺太多資源響佢身上；而李逸朗同Sun Boy'z 其中兩子則會與英皇維持經理人合約，唱片約就中止，唔再出碟。
出校
由3T 時代到同李逸朗情侶檔，Mandy （蔣雅文）都不算受歡迎，最近雙方同意下決定解約，Mandy 會轉行讀室內設計。
海外生
三人有一定知名度，不過半紅不黑，唱片銷量又一般，英皇只好將佢哋流放到台灣及內地拍劇，幫補收入。
升級
四人潛質優厚，市場反應唔錯，所以英皇決定繼續投放資源訓練成為明日之星。
等考試
仲係新人嘅湯怡同馮皓詩未正式出道，英皇對二人採取觀望態度，出唱片太冒險，正落力硬sell 給各電影公司，拍戲賺錢好過。
《蘋果日報》圖片
《蘋果日報》圖片
《蘋果日報》圖片
