探熱針:Juno老豆反對 阿嬌嫁入豪門撻Q
鍾欣桐（阿嬌）捲入淫照風暴後，人氣、事業急轉直下！
事件擾攘一個多月，阿嬌由淫照事件第一女主角，變為Juno 嫂，兩人唔單止不避嫌戴情侶戒指，Juno 日前更用六個「好」來形容與阿嬌的關係。
以為得米可以嫁個有錢人，但Juno 父親，中建集團主席麥紹棠眼見愛兒意亂情迷，已向Juno 暗下指令，講明唔會俾阿嬌嫁入麥家！
向Juno 求婚
淫照曝光，阿嬌第一個站出來面對事件，卻因「天真論」遭狂插。面對歌迷轉戶，廣告客通通雞飛狗走，嬌媽擔心無人搵錢養家日喊夜喊，當事人反而一副淡定姿態，只因她以為身家億億計的闊少Juno 會養她下半世。
二人緋聞其實早於去年便傳出，當時不少圈中人及唱片公司人員都知道阿嬌正向Juno 狂施仲功，又電話又短訊，只要龍少呻悶，她就會飛撲出現陪飲陪食，隨傳隨到，將本身圈中朋友不多的Juno 迷到暈陀陀。
「外間以為佢哋係拍《破事兒》撻著，其實阿嬌上年年中已開始對Juno 好主動，唔係拍戲點會俾Juno 錫！後來多咗人知，但就變成佢追阿嬌，又話『癩蛤蟆想食天鵝肉』，搞到Juno 好唔開心，不過阿嬌一個電話，扮晒無辜話唔知道公司會咁做，又話可以放棄事業同佢結婚，Juno 又俾佢冧番，以為阿嬌真係可以為自己放棄一切，完全無諗過對方唔只佢一個。」Juno 身邊友人說。
父親下禁令
淫照流出後，Juno 在陳冠希回港交代事件前怒斥拍照者是「人渣滓中的渣滓」，最近又以六個好字來形容他同阿嬌的關係，甚至不介意阿嬌過去等言論，可想而知，阿嬌在他心中位置有幾重要。
不過，當被問到今年底迎娶阿嬌的傳聞，Juno就以「我無諗過結婚」及「我的年紀未到結婚」回應。Juno 之所以對婚事有保留，原因是父親麥紹棠要他清楚表態，以免有人諗錯隔籬！
「Juno 老豆一向唔多理娛樂新聞，而且佢知道只要佢唔放水，Juno 無可能有錢做任何嘢，直至最近傳到Juno 要同阿嬌結婚，加上Juno 對結婚問題講到疑幻疑真，佢老豆擔心個仔嚟真，所以即刻召集Juno 、大仔麥浚翹（大寶）Juno 媽咪一齊開家庭會議，話唔會阻止Juno 交朋友，但就反對阿嬌嫁入麥家，更加唔希望太多閒雜人響麥家出出入入，所以Juno 最近接受訪問咪即刻縮晒，無結婚打算囉！」知情人說。
有大佬睇實
父親下聖旨，Juno 唯有暫時將感情冰封。
至於原本諗住坐定粒六嫁入豪門的阿嬌，得悉Juno 公開講無諗過結婚，立即向他發短訊「發功」，提出今個月十八日是Juno 廿四歲生日，陪他過一個浪漫的二人世界，企圖力挽狂瀾！
不過，Juno 阿哥大寶已奉父母之命看住Juno ，阿嬌要嫁入豪門邊得咁易，阿嬌實在太天真，太傻！
十億太子爺
Juno（麥俊龍）為上市公司中建集團太子爺，老豆麥紹棠身家賬面保守估計至少十億，單是Juno 所住的淺水灣道五十六號4棟雙連豪宅已值3.7億。此外，Juno 入行六年出7張唱片，單是宣傳費已過千萬，勁過天王天后。
住豪宅揸靚車，身上全部貴嘢名牌潮物的Juno ，平日有保鏢貼身保護，除了有司機駕駛其豪華七人車外，年前麥紹棠為了祝賀愛兒考到車牌，即一擲274萬買架法拉利F430送給Juno ，豪爆。
大迷信
阿嬌○四年接受訪問時曾承認自己迷信，表示自小已隨母親四處拜神，其母更把她契俾觀音，入行後又曾找英皇御用風水師陳伯指點迷津，今次淫照風波令其事業毀於一旦，據知英皇曾於上月中秘密派高層到台灣向命理界高人李昭穎求教，並獲教路，要穿白衫擋災，是以淫照事件後，阿嬌多次現身，均以白色打扮！
無得傾！（設計對白）（《蘋果日報》圖片）
為冧Juno 開心，阿嬌經常買嘢買雙份玩情侶裝，淫照事件後，首見傳媒時，阿嬌便戴上同Juno 同款的戒指，刻意讓戀情浮上面。
俾次機會啦老爺！（設計對白）
