肥肥已長眠於溫哥華淨土，追思會昨在紅磡香港體育館舉行，六千人到場含淚道別，但在莊嚴的追思會上，肥肥「大哥」鄧光榮突然發難，公開斥責肥肥前夫鄭少秋無盡責任，叫他上台交代，場面尷尬。鄭少秋在女兒欣宜陪同下臨時上台解釋，坦言因婚姻失敗而無好好照顧欣宜，在肥肥病重期間，欣宜因種種理由婉拒他探病，最終錯失機會。欣宜面對此突如其來的風波亦處理得體，力撐父親之餘，也希望大家不要被是非「影響到我哋懷念我媽咪」，其言論惹來全場掌聲。
肥肥病重以至過身後，一直未見鄭少秋現身，他備受千夫所指，鄧光榮致悼詞時突然激動地說：「我好奇怪個女（欣宜）無老竇咩？點解（照顧欣宜）責任落晒喺世叔伯、auntie 度，點解依家先見到鄭少秋出現，秋仔你上嚟同大家表白吓！呢啲年嚟，你對阿肥付出嘅係乜嘢？對個女付出乜嘢？如果你話唔理個女，唔緊要，我哋喺度，你上嚟啦！」其發言令全場起哄。
鄭少秋此時在台下露出牽強笑容，欣宜也表現無奈，原無獲安排上台發言的鄭少秋，在欣宜陪伴下上台，他先除帽向肥肥遺照鞠躬，毫不介意首次當眾展露其清裝頭。他其後緩慢地說，「大哥」因失去肥肥，當然很難過，他亦正好借此機會回答鄧的提問。
「唔好影響我哋懷念媽咪」
他感慨地說：「我一直唔能夠好好照顧欣宜，就係我同阿肥嘅婚姻失敗咗，阿肥就將欣宜送去加拿大，我為口奔馳，喺香港不停工作，又走去內地同台灣，先能維持到我嘅生活，當然無機會照顧到欣宜，但係我都有盡量同欣宜聯絡，欣宜一嚟到香港，我經常同欣宜同埋兩個妹妹一齊玩，同埋食飯。」
鄭坦言：「作為一個父親，欣宜係我個女，我當然要畀愛畀佢，我要盡量做好我本分，至於今次我唔能夠去加拿大……」他望向欣宜說：「會唔會使到你……我只好將真事講出嚟……我應該講定唔講好？」欣宜點頭示意。
鄭續說：「實在喺聖誕節同新年前後，我一直有約個女出嚟見面，同佢食飯安慰佢，表示支持，但個女就話唔好，要陪媽咪，媽咪唔舒服，佢唔想出嚟同我食飯而放低媽咪。我話可唔可以去探佢（肥肥），自從佢出院後，我都無探過佢，但欣宜就話，佢每次有朋友探佢，佢都會夾硬支撐住精神招呼朋友，過後反而更加辛苦，所以我再等欣宜消息。」
及後肥肥再入院，鄭少秋再聯絡欣宜，獲知肥肥入了深切治療部，著他最好等肥肥轉到私家病房才探訪，「但係（之後）一直都聯絡唔到，我只可以從電話同欣宜聯絡，係咪找藉口啊？」
欣宜終於開腔：「其實我覺得有咁多事情，大家都係誤會，我覺得今日辦追思會係為咗紀念媽咪，我哋不如唔好畀咁多是非，或者各位有心人做出嚟嘅事情影響到我哋懷念我媽咪。」現場隨即傳來熱烈掌聲。她又向秋官說：「Daddy ，我都知道報紙、雜誌或者啲有心人誤會，做出假嘅嘢出嚟，我同屋企人都理解，我哋自己知道真相就算。」
落台後鄧拒與秋官握手
鄭少秋最後說：「實在阿肥今次離開，大家都會好傷感，都會永遠懷念肥肥笑聲，喺我哋腦海裹面，以後我更加要好好照顧欣宜，希望阿肥安心離開，多謝！」落台後，他主動趨前欲跟鄧光榮說話，但鄧態度冷淡，鄭少秋伸出友誼之手，竟遭鄧撥開，鄭少秋無奈只好返回座位。
鄧光榮上台發言時突然情緒激動，指摘鄭少秋無盡丈夫及父親責任，要求秋官公開交代。
鄭少秋在欣宜陪同下上台發言，承認與肥肥婚姻失敗而未有好好照顧欣宜。
