王貽興靚仔又有文采，深受
妹歡迎之餘，又得無線總經理陳志雲厚愛，前途大好。
可惜才子多風流，最近更同空姐女友Harriet Wong 公開戀情，犯正無線禁止同圈外人撻著大忌，據知失寵王貽興甚至連接廣告搵真銀的機會，都被大隻仔黃長興取代。
雖被打入冷宮，王貽興卻一於少理，早前更同女友買定年貨見家長，王才子搵到真愛少理前途，偉大愛情故事真實版，王才子不妨用自己做主角寫本書啦！
據知王貽興跟26歲維珍空姐女友Harriet Wong 拍拖曝光後，已即被無線「照肺」，甚至連手表平面廣告都冇得接，實行經濟封鎖斷佢米路。
據知情人士透露：「本來有間手表公司想搵王貽興拍平面廣告嘅，不過無線反而推介港男黃長興取代，連佢個新節目《香港筆跡》都要推遲到2月先出街，因為無線唔鍾意佢高調拍拖。」
雖則無線不停施壓，不過王貽興似乎愛情至上，和無線簽下3年自由度較大的代理人合約的王貽興，繼續同女友拍拖行街，早前兩人更到銅鑼灣一間海味鋪，買定年貨同未來外父拜年，情到濃時王貽興更忍不住輕吻女友前額，才子果然浪漫到暈。
少理壓力
對於高調拍拖導致無線唔老黎，王貽興就好樂觀咁堅持拍拖係小事，絕對唔會影響工作量。
F ﹕《FACE 》 王﹕王貽興
F ﹕有手表商想搵你拍廣告！聽講公司因你拍拖而推咗喎！
王﹕吓？我冇聽過，應該唔會嘅！
F ﹕但係你好耐冇新節目出街。
王﹕近期忙緊《香港筆跡》，2月11日就會出街，而家仲要搜集資料咁咪少咗出鏡囉。
F ﹕我哋見到你同女友揀傢俬同買海味喎！係咪準備見家長呀。
王﹕（笑晒口）哦！我地行吓街，買咗少少海味啫，去人哋屋企拜年都要買啲嘢嘅。佢（女友）叫我買盒平平哋嘅元貝得啦喎！
才子難過美人關，而且女友知慳識儉，又難怪王貽興愛得投入嘅！
才子情多工作減
王貽興入TVB 1年，曾與落選港姐曾愛媚傳緋聞，不過真命天子原來係空姐Harriet，王貽興更表明心跡：「我同Harriet 拍拖兩年啦！感情一路好穩定，之前啲報道都係得啖笑啫！」
感情得意，王才子事業卻似乎不太順利，自從同空姐女友拍拖後，連新節目《香港筆跡》都只得一星期一集，仲要係週一晚十一時才播放，同佢做《謎》時晚晚見到差好遠！
06年9月冇米情侶
王貽興未紅仲係窮文人時，同化妝師伊羅拍咗5年拖，03年奪得藝術家雙年獎後，做電視節目又被無線睇重，為事業撇低女友，多情才子都狠心過。
06年12月《正字》上位
王貽興拍住咪神徐淑敏和長腿妹沈卓盈做《最緊要正字》，老正文人形象冧死女，正式上位。
07年2月咪精同遊
同徐淑敏齊齊行花市斷正，不過醒目女徐淑敏立即劃清界線話：「佢唔係我嗰類型。」
07年4月解《謎》高峰
之後於節目《謎》再拍秋官同謎女郎呂慧儀，晚晚同大家講不解之謎，曝光率超高。
07年3月私藏港姐
同落選港姐曾愛媚玩地下情，如今王貽興同正印女友公開，曾愛媚只說：「我唔想再講，我同佢只係同事關係，唔想影響大家工作！」
07年7月《進步》不振
王貽興再拍沈卓盈主持《最緊要進步》雖然保持平均19點收視，可惜口碑麻麻。
07年9月蜜糖搶食
王貽興緋聞多開始失勢，同時爆出蜜糖男鄧健泓，王貽興工作量更進一步下跌，對於冇簽無線經理人合約，王貽興就話：「我之前簽咗3年代理人，完咗約先再傾啦！」
07年11月明戀投閒
去年11月被踢爆同維珍空姐Harriet 拍拖後，原定12月出街的《香港筆跡》立即押後至2月才播出，而無線亦未有給他委以重任安排新工作。有愛情卻失人氣。
王貽興本來好得陳志雲（左）歡心，可惜才子愛女友，陳總愛將已轉做鄧健泓，如今貽興王慘入雪櫃，果然成也陳總，敗也陳總。《蘋果日報》圖片
喺海味鋪左揀右睇，最後王貽興揀咗盒$428嘅元貝孝敬未來外父。
風流遊街
王貽興同空姐女友Harriet 打得火熱，兩個拍住拖去辦年貨，女友全程繑到實，當其他途人透明。
FACE周刊第36期
