06年大美人李嘉欣36歲生日，獲大劉（劉鑾雄）登全版廣告祝壽兼示愛，但事隔幾日，李嘉欣竟拖住新歡許晉亨高調拍拖，搞到呢個愛情三角錯擾攘咗好一陣子。
雖然大家同屬上流社會，但三位當事人碰面唔多，不過今年除夕（12月31日）響麗嘉酒店倒數派對上，未夠8點先有「嘉亨」攬實到場，10點幾劉鑾雄亦單拖到場，今次真係撞到正。
往年拖實母親劉葉淑婉、女友呂麗君及女兒劉秀融齊齊倒數的劉鑾雄，今年冇女伴倍感寂寞，加上同場「嘉亨」鬼咁恩愛，搞到大劉成晚面黑兼無癮。踏正12點，中環上空煙花爆發嘅同時，睇怕劉生嘅眼火都一齊爆，因為「嘉亨」啜爆慶祝，唔怪得倒數完冇幾耐，大劉即刻走人啦！
最後一年的中環麗嘉酒店（將於2月拆卸）倒數派對，特別多人撐場，賓客由晚上7點幾開始陸續到場，許世勳夫婦是最早抵達的一批，相隔5分鐘，囝囝許晉亨拖住李嘉欣甜蜜進場。
幾乎每年都帶女伴與父母一齊迎接新年的許晉亨，去年因為家中兩老仍未能接受「新抱仔」李嘉欣，搞到上年要避走歐洲倒數，但經過多次見家長，兩老亦開始接受李嘉欣。今年除夕，「一家四口」齊齊出席麗嘉派對，但勢估唔到一向鍾意響君悅倒數嘅劉鑾雄，都單拖嚟湊熱鬧。
大劉冇眼睇
踏入元旦不久劉鑾雄率先離場，記者不停追問「有冇祝福蔡少芬？」以及「撞唔撞到李嘉欣？」佢乜都唔答面燶燶離開，其間記者不停湧上前，大劉發忟憎叫保鑣築成人牆。
錫完嘉欣，有記者影唔到叫encore ，十足十玩新人一樣，許晉亨錫完一啖已經「lam 」晒
，嘉欣成個冧晒，不過酒醉仍帶三分醒，亨亨已經唔肯順應要求再錫。
甘比陪客
大劉助手甘比亦有到麗嘉酒店出席倒數派對，不過整晚很少在老闆身邊，離場時更挽著一位阿太的手臂，然後一同登上座駕離開。
去年拉龍
去年倒數有女友呂麗君在旁的劉鑾雄，明顯心情較今年靚，不單冇燶面，仲同楊受成等人玩拉人龍。不過今年彤叔唔搞，富豪們各有各玩，搞到大劉撞正「嘉亨」煙韌倒數一幕。
視而不見
據有參與的賓客表示，今年麗嘉倒數派對，分B1、B3、1樓及3樓的餐廳及宴會廳舉行，每層均有不同的嘉賓名單，大部分富豪級都聚在3樓，雖然場內賓客眾多，劉鑾雄卻不時與「嘉亨」撞到正。面對舊愛與新男友愛得纏綿，更與未來老爺奶奶許世勳夫婦上演一幕合家歡，令劉鑾雄更感無癮，半隻腳踏入許家嘅李嘉欣，為免未來家翁不悅，成晚雖然數次與大劉擦身而過，但都唔敢明刀明槍上前打招呼。
大劉雖然有私人助手甘比同場，但由於甘比大部分時間都要幫忙招呼賓客及打交道，令大劉更感寂寞，故倒數過後大劉立即燶面離場，臨走見到大批記者圍於門外，更向保鑣發脾氣。看來大劉想盡快返屋企同呂麗君及細女過元旦，好過留響麗嘉眼冤。
一家親
倒數完畢後，許世勳伉儷首先離場，被在場記者問及喜不喜歡嘉欣這位新抱時，許世勳隨即話：「新年快樂！」避開回答問題。
亨亨前女友頭耷耷
除夕當晚許晉亨前女友女優徐綺雯亦有到場，肥咗唔少嘅佢，昔日拖住許公子做主角，今次反而頭耷耷避傳媒。冇計啦！咁啱與「嘉亨」同場，俾人問起舊情咪盞
爆。
06年 叉女優頸
06年「嘉亨」仲未撻著，許晉亨拖住當時的女優舊愛徐綺雯一齊倒數，飲到好醉的亨亨面對熱情女友，竟然出手叉頸對付，咁經典的一幕，相信唔少人至今仲記得。
五角咁亂
李嘉欣同許晉亨正值熱戀期，愛到發燒實在理所當然，不過佢哋嘅舊愛大劉同女優徐綺雯就非常冇癮。雖然呢幾個人嘅關係千絲萬縷，但同場都可以視而不見，真係勁！
麗嘉最後除夕
其實呢晚除咗嘉亨溫馨迎接08年，場內其他賓客都玩得好開心。麗嘉酒店即將拆卸，老闆林建岳會唔會有啲唔捨得呢？
岳少女友Monica 女皇出巡
身為女主人的Monica ，每年除夕派對都喜歡以中式打扮出場，繼前年的皇后造型後，今年穿上黃馬褂，與男友岳少一樣擁有「BB 」車牌字頭的Monica ，更得意地訂造「BB CAR 」車牌，這輛寶馬M5嘅BB 車，市值近160萬。
林建岳前妻謝玲玲亦有參加麗嘉倒數派對，近年雖然多數與前夫現任女友Monica 前後腳到場，但據知一直相處融洽，謝玲玲更陪同林建岳媽媽余寶珠一同離場。
BB 價值不菲
身為麗嘉酒店老闆的林建岳，玩到凌晨2點半左右，賓客幾乎走咗9成佢先至離去。林建岳名下座駕均以「BB 」字頭開始，當晚的Maybach 屬最高級房車，全車的用料都可custom-made ，平均每架500多萬。
超盈粗腳現形
今年賭王何鴻燊及四太梁安琪在新葡京舉行倒數，超盈單獨留港。早前被賭王阿爸評為「唔多靚」嘅超盈，似乎又增磅，甫打開車門便見短裙下露出肥嘟嘟嘅腳，睇嚟係時候要減磅啦！
陸詩韻鬼祟會監躉富豪
陸詩韻不避嫌與緋聞男友曾文能前後腳到麗嘉出席派對，不過因工作關係一度離場，重返麗嘉時已經將近凌晨一點，錯過倒數時間，記者問她是否約了曾文能，她詐傻地說：「未見到！乜佢嚟咗咩？」
現年42歲的惠揚控股前主席曾文能，與母親乘七人車抵達酒店，聽到陸詩韻個名時即時唔敢出聲，阿媽更即刻面黑黑進場。完場後曾文能撇低阿媽單拖走人，情緒高漲的他更攬住同性朋友唔放。
接近凌晨2時，飲到面紅紅的許晉亨，與李嘉欣十指緊扣地步出麗嘉酒店。被傳媒重重包圍，二人寸步難行，有記者要求：「錫啖嘉欣先啦！」許晉亨飛咁快錫咗嘉欣一啖。之後嘉欣被傳媒迫供問幾時結婚？幾時生仔？亨亨突然man 爆解圍：「遲啲話你知！」然後帶女友走。
