俗語話：「男嘅唔壞女嘅唔愛」原來真係冇錯。
好似莫文蔚咁，本月十八日在台灣宣傳新碟時，忽然自爆已經同拍拖八年嘅馮德倫分手。雖然外間盛傳偶有緋聞嘅馮德倫另結新歡，導致二人分手，但據馮德倫身邊的朋友指，真正原因係莫文蔚嫌馮德倫太靜太悶。
就連馮德倫老友徐濠縈都話：「佢有時又真係悶啲同低調得滯嘅。」原來馮德倫係悶棍一名，又難怪莫文蔚會頂唔順嘅。
本周一（12月17日），馮德倫在柴灣工業城的製作室內做佢套電影《跳出來》嘅後期剪接，晚上就在工業城門口向傳媒交代同莫文蔚分手嘅原因。他說：「分手係因為相處有問題，唔係有第三者。（邊個先提出分手？）細節唔講啦。」
十足電車男
不過，據馮德倫身邊的朋友指，今次分手係由女方提出，主要原因，其實係因為馮德倫為人實在太平淡太悶：「兩個字可以形容馮德倫：平淡！佢平時好靜，只係鍾意打機。響片場同工作人員傾嘅話題都係圍繞電子產品。平時佢得閒，都只會留響屋企，即使夜晚有朋友約佢食飯，飯後朋友叫佢去飲嘢，佢都唔願去，寧願返屋企打機。」
該朋友指，佢哋分手，最大問題係關係太平淡：「佢哋未一齊住之前，兩人少見啲，都叫做有啲激情。但呢兩年佢哋一齊住，有時Karen （莫文蔚）返到屋企淨係見佢粒聲唔出咁打機，兩人之間幾乎完全冇話題，感情又點會唔淡？」畢竟莫文蔚今年都三十七歲，年華不再，當她懷疑馮德倫並非理想的丈夫，最後決定忍痛斬情絲，也是情有可原。
記者訪問過馮德倫的好友，一致說馮德倫份人「好乖」。梁漢文指：「佢真係好乖仔，總之係一個very nice guy 啦。」徐濠縈更指：「佢平時唔去蒲，好乖仔。不過有時嫌佢悶，同埋低調得滯囉。」現實生活中嘅「電車男」，原來係冇女仔鍾意㗎。
徐濠縈指馮德倫為人低調，不過既然同得佢friend ，就唔會嫌佢悶。記者話依家馮德倫個樣極之頹廢，徐即幫老友講好話：「唔係，因為佢之前拍戲，所以先係咁，佢冇事呀！」認真夠老友。
外間一直以為馮德倫同莫文蔚呢一對打風都打唔甩，因為二人經常被傳媒影到公然煙韌。不過，此情不再。據悉，馮德倫已搬離愛巢，搬返禮頓山同父母居住。
電腦狂迷
有研究指打得機多會出現病態，甚至會產生自閉傾向。馮德倫平時唔係打機就一個人逛電腦舖，又難怪莫文蔚會嫌佢悶。
被問及馮德倫分手一事，梁漢文說：「我同佢係好熟、係好得好緊要嘅朋友……不過，近來已經好少見佢咯。」咁熟嘅朋友都咁少見，可見工作唔算特別多嘅馮德倫平時有幾「摺」埋。
被撇滄桑look
本周一（12月17日），馮德倫在大批記者面前交代分手一事。當時佢顯得冇厘神氣，仲講到眼濕濕。據聞佢曾努力修補呢段感情，又難怪依家佢會放唔低。
