娛樂頂點:同場互藐 Yumiko明窒周汶錡
去年在《歡樂滿東華》中甩褲成名的Yumiko ，事隔一年再戰江湖，穿上絕對冇走光危機的密實賽車戰衣，與拍檔周汶錡玩「飄移」。不過未表演，兩人已經不咬弦，周汶錡先暗寸︰「唔想同Yumiko 一樣甩褲成名」，被寸的Yumiko 亦回敬話︰「如果佢要做宣傳做到咁盡，我都冇辦法！」
兩人上周六在《東華》正式交鋒時，Yumiko 更寸到出面，話周汶錡懶排練、玩「飄移」唔掂，擺明冇面俾！
暗封「甩褲王」
據知，周汶錡先出口寸Yumiko ，之前排練又多次唔到，本來要一齊拍宣傳片，但她反口唔拍，難怪工作人員都竊竊私語，指周「大支嘢」。據工作人員話，周汶錡還在背後給Yumiko 封了個綽號叫「甩褲王」。
對於周汶錡辣火頭，Yumiko 即時反擊：「佢話自己冇講過我是非，但就愈搞愈多嘢。」
而周汶錡亦指自己被人封做「假面人」，又話Yumiko 搞是非博上位。兩人互相指摘，絕不留情。
風騷窒宿敵
講到表演，勤於排練的Yumiko 玩飄移比對手周汶錡好得多，當周失手後，有人更當場寸周：「梗係啦！啲人好日都唔排練吓，點會好啫！」
表演成功的Yumiko ，影大合照時十分風騷，反觀周汶錡卻冇晒表情。記者問Yumiko對自己表現如何，她自信十足說：「OK 啦，算係咁！」但談到拍檔周汶錡則扁扁嘴話：「麻麻哋啦！唔知係咪因為佢練得少呢！」至於周汶錡就死撐：「失望？冇呀！盡咗力唔好都冇辦法！」
同場加映
《東華》當晚所見，兩人雖然共用同一個化妝間，但卻各據一方，互當透明，就算一齊由化妝間行出停車場，眼神亦沒有任何接觸，毫無拍檔默契。
甚識做的Yumiko 與工作人員玩親民，反而周汶錡就繞埋雙手玩孤獨（圖右）。
準備表演時，Yumiko 與周汶錡面左左嘴藐藐，火藥味甚濃。
表演完畢，記者邀兩人合照，她們才勉強擠出笑容。
點知影唔夠兩張，周就擰轉身「得」住Yumiko ，連戲都懶交。
