同你吟一吟:蔡依林愛食人花據講蔡依林Jolin 嘅新碟《特務J 》喺台灣嘅銷量已經過十萬，成績咁理想，Jolin 依然四出宣傳谷碟，今個星期日（廿一日）仲喺台灣淡水漁人碼頭舉行免費show ，同歌迷近距離接觸。
雖然入場睇show 免費，但Jolin 絕無欺場，唔單止連場勁舞，連佢隻愛狗「Whoo Hoo 」都抱埋上台娛賓。之但係顧得揸咪唱歌，已經跌破九十磅大關嘅Jolin ，另一隻手根本無力抱狗，幾乎將「Whoo Hoo 」成隻跌落地。
有歌有舞又有狗，美中不足係Jolin 呢晚嘅歌衫性感欠奉娘味極重，尤其係佢扮公主著住件大企領外套出場，加埋佢猙獰嘅面部肌肉，八珍以為自己見到「食人花」。
單手抱住「Whoo Hoo 」上台，Jolin 忽然甩手，幾乎走狗。
呢套衫算正常，只係條打底大底褲比較礙眼。
最近唱歌愈嚟愈肉緊嘅Jolin ，以呢個企領公主look 示人，再加鼻窿朱唇齊張，勁似食人花。壹周刊第920期
