真面目:王菀之一拍兩散 張敬軒紅館騷爛尾唔賣樣靠唱作，張敬軒、王菀之、方大同及張繼聰曾經好老友，年頭更自封「樂壇4小強」。直至張繼聰娶謝安琪憑妻貴後，王菀之不甘被搶鏡，聯同老死張敬軒杯葛對方。
不過這對同黨最近突然反面，事緣軒仔一心明年初踩入紅館開個唱，點知一向想刮王菀之過檔的搞手東亞娛樂，提出要軒仔跟愛將孖份搞騷的要求，個人騷慘變連體騷，有傳軒仔火起拍枱：「如果同佢一齊唱，我寧願唔開。」
唔讓步，演唱會最終爛尾，結果同王菀之一拍兩散。
同屬環球唱片師兄妹，唱得又作得的張敬軒與王菀之，年頭拉埋實力好友張繼聰與方大同自組「樂壇4小強」。原本friend 過打band ，但年中王菀之因不滿張繼聰嗱生仔新聞做宣傳，聯同張敬軒搞對抗。二人曾經同一陣線，最近軒仔卻因為唔想被王菀之分杯羹而反面。
雖然同環球嘅合約仲未傾得埋欄，但傳聞拉攏王菀之過檔嘅東亞娛樂，已經幫佢鋪定路同張敬軒搞演唱會。雖然計劃最後取消，但起碼有後台射住，難怪王菀之常露出一副得戚樣。
拍枱反面
有傳年尾約滿環球後過檔東亞娛樂的王菀之，年中出籠的大碟《Read My Senses 》，因欠缺宣傳反應麻麻；反觀乖乖效忠環球的張敬軒新碟《酷愛》，公司開行turbo 狂谷，歌hit 唱片又賣得，年尾各大男歌手獎項實走唔甩，二人氣勢開始有距離，心病愈來愈嚴重。
加上一向搞開演唱會的東亞娛樂，見軒仔今年勢勁，急急找他於明年年頭開演唱會。一心打算以首位內地男歌手進軍紅館開個唱的軒仔原本好開心，可惜到開會時主辦單位卻突然提出，要他孖住王菀之演出的條件。表面上搵軒仔搞騷，實質想借軒仔煲起王菀之。軒仔不甘被利用，即時拍枱話：「如果要同佢一齊唱，我寧願唔開。」
錯失機會
知情人士爆料：「嗰日有份開會嘅人，個個以為軒仔同王菀之好friend ，仲諗住佢會點頭應承，估唔到佢會咁大反應囉！」
上週六（20日）晚，張敬軒出席《仁愛堂慈善晚宴》時，記者問他是否拒絕跟王菀之搞騷兼拍枱，軒仔直認：「係有咁嘅事，不過就冇拍枱咁誇張。其實我係想以第一位內地男歌手嘅名義響紅館開個唱，但聽到4場都要同王菀之唱時，係有啲唔高興，聽講而家個期已經畀咗人，我已經冇期啦！」
軒仔誓不低頭，果然有性格。
男hit 女跌
張敬軒同王菀之雖然屬同一唱片公司，經常孖住演出兼曾傳緋聞，但軒仔近年推出的唱片銷量和口碑都跑贏王菀之，二人的距離愈嚟愈遠。
乖乖效忠環球嘅張敬軒，今年被公司力谷，上月公司聯同商台舉行「飛馳中的音樂會」，有師姐關淑怡同一哥克勤助陣，擺明要佢同謝安琪接棒做環球天王天后。
上月推出的《酷愛》大碟，於短短一個月已賣出2萬多張，銷量拍得住李克勤近期嘅《My Cup of Tea 》。
合約未明朗，環球即減少安排王菀之出席宣傳活動，只讓她（黃圈）上月客串「森美阮小儀歌劇團」舞台騷。
今年6月推出的《Read My Senses 》係新曲加精選大碟，銷量只得1萬張，成績比軒仔新碟差一倍。
4小強解體
年頭叱吒樂壇總選上，商台安排（左起）王菀之、方大同、張繼聰及張敬軒「唱作四強」同台演出，當時friend 過打band 嘅4人繑手互相祝賀，一年內，4人因受唔起名利考驗，全面解體。
爭住唱
紅館由於出年六月裝修，所以由今年至出年的期都排滿，本星期Eason 就開騷。軒仔玩性格冇得唱，仍有大把歌手搶期開騷。
年初二人響叱吒樂壇總選齊齊嗱獎，返入後台張敬軒仲捉住王菀之嘟嘴影相，friend 到痺，可惜此情不再。《忽然1周》圖片
《蘋果日報》圖片
軒仔因為唔想同王菀之一齊開騷，被迫放棄紅館檔期，他說無奈亦沒法子。
FACE周刊第22期
