同你吟一吟:方力申黐彭丹避阿嬌最後一集《味分高下》喺上個星期二（十月九日）進行錄影，前度緋聞男女方力申同阿嬌都係嘉賓之一，不過就冇被編埋一組，唔使尷尬埋身玩遊戲。
既然道不同，小方如無必要，都唔行埋阿嬌身邊，女嘅喺化妝間同周麗淇吹水，小方寧願黐埋記者堆嗱糖食。
到正式錄影，小方更加擺明車馬黐實同組嘅彭丹，即使丹丹成晚
前露罅兼凸點，好過孖住阿嬌有藉口俾人指指點點。不過論全晚焦點，都係遊戲節目常客嘅丹丹，歪晒音嘅廣東話已經出晒位，加上佢每事問，經常反駁遊戲規則，又俾主持鄧健泓不斷叫佢做一字馬加拱橋，觀眾笑到收唔到聲。
錄影完，丹丹同埋兩個助手去咗灣仔食火鍋，之後就坐一架有中港車牌嘅七人車離開。
八珍check 過呢個香港車牌，發現並無任何運輸署登記，咁都照響條街度行，就算丹丹做幾多個拱橋，俾阿sir 捉到，都一定唔會放過你。
未夠鐘錄影，阿嬌黐實周麗淇吹水，仲俾阿叻寸佢係咪收咗公司order ，唔可以同佢影相。同一時間，小方就喺化妝間出面同記者嗱糖食，無辦法現身英雄救美。
同關志斌（右一）一組嘅阿嬌掛住同丹丹吹水，隔個位嘅小方望都唔望，避免同舊情人有眼神接觸。
阿嬌摸完港男Rocky 隻肉臂，以為係食得落肚嘅肉腸，要受罰咬Rocky 隻老鼠仔一啖，阿嬌搏晒命大啖咬，似Rocky 受罰多啲。壹周刊第919期壹傳媒互動有限公司atnext
