無扨女主播周嘉儀 變鹹古主角上週傳出有線女主播遭狂徒騷擾，一時間，靚女主播人人自危。有二五電視台主播就同齊百通講，癡情粉絲送信同等放工早司空見慣，差不多稍有姿色嘅公仔箱女記都會遇過，差別在於內容有幾露骨咋。
好似被指為「小飛俠」林燕玲第二、趙海珠接班人嘅無線女主播新貴周嘉儀，在網上便多次慘成網友之間嘅性幻想對象，甚至連胸圍數字都被人公開；最近佢更成為網上鹹古「與女主播做愛」嘅主角，內容極其無聊猥褻，但入去網站睇嘅人數就爆晒燈，認真有號召力。
其實周嘉儀真係好紅，有網上尊子之稱嘅Yahoo!博客「阿脾」，就將佢個樣畫成卡通放上網任人品評。更有女記向齊百通吐苦水，因為同女主播係同學，大家嘅畢業照都被放上網任人評頭品足，大呻好唔抵。
鄔維庸資優教父
潮流興講資優，有老友向齊百通報料，原來已故全國人大代表鄔維庸醫生，竟然係香港嘅資優教育始祖。
老友話，早喺九五年，香港舉辦過一次關於資優兒童嘅國際會議，而當年就係靠鄔醫生促成呢個國際會議喺香港搞嘅，而且鄔醫生仲出心出力，同前布政司鍾逸傑及光纖之父高錕教授等，倡議成立資優教育基金，堪稱「資優三寶」。
不過老友話，唔少搞過呢個會議的地區，都會
臨關注資優問題，好似澳洲同台灣咁，早幾年一做完host ，就即刻立法栽培資優兒童，可惜香港由九五年到而家，始終都仲係原地踏步，不思進取。
電車男戀上張慧慈腳趾
除咗有線同無記，原來亞視主播張慧慈都有個癡心粉絲。
呢位電車男仁兄叫AE2000，因太鍾意亞視靚女新聞主持，被高登討論區封為「首席癡漢」。
AE兄活躍網上討論區多年，發放數千張女主播圖像或片段，由樣貌到動作，乜都品評一餐；佢特別鍾情張慧慈，曾上載特寫照，大讚其「腳趾好靚」。佢嘅出品全部附有用AE 大名排成嘅水印，據稱好似銀紙水印咁，為咗防盜喎。
張慧慈話聽過AE2000，「佢上過我個blog 度留言，仲識剪片㗎，有次輯咗我做節目啲片段，配埋音樂，整得幾好啊。佢（AE2000）都幾善意嘅。」
可能其行為太得人驚，高登討論區曾禁止AE2000再出現，但AE 亦有辦法，竟易名為「慈慈愛人」，繼續其愛的宣言。
精英大師 澳洲做大佬
香港第一次舉辦嘅「亞洲國際航空展」星期一開幕，香港退役名駒「精英大師」馬主施雅治都有來，佢話自己有間空運公司Jet-speed ，所以咪嚟參觀吓囉。
傾開偈，順便問吓佢隻愛駒近況。佢話精英大師依家好開心，住喺有維園咁大嘅澳洲墨爾本牧場度，自由自在咁奔跑，仲做埋大佬「收
」。原來馬群有一個習性，鍾意推舉最叻嗰個做首領，精英大師眾望所歸，其他馬都認佢做大佬，食草都俾大佬食先。如果有人來牧場，一定要摸精英大師先，如果唔係佢就會唔開心，呢啲係馬嘅天性，認咗一個做大佬，就以佢為首，乜都係大佬行先。
肥馬舊部冇面俾
自從「攝位局長」馬時亨俾煲呔曾「攝」咗去商貿及經濟發展局後，只能做啲經貿合作、電訊政策等濕碎嘢，自己做開又最鍾意嘅財金政策，就變成財經事務及庫務局局長陳家強地頭。
肥馬雖然明知江山已失，但依然對財金事務身痕難捺。前排李國寶捲入道瓊斯內幕交易案，明明唔關事嘅肥馬十分上心，但又唔好意思自己出面，於是派個馬仔出手，叫陳家強啲手下俾吓料，講吓單案對李國寶同對東亞影響。肥馬心諗大家會俾面佢呢個舊上司，但點知大家心諗：「你都走咗，做乜仲要我幫你做嘢？」結果肥馬做咗煲呔攝灶罅後，仲要食埋舊部檸檬。
羅旭龢外孫考第一無獎嗱
已故名人羅旭龢爵士，因為一條「旭龢道」名垂千古，佢啲家族成員就好低調，但係佢外孫蔡偉達醫生近排為咗姨媽羅怡基一筆遺產，就好頻撲。
蔡醫生話，姨媽遺囑執行人本來有四個，但係由於遺產分得好散，銀行戶口海內外都有好多個，要動用呢啲善款手續好繁複，頭尾足足搞咗六年，三個遺囑執行人中途唔肯做，最後只得佢一個唔怕煩繼續搞。呢筆遺產有四十八萬，用嚟捐俾三間大學及養和醫院，做教育基金及培訓之用。
羅怡基做過聖保羅男女中學校長，蔡醫生話雖然姨媽係校長，但佢就完全無優待，仲記得有次考試嗱第一，應該有獎嗱，但姨媽為咗避嫌，專登將個獎俾咗第二個同學仔。
蔡醫生都算係醫學世家，佢阿爸蔡永善係香港首個耳鼻喉專科醫生，大伯蔡永業更加係本港首位華人醫務衞生署署長。蔡偉達亦係腦內科名醫，曾喺○一年獲邀替龔如心做專家證人，一啲都唔嘢小。
周嘉儀嘅卡通在網上很多人瀏覽，有人更話畫到好似蔡少芬。
周嘉儀人氣急升，卻被網友整蠱，變咗做鹹古女主角。
鄔維庸、鍾逸傑同高錕可算是本港資優教育始祖。插圖：詹震寰
