全球熱爆遊戲Pokémon GO昨日終於登陸香港，藝人齊齊喪玩！連忙於湊女的媽咪李蘊，昨日撇下囡囡走到尖沙嘴與《蘋果》動主播捉精靈，楊秀惠剛瞓醒便在床上捕捉，表現瘋狂。至於遊學修未有等埋女友蘇麗珊便一支公喪玩，更揚言會踢館，氣得蘇麗珊投訴說：「唔等我！」並將已捕捉的小精靈改名做「遊學修」洩憤。
全城高唱「很想去捕捉他」，事關萬眾期待的hit爆遊戲Pokémon GO昨日終於登陸香港，不少藝人第一時間下載程式瘋狂喪玩，包括榮升媽咪的李蘊、遊學修和Super Girls成員Aka等均上街四處遊走捕捉小精靈，楊秀惠一瞓醒便在床上捕捉，眾藝人收服精靈到頭來變成被精靈收服！
李蘊昨日第一時間下載Pokémon GO，並與《蘋果》動主播到尖沙嘴捉精靈。攝影：陳慧安
李蘊返家後繼續玩，發現小精靈出現在囡囡羅紫晞附近。互聯網圖片
蘇麗珊投訴遊學修未有等埋她玩Pokémon GO。資料圖片
撇低兩個月大B女
兩個月前才誕下囡囡羅紫晞的李蘊，昨日撇下囡囡與《蘋果》動主播到尖沙嘴捉精靈，她笑說：「我啱啱開始，初級。我真係唔識㗎！」雖然她只是初哥，但沿途碰到鯉魚王及迷你龍等小精靈，李蘊即儍頭儍腦掟精靈球捕捉，每次只用一個精靈球便將精靈收服，單是鯉魚王已捕獲三隻，成績不俗，令人懷疑她之前是否曾經「偷玩」，但李蘊堅稱：「梗係冇啦！」之後李蘊在海港城再成功捕捉小哥達與獨角蟲，以及在附近PokéStops取得不少補給品，總算滿載而歸。
至於遊學修和蘇麗珊這對小情侶也是玩家，本身是Pokémon迷的遊學修，昨日第一時間下載程式，他昨在電話中說：「捉咗27隻，暫時最勁嗰隻係『高超鴨』，由儍鴨進化，CP已經去到252，𠵱家仲特登走咗落街周圍捉，亦會嘗試去踢館打道場。」其女友蘇麗珊昨日要開工，所以遊學修未有等埋女友便獨個兒玩，令女友嬲嬲豬，在Instagram投訴：「遊學修唔等埋我一齊捉。」並將自己捕捉的小精靈霹靂彈改作男友遊學修名字洩憤。
蘇麗珊將霹靂彈改作男友「遊學修」名字洩憤。
Aka（中）在銅鑼灣成功捕獲多隻精靈，開心得她大叫起來。
蘇麗珊掟「男友」
記者昨致電蘇麗珊時，她說：「我今日朝早要開工，啲朋友話我知有得玩，我即刻download。」說到她將捉到的小精靈改作男友名字，蘇麗珊笑說：「嗰隻係霹靂彈，小智（《寵物小精靈》主角）係咁掟霹靂彈出去，以為佢係精靈球，我覺得呢個寓意非常之好，我可以係咁擲遊學修出去，擲到佢發脾氣，同埋佢個樣嬲爆爆，你唔覺得好似遊學修咩？」
楊秀惠昨早一起身便在床上捉精靈，相當心急，她昨說：「我一起身就見到有一隻喺張床上，所以就捉咗床嗰隻先，我最鍾意比卡超，但都有啲擔心如果咁樣玩仲點做嘢？」原本她打算落街捉精靈，但發現家中是精靈避難所，所以決定留在家中死守。此外，Aka昨日在銅鑼灣捉精靈，經過一輪努力終成功捕獲9隻，開心得她在街上大叫。
採訪：譚倩宜、皓騫
楊秀惠一瞓醒便在床上捕捉精靈，相當香艷。
楊秀惠。資料圖片
From:
http://hk.apple.nextmedia ... 160726/19709480
